ប្រែសម្រួល : កញ្ញាដាលីស (ដេល្លីម៉េល) ៖ យោងតាមឯកសារតុលាការបានឱ្យដឹងថា បុរសម្នាក់និងស្ត្រីម្នាក់ដែលត្រូវបានចោទប្រកាន់ក្នុងការបាញ់សម្លាប់មនុស្សបួននាក់នៅឯផ្ទះល្វែងមួយក្នុងទីក្រុងដាល់ឡាស (Dallas)កន្លែងដែលទារកម្នាក់ត្រូវបានប្រទះឃើញមិនមានរបួស បានប្រាប់ប៉ូលិសថា ពួកគេបានលួចចូលទៅក្នុងផ្ទះនេះដើម្បីយកលុយ។
ប៉ូលិសបាននិយាយកាលពីថ្ងៃចន្ទទី១៣មីនាថា អាតេមីអូ ម៉ាល់ដូណាដូ (Artemio Maldonado)អាយុ ១៨ ឆ្នាំ និង អាហ្សូសេណា សាន់ឆេស (Azucena Sanchez) អាយុ ២០ឆ្នាំត្រូវបានចោទប្រកាន់ពីបទមនុស្សឃាតដែលមានស្ថានទោសប្រហារជីវិត។ កំណត់ត្រាពន្ធនាគារមិនបានរាយបញ្ជីមេធាវីសម្រាប់ជនសង្ស័យទាំងពីរនាក់នេះទេ។
ប៉ូលិសបានទៅដល់ផ្ទះកើតហេតុនៅម៉ោង៧៖១០នាទីយប់កាលពីថ្ងៃអាទិត្យទី១២មីនា ហើយបានរកឃើញមនុស្សប្រុសពីរនាក់និងស្រីពីរនាក់ត្រូវបានបាញ់ស្លាប់។ពួកគេទាំងអស់បានស្លាប់នៅកន្លែងកើតហេតុ។ អាជ្ញាធរមិនបានបញ្ចេញឈ្មោះជនរងគ្រោះទេ។
នាងសាន់ឆេសគឺជាអតីតមិត្តស្រីរបស់ជនរងគ្រោះម្នាក់ ហើយពួកគេបានជាប់ពាក់ព័ន្ធក្នុងជម្លោះឃុំគ្រងលើកូនប្រុសរបស់ពួកគេ នេះបើយោងតាមឯកសាររបស់តុលាការ។ គេមិនដឹងច្បាស់ថាតើក្មេងនោះជាទារកដែលស្ថិតនៅក្នុងផ្ទះល្វែងក្រោយការបាញ់ប្រហារនោះឬយ៉ាងណាទេ។
យោងតាមឯកសាររបស់តុលាការ នាងសាន់ឆេសបានប្រាប់ប៉ូលិសថា នាងនិងម៉ាល់ដូណាដូបានលួចចូលទៅក្នុងផ្ទះល្វែងនោះដើម្បីប្លន់។ ឯកសាររបស់តុលាការបានឱ្យដឹងថានាងសាន់ឆេសនិយាយថានាងមិននឹកគិតថាមានមនុស្សនៅក្នុងផ្ទះនោះទេ ប៉ុន្តែនៅពេលចូលដល់ខាងក្នុង ជនរងគ្រោះបានប្រឈមមុខនឹងអ្នកទាំងពីរ។
ម៉ាល់ដូណាដូបានសារភាពថាបានបាញ់សម្លាប់ជនរងគ្រោះទាំងអស់ នេះបើយោងតាមឯកសាររបស់តុលាការ។ ម៉ាល់ដូណាដូ និងសាន់ឆេស បានយកប្រអប់មួយពីទូមួយ ដែលពួកគេគិតថាមានលុយ ប៉ុន្តែវាបែរជាទទេ។
អ្នកនាំពាក្យប៉ូលិសលោកស្រី គ្រីស្ទីន ឡូវមែន (Kristin Lowman) បាននិយាយថា មន្ត្រីប៉ូលិសត្រូវបានតេហៅទៅកាន់កន្លែងកើតហេតុ បន្ទាប់ពីមនុស្សម្នាក់បានពិនិត្យមើលម្ចាស់ផ្ទះបន្ទាប់ពីមិនបានឮអ្វីពីពួកគេ។ លោកស្រីនិយាយថា ក្រោយមកប៉ូលិសបានដឹងថា សំឡេងផ្ទុះបានឮនៅប្រហែលម៉ោង១ទៀបភ្លឺ ប៉ុន្តែគ្មានអ្នកណាតេហៅប៉ូលិសទេ។
លោកស្រីឡូវមែនបាននិយាយថាមានជម្លោះរវាងជនសង្ស័យម្នាក់និងជនរងគ្រោះម្នាក់ ប៉ុន្តែមិនអាចនិយាយលម្អិតបានទេ។ លោកស្រីនិយាយថាមិនមានការគំរាមកំហែងដល់សាធារណជន ឬអ្នកផ្សេងទៀតនៅក្នុងអគារផ្ទះល្វែងនោះទេ។
សមត្ថកិច្ចបានឱ្យដឹងថា ប៉ូលិសបានរកឃើញរថយន្តរបស់ជនសង្ស័យនៅចម្ងាយប៉ុន្មានគីឡូម៉ែត្រពីកន្លែងកើតហេតុនៅម៉ោងប្រហែល៩៖៣០នាទីយប់កាលពីថ្ងៃអាទិត្យ ហើយអ្នកទាំងពីរត្រូវបានចាប់ខ្លួននៅក្រោយម៉ោង ១០ យប់។
លោកស្រីឡូវមែននិយាយថា ទារកនោះមិនបានរងរបួសទេ ប៉ុន្តែត្រូវបានបញ្ជូនទៅមន្ទីរពេទ្យជាការប្រុងប្រយ័ត្ន។ លោកស្រីនិយាយថា ទារកឥឡូវនេះកំពុងស្ថិតក្នុងការថែទាំរបស់សេវាការពារកុមារ។
ការស៊ើបអង្កេតលើការបាញ់ប្រហារកំពុងបន្ត៕
អាតេមីអូ ម៉ាល់ដូណាដូ និង អាហ្សូសេណា សាន់ឆេស ត្រូវបានចាប់ខ្លួន ក្រោយសម្លាប់មនុស្ស៤នាក់កាលពីថ្ងៃអាទិត្យនៅក្រុងដាល់ឡាស