ប្រែសម្រួល : កញ្ញាដាលីស (ដេល្លីម៉េល) ៖ លោក រីស៊ី ស៊ូណាក់ (Rishi Sunak) បានទទូចថា កងកម្លាំងប្រដាប់អាវុធរបស់ចក្រភពអង់គ្លេសមានមូលនិធិដែលពួកគេត្រូវការសម្រាប់ “ពិភពលោកដែលងាយប្រែប្រួល” ក្នុងពេលជួបនឹងបញ្ហាប្រឈមកាន់តែខ្លាំងឡើងដែលបង្កឡើងដោយចិននិងរុស្ស៊ី។
នាយករដ្ឋមន្ត្រីអង់គ្លេសរូបនេះបានសន្យាថានឹងផ្តល់ប្រាក់បន្ថែមចំនួន៥ពាន់លានផោនសម្រាប់យោធាក្នុងរយៈពេលពីរឆ្នាំ ប៉ុន្តែខកខានមិនបានបំពេញតាមការទាមទាររបស់ពួកអភិរក្សនិយម ឬ ហៅកាត់ថា Tory ក្នុងការប្តេជ្ញាបំពេញគោលដៅចំណាយ ៣ ភាគរយនៃផលិតផលក្នុងស្រុកសរុប (GDP) របស់ចក្រភពអង់គ្លេសលើវិស័យការពារជាតិ។
ទឹកប្រាក់ដ៏ច្រើនសន្ធឹកសន្ធាប់ថ្មី ដែលបានសន្យានេះ នឹងត្រូវបានស្រូបយកយ៉ាងលឿនដោយការបំពេញឃ្លាំងគ្រាប់ ដែលបានប្រគល់ឱ្យអ៊ុយក្រែន និងការធ្វើការលើគម្រោង Aukus ដើម្បីអភិវឌ្ឍនាវាមុជទឹកដើរដោយថាមពលនុយក្លេអ៊ែរសម្រាប់អូស្ត្រាលី។
ការផ្តល់មូលនិធិរយៈពេលខ្លីនេះគឺមានត្រឹមតែពាក់កណ្តាលនៃអ្វីដែលរដ្ឋមន្ត្រីការពារជាតិលោក បិន វ៉ាល់ឡេស (Ben Wallace) បានទាមទារ ខណៈថវិកាយោធានឹងហួតយ៉ាងលឿនដោយសារឥទ្ធិពលនៃការលុកលុយរបស់លោក វ្ល៉ាឌីមៀ ពូទីន និងអតិផរណាខ្ពស់ បើទោះបីជាក្រុមមន្ត្រីនិយាយថារូបលោក “រីករាយ” ជាមួយនឹងប្រាក់នេះក៏ដោយ។
ខណៈដែលរដ្ឋាភិបាលគ្រោងធ្វើការត្រួតពិនិត្យសរុបឆ្នាំ២០២៣ឡើងវិញ (IR23) នៅថ្ងៃចន្ទនេះ លោកស៊ូណាក់កំពុងធ្វើទស្សនកិច្ចនៅទីក្រុងសាន់ឌីហ្គោ (San Diego) រដ្ឋកាលីហ្វ័រញ៉ាដើម្បីពិភាក្សាជាមួយសម្ពន្ធមិត្តរបស់ Aukus គឺ ប្រធានាធិបតីអាម៉េរិក ចូ បៃដិន និង នាយករដ្ឋមន្ត្រីអូស្ត្រាលី អានថូនី អាល់បាណេស (Anthony Albanese)។
ថ្លែងនៅលើនាវាសារមន្ទីរ USS Midway នៅកំពង់ផែកាលីហ្វ័រញ៉ា លោកស៊ូណាក់និយាយថា “វាច្បាស់ណាស់ថាពិភពលោកកាន់តែងាយប្រែប្រួល ការគំរាមកំហែងដល់សន្តិសុខរបស់យើងបានកើនឡើង”។
“ហើយនោះហើយជាមូលហេតុដែលយើងកំពុងវិនិយោគ ៥ ពាន់លានផោនបន្ថែមទៀតនៅក្នុងកងកម្លាំងប្រដាប់អាវុធដែលវាយឈ្នះពិភពលោករបស់យើងក្នុងអំឡុងរយៈពេលពីរឆ្នាំខាងមុខ និងបង្កើនការចំណាយលើវិស័យការពារជាតិរបស់យើងដល់ ២,៥ ភាគរយនៃផលិតផលក្នុងស្រុកសរុប ដូច្នេះយើងអាចបន្តក្លាយជាអ្នកដឹកនាំពិភពលោក នៅពេលនិយាយអំពីការការពារនិងការរក្សាប្រទេសយើងឱ្យមានសុវត្ថិភាព”។
មូលនិធិ ដែលបានសន្យានេះ នឹងឃើញប្រាក់កើនឡើង ១,៩៨ ពាន់លានផោននៅឆ្នាំនេះ និង ២,៩៧ ពាន់លានផោននៅឆ្នាំក្រោយសម្រាប់វិស័យការពារ។
ទឹកប្រាក់ចំនួន ៣ ពាន់លានផោននឹងត្រូវវិនិយោគនៅក្នុងសហគ្រាសនុយក្លេអ៊ែរការពារជាតិ រួមទាំងការគាំទ្រដល់គម្រោង Aukus ខណៈ ១,៩ ពាន់លានផោននឹងបំពេញបន្ថែមនិងពង្រឹងឃ្លាំងគ្រាប់។
លោកស៊ូណាក់បានប្រាប់អ្នកសារព័ត៌មានថា មូលនិធិបន្ថែមនេះនឹងយកការចំណាយពី ២ ភាគរយនៃ GDP ក្នុងឆ្នាំ ២០២០ ឡើងរហូតដល់ ២,២៥ ភាគរយក្នុងឆ្នាំ ២០២៥៕
នាយករដ្ឋមន្ត្រីអង់គ្លេសលោក រីស៊ី ស៊ូណាក់