ប្រែសម្រួល : កញ្ញាដាលីស (ដេល្លីម៉េល) ៖ បបែលសមុទ្រយក្សរាប់សិបក្បាលបានទើរពេញឆ្នេរខ្សាច់ក្នុងតំបន់ហ្គាហ្សាស្ទ្រីបកាលពីថ្ងៃចន្ទទី១៣មីនា ខណៈអ្នកនេសាទប៉ាឡេស្ទីនក្នុងតំបន់បានប្រារព្ធពិធីចាប់បបែលបានយ៉ាងច្រើនបែបនេះ។
បបែលដ៏កម្រទាំងនេះបានមកលេងទឹកសមុទ្រមេឌីទែរ៉ាណេក្បែរឆ្នេរហ្គាហ្សាជារៀងរាល់ឆ្នាំក្នុងខែមីនានិងមេសា។
ក្រៅពីនេសាទបាន បបែលជាច្រើនហាក់ទើរលើច្រាំងសមុទ្រនៅទីនោះ ហើយត្រូវបានប្រមូលដោយអ្នកស្រុកដែលខំប្រឹងប្រវេប្រវារកប្រាក់។ ពួកគេអាចលក់បានក្នុងតម្លៃប្រហែល ១២ សេកិល (Shekel) ឬ ៣,៣០ ដុល្លារក្នុងមួយគីឡូ។
ការនេសាទគឺជាសកម្មភាពពាណិជ្ជកម្មដ៏សំខាន់នៅក្នុងតំបន់ហ្គាហ្សា ដែលស្ថិតក្រោមការបិទផ្លូវដោយអ៊ីស្រាអែលតាំងពីឆ្នាំ ២០០៧ នៅពេលចលនាអ៊ីស្លាមហាម៉ាស់ចូលកាន់កាប់ទឹកដីនេះ។
នៅក្នុងការចាប់បានចុងក្រោយនេះ អ្នកនេសាទឈ្មោះ បាសៀ ស៊ូអេខ (Bashir Shoueikh) បានចាប់បានបបែលជាង ១០ ក្បាល ដែលក្បាលនីមួយៗមានទម្ងន់ពី ២០០ ទៅ ៣០០ គីឡូក្រាម។
លោកស៊ូអេខបានប្រាប់ទីភ្នាក់ងារសារព័ត៌មាន AFP ថា “ទូកនីមួយៗផ្ទុកបបែលនេះពី ២០ ទៅ ៣០ ក្បាល។ មនុស្សចូលចិត្តសាច់វាខ្លាំងណាស់”។
តំបន់នេសាទនៅសមុទ្រហ្គាហ្សា ដែលកំណត់ដោយអ៊ីស្រាអែល ប្រែប្រួលពី ១០ ទៅ ៣០ គីឡូម៉ែត្រ អាស្រ័យលើស្ថានភាពសន្តិសុខ។
បបែលសមុទ្រយក្សនេះ (Manta Ray) មានពីរប្រភេទ គឺ ម៉ាន់ត្រា អាល់ហ្វ្រេឌី (Manta Alfredi) និង ម៉ាន់ត្រា បាយរ៉ូស្ទ្រីស (Manta Birostris)។
ស្លាបរបស់សត្វដ៏ធំនេះអាចមានរហូតដល់ ៥,៥ ម៉ែត្រសម្រាប់ពូជអាល់ហ្វ្រេឌី និង ៧,៦០ ម៉ែត្រសម្រាប់ពូជបាយរ៉ូស្ទ្រីស។
សត្វទាំងពីរនេះស្ថិតនៅក្នុងបញ្ជីក្រហមរបស់សហភាពអន្តរជាតិសម្រាប់ការអភិរក្សធម្មជាតិនៃប្រភេទសត្វដែលរងការគំរាមកំហែង ដោយសារតែចំនួនរបស់វាថយចុះខ្លាំង៕
ប្រជាជនប៉ាឡេស្ទីននៅតំបន់ហ្គាហ្សានាំគ្នាចាប់បបែលសមុទ្រយក្សកាលពីថ្ងៃចន្ទ