ប្រែសម្រួល : កញ្ញាដាលីស (ដេល្លីម៉េល) ៖ “ម៉ាឡេស៊ីអាចធ្វើបាន!” នេះជាសម្តីរបស់ម្តាយរបស់លោកស្រី មីសែល យ៉ូ (Michelle Yeoh) ដែលយំនៅក្នុងការជជែកជាវីដេអូជាមួយកូនស្រីរបស់គាត់នៅតែប៉ុន្មាននាទីបន្ទាប់ពីការឈ្នះពានរង្វាន់អូស្ការជាប្រវត្តិសាស្ត្ររបស់កូនស្រីត្រូវបានប្រកាស។
លោកស្រី ចាណេត យ៉ូ (Janet Yeoh) បានប្រាប់អ្នកយកព័ត៌មានបន្ទាប់ពីកូនស្រីរបស់គាត់បានក្លាយជាស្ត្រីអាស៊ីដំបូងគេដែលឈ្នះពានរង្វាន់ Academy Award សម្រាប់តារាសម្តែងល្អបំផុត យ៉ាងដូច្នេះថា “ខ្ញុំសប្បាយចិត្តណាស់…ខ្ញុំមានមោទនភាពចំពោះកូនស្រីរបស់ខ្ញុំ។ នាងពិតជាខិតខំប្រឹងប្រែងខ្លាំងណាស់”។
“ខ្ញុំនឹងហៅនាងឱ្យត្រឡប់មកវិញ (មកម៉ាឡេស៊ី) ហើយធ្វើការអបអរឆាប់ៗនេះ។ ខែក្រោយគឺជាថ្ងៃកំណើតរបស់ខ្ញុំ”។
លោកស្រីនិងសាច់ញាតិនិងមិត្តភក្តិរបស់លោកស្រីយ៉ូផ្សេងទៀតបានប្រមូលផ្តុំគ្នានៅឯការបញ្ចាំងបន្តផ្ទាល់នៃពិធីប្រគល់រង្វាន់នៅរោងកុនមួយក្នុងក្រុងគូឡាឡាំពួ កន្លែងដែលមានការស្រែកអបអរសាទរយ៉ាងខ្លាំង ការឱបក្រសោប និងការសម្រក់ទឹកភ្នែកនៃក្តីរីករាយ ក្នុងពេលតែប៉ុន្មានវិនាទីដែលការប្រកាសត្រូវបានធ្វើឡើង។
ក្មួយស្រីរបស់លោកស្រីយ៉ូ នាងវីកគី (Vicki) បាននិយាយថា “វាជាពេលដ៏អស្ចារ្យក្រៃលែង”។
“ខ្ញុំនិយាយមិនចេញ ខ្ញុំស្រែកយំ។ អ្វីគ្រប់យ៉ាងគឺវាកើតឡើងយ៉ាងលឿន។ យើងសប្បាយចិត្តណាស់ដែលគាត់ឈ្នះ ម្តាយមីងរបស់យើងឈ្នះហើយ…”។
នាងបាននិយាយដោយសំដៅទៅលើរូបចម្លាក់អូស្ការ ថា “យើងបានបន្តប្រាប់គាត់ថា អ្នកមីងនឹងឈ្នះ…អ្នកមីងនឹងឈរលើឆាកជាមួយពានបុរសមាស”៕
ម្តាយរបស់លោកស្រីយ៉ូនិងសាច់ញាតិអបអរការឈ្នះពានអូស្ការ
