ដោយៈ គង់ហេង/ កំពង់ចាម៖ កាលពីឆ្នាំ២០២២ខេត្តកំពង់ចាមដែលមានប្រជាពលរដ្ឋសរុបប្រមាណជាង១,១លាន នាក់ និងមានដង់ស៊ីតេរស់នៅចំនួន ២៤៥ នាក់ក្នុងមួយគីឡូម៉ែត្រការ៉េនោះ មានកំណើនសេកិច្ចចំនួន ៣,៦ ភាគរយ ក្នុងនោះសម្រាប់ប្រាក់ចំណូលមនុស្សម្នាក់ឡើងដល់ ១.៦៧៨ ដុល្លារអាមេរិកក្នុងមួយឆ្នាំ។ នេះជាការលើកឡើងរបស់លោក អ៊ុន ចាន់ដា អភិបាលខេត្តកំពង់ចាម ក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារប្រចាំឆ្នាំ២០២៣ ដែលបានរៀបចំឡើងនៅក្នុងសាលាខេត្តកំពង់ចាមនៅព្រឹកថ្ងៃទី ១៣ មីនានេះ។
លោកបានបញ្ជាក់នៅក្នុងសន្ទរកថាកម្រាស់ជាងប្រាំ ទំព័រថា វិបត្តិជាសាកលនៃជំងឺកូវីដ-១៩ បានធ្វើឱ្យសេដ្ឋកិច្ចខេត្តកំពង់ចាម បានធ្លាក់ចុះ នៅ ក្នុងឆ្នាំ២០២០ -១,១ភាគរយ ប៉ុន្តែបានកើនឡើង ១,៣ភាគរយនៅក្នុងឆ្នាំ២០២១។ ជាក្តីមោទកភាពរបស់ ខេត្តកំពង់ចាមរបស់យើង នាឆ្នាំ២០២១មានទំហំសេដ្ឋកិច្ចសរុបប្រមាណ ៧.៣៩៣ប៊ីលានរៀល គិតជាដុល្លារ ១.៨០៥លាន ដុល្លារ ស្មើនឹង៦,៧ ភាគរយ នៃសេដ្ឋកិច្ចជាតិសរុប ចំណូលសម្រាប់មនុស្ស ម្នាក់ៗមានចំនួន ១.៥៩២ ដុល្លារ និងតាមការព្យាករណ៍សម្រាប់ឆ្នាំ២០២២ មានកំណើន ៣,៦ភាគរយ ស្មើនឹង ៧.៧៥៨ ប៊ីលានរៀល គិតជាដុល្លារ ១.៨៩៣លានដុល្លា និងចំណូលសម្រាប់មនុស្សម្នាក់មានចំនួន១.៦៧៨ ដុល្លារ។
លោកអភិបាលខេត្តកំពង់ចាមបានមានប្រសាសន៍៍បន្តថាៈ ស្របពេលដែលវិបត្តិកូវីដ-១៩ បានធ្វើឱ្យប៉ះពាល់ដល់កំណើនសេដ្ឋកិច្ចជាតិ ប៉ុន្តែក្រោម ការដឹកនាំរបស់ សម្តេចអគ្គមហាសនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា បានដាក់ចេញនូវគោលនយោបាយ និងការគាំពារសង្គមនានាត្រូវបានដាក់ចេញ ដើម្បីស្ដារ ឡើងវិញសេដ្ឋកិច្ចជាតិ ក្រោយវិបត្តិកូវីដ-១៩ សំដៅជម្រុញការអភិវឌ្ឍន៍ និងខិតខំលើកកម្ពស់ កម្រិតជីវភាពដល់ប្រជាពលរដ្ឋ ពិសេសក្រុមជនងាយរងគ្រោះ ជាក់ស្ដែងកម្មវិធីឧបត្ថម្ភសាច់ប្រាក់ ជូនស្ត្រីមានផ្ទៃពោះ និងកុមារអាយុក្រោម០២ឆ្នាំ បានចុះឈ្មោះអ្នកទទួលផល សរុបចំនួន ៩.២៤២ នាក់, កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជម្ងឺកូវីដ ១៩ មានចំនួន ៤៨.៣៥៤គ្រួសារ កម្មវិធីជំនួយសង្គមជាសាច់ប្រាក់សម្រាប់គ្រួសារដែលមានអ្នកឆ្លង និងគ្រួសារដែលមានអ្នកស្លាប់ ដោយជំងឺកូវីដ-១៩ ក្នុងព្រឹត្តិការណ៍ ២០ កុម្ភៈ ២០២១ សរុបចំនួន ៧៦០គ្រួសារ និងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងអំឡុងពេលមានសម្ពាធ អតិផរណា ចំនួន១១.៩៥៨នាក់៕.mara
