ប្រែសម្រួល : កញ្ញាដាលីស (ដេល្លីម៉េល) ៖ កិច្ចព្រមព្រៀងនាវាមុជទឹកនុយក្លេអ៊ែរដ៏សំខាន់មួយរវាងសហរដ្ឋអាម៉េរិក អូស្ត្រាលី និងអង់គ្លេសបានគូសបញ្ជាក់ពីការព្រួយបារម្ភអំពីអំណាចយោធាកើនឡើងរបស់ចិន ប៉ុន្តែវានឹងចំណាយពេលច្រើនឆ្នាំទៀតមុនពេលនាវាថ្មីនេះអាចជួយទប់ទល់នឹងកិច្ចខិតខំប្រឹងប្រែងរបស់រដ្ឋាភិបាលក្រុងប៉េកាំងក្នុងការពង្រីកឥទ្ធិពលរបស់ខ្លួន។
កិច្ចព្រមព្រៀង ដែលជាផ្នែកមួយនៃកិច្ចព្រមព្រៀង AUKUS នឹងឃើញអូស្ត្រាលីជំនួសនាវាមុជទឹកដើរដោយថាមពលប្រេងម៉ាស៊ូតរបស់ខ្លួនជាមួយនឹងនាវាមុជទឹកដើរដោយថាមពលនុយក្លេអែរ ដែលមានសមត្ថភាពបំបាំងកាយជាងមុន និងបើកបានឆ្ងាយជាងមុន ដែលដំបូងនឹងទិញតាមរយៈសហរដ្ឋអាម៉េរិក ហើយបន្ទាប់មកនាវាមុជទឹកនេះនឹងផលិតក្នុងប្រទេសអូស្ត្រាលីតែម្តង។
ប៉ុន្តែកិច្ចខិតខំប្រឹងប្រែងនេះជួបនឹងបញ្ហាប្រឈមជាច្រើន រួមទាំងការកំណត់កាលបរិច្ឆេទយូរនិងតម្រូវការសម្រាប់ការពង្រីកសមត្ថភាពផលិតកម្ម ខណៈចិនកំពុងធ្វើឱ្យប្រសើរឡើងនូវកងកម្លាំងប្រដាប់អាវុធរបស់ខ្លួននិងបន្តការទាមទារទឹកដីនៅក្នុងតំបន់ឥណ្ឌូប៉ាស៊ីហ្វិកយ៉ាងខ្លាំងក្លា ដោយគំរាមកំហែងដល់ឧត្តមភាពខាងយោធាដែលកាន់កាប់ជាយូរមកហើយដោយរដ្ឋាភិបាលក្រុងវ៉ាស៊ីនតោននៅក្នុងតំបន់នេះ។
លោក ឆាល អេឌែល (Charles Edel) ទីប្រឹក្សាជាន់ខ្ពស់នៅមជ្ឈមណ្ឌលសម្រាប់ការសិក្សាយុទ្ធសាស្ត្រនិងអន្តរជាតិបាននិយាយនៅក្នុងព្រឹត្តិការណ៍ថ្មីៗនេះថា “ប្រទេសនីមួយៗមានហេតុផលខុសគ្នាបន្តិចបន្តួចសម្រាប់ AUKUS ប៉ុន្តែចិនជាហេតុផលចម្បង”។
លោកបាននិយាយថា “ចិនមិនត្រូវបានលើកឡើងទេ នៅពេលដែលកិច្ចព្រមព្រៀងAUKUS ត្រូវបានប្រកាសជាលើកដំបូង ទោះបីជាការកើនឡើងនៃអំណាចយោធារបស់រដ្ឋាភិបាលក្រុងប៉េកាំងនិងការប្រើប្រាស់ភាពគឃ្លើនរបស់ខ្លួនកាន់តែខ្លាំងក្លាឡើងក្នុងទសវត្សរ៍កន្លងមក គឺជាកម្លាំងជំរុញនៅពីក្រោយវាក៏ដោយ”។
សហរដ្ឋអាម៉េរិកចាត់ទុកចិនជាបញ្ហាប្រឈមដ៏វិសេសវិសាលបំផុតរបស់ខ្លួន ហើយកំពុងព្យាយាមរារាំងសកម្មភាពយោធារបស់រដ្ឋាភិបាលក្រុងប៉េកាំង ជាពិសេសនៅពេលនិយាយអំពីតៃវ៉ាន់។
ក្រុមមន្ត្រីអាម៉េរិកបាននិយាយថា ចិនចង់ឱ្យយោធារបស់ខ្លួនត្រៀមខ្លួនដើម្បីឈ្លានពានតៃវ៉ាន់នៅត្រឹមឆ្នាំ ២០២៧។
ប៉ុន្តែអូស្ត្រាលីនឹងមិនទទួលបាននាវាមុជទឹកដើរដោយថាមពលនុយក្លេអែរដំបូងរបស់ខ្លួន ដែលជានាវាក្នុងប្រភេទថ្នាក់ Virginia ដែលបានទិញពីសហរដ្ឋអាម៉េរិក រហូតដល់ទសវត្សរ៍ឆ្នាំ ២០៣០ ដែលនេះមានន័យថាពួកគេនឹងយឺតពេលក្នុងការជួយកម្ចាត់សកម្មភាពយោធារបស់ចិនមុនពេលនោះ៕
នាវាមុជទឹកប្រភេទថ្នាក់ Virginia ឆ្លងកាត់ការសាកល្បងនៅសមុទ្រប្រាវ៉ូ (Bravo) ក្នុងឆ្នាំ ២០០៩