ប្រែសម្រួលៈបំណង(ដេល្លីម៉េល)៖ ហ្វីលីពីននិងអាម៉េរិកបានចាប់ផ្តើមសមយុទ្ធរួមគ្នាកាលពីថ្ងៃចន្ទទី១៣មីនា ដោយផ្តោតលើលទ្ធភាពរបស់ប្រជាជាតិអាស៊ីអាគ្នេយ៍មួយនេះក្នុងការរក្សាការពារទឹកដីរបស់ខ្លួនពីការគំរាមមកពីខាងក្រៅ។
លំហាត់យោធារួមគ្នានេះត្រូវបានធ្វើឡើងបន្ទាប់ពីប្រធានាធិបតី ហ្វែរឌីណង់ ម៉ាកូស ជូនៀ កាលពីខែមុនបានសំរេចពង្រីកការចូលប្រើរបស់កងទ័ពអាម៉េរិកទៅក្នុងមូលដ្ឋានទ័ពហ្វីលីពីន ជាចំណាត់ការមួយដែលបង្កអោយចិនខឹងនៅពេលហ្វីលីពីនត្រូវបានគេមើលឃើញថាជាកំណល់ដងថ្លឹងមួយនៃការប្រជែងភូមិសាស្ត្រនយោបាយរវាងមហាអំណាចទាំងពីរ។
ទាហានហ្វីលីពីននិងអាម៉េរិកជាង៣.០០០នាក់នឹងចូលរួមសមយុទ្ធបីសប្តាហ៍ដែលមានឈ្មោះថា សាឡាកនីបSalaknib ដែលរួមមានការហាត់បាញ់កាំភ្លើងដៃ កាំភ្លើងត្បាល់និងកាំភ្លើងធំពិតៗរួមទាំងគំរោងសាងសង់។
ឧត្តមសេនីយ៍ហ្វីលីពីនលោក រ៉ូម៉េអូ ប្រាវនឺ( Romeo Brawner)បានប្រាប់អ្នកយកព័ត៌មាននៅពិធីបើកសមយុទ្ធថា « សេណារីយ៉ូ នឹងពាក់ព័ន្ធការការពារកម្រងកោះហ្វីលីពីនពីការឈ្លានពានបរទេសដែលអាចកើតមាន»។
លោកបានបន្ថែមថា« ដោយសារវាជាសមយុទ្ធរវាងយោធានឹងយោធា យើងនឹងផ្តោតលើប្រតិបត្តិការការពារ ដូចជាការការពារដែនអាកាស និងការពារឆ្នេររបស់យើង»។
សកម្មភាពភាគច្រើននឹងធ្វើឡើងនៅបន្ទាយហ្វដ ម៉ាកសាយសាយ( Fort Magsaysay)ដែលជាជំរំយោធាធំបំផុតនៅហ្វីលីពីន និងក៏ជាទីតាំងមួយក្នុងចំណោមមូលដ្ឋានយោធាប្រាំដែលអាម៉េរិកមានសិទ្ធិចូលប្រើប្រាស់នៅក្រោមកិច្ចព្រមព្រៀងEDCA។ក្រោមកិច្ចព្រមព្រៀងនេះ អាម៉េរិកអាចប្រើប្រាស់មូលដ្ឋានទ័ពទាំងនេះសំរាប់ការហ្វឹកហាត់រួមគ្នា ដាក់តាំងសម្ភារសឹកនិងសាងសង់ហេដ្ឋារចនាសម្ពន្ធដូចជាផ្លូវចុះឡើងរបស់យន្តហោះ ឃ្លាំងប្រេង និងអាគារយោធា តែមិនរក្សាវត្តមានអចិន្ត្រៃយ៍ទេ។
ចិនបានរិះគន់កិច្ចព្រមព្រៀងនេះ ដោយហៅវាថាជា«ផ្នែកនៃកិច្ចខិតខំរបស់អាម៉េរិកដើម្បីឡោមព័ទ្ធនិងបិទខ្ទប់ចិន តាមរយៈការបង្កើតសម្ពន្ធភាពយោធាជាមួយហ្វីលីពីន។
អ្នកនាំពាក្យស្ថានទូតចិនប្រចាំទីក្រុងម៉ានីល បាននិយាយកាលពីថ្ងៃអាទិត្យថា «តាមរយៈធ្វើដូច្នេះ អាម៉េរិកមិនត្រឹមតែបង្កើនភាពតានតឹងក្នុងតំបន់ តែក៏រំខាននិងរាំងស្ទះកិច្ចខិតខំរបស់ប្រទេសជាច្រើននៅក្នុងតំបន់ដើម្បីការពារសន្តិភាពនិងស្ថិរភាពនៅសមុទ្រចិនខាងត្បូង»៕
ឧត្តមសេនីយ៍ហ្វីលីពីន និងឧត្តមសេនីយ៍អាម៉េរិកថតជាមួយទាហានហ្វីលីពីនិងអាម៉េរិកក្នុងពិធីបើកសមយុទ្ធយោធាSalaknibកាលពីថ្ងៃ១៣មីនានៅបន្ទាយហ្វដ ម៉ាកសាយសាយ