ប្រែសម្រួលៈបំណង(ដេល្លីម៉េល)៖ អាជ្ញាធរថៃកំពុងស្វែងរកធុងដែកផ្ទុកសារធាតុវិទ្យុសកម្មដ៏គ្រោះថ្នាក់មួយបន្ទាប់ពីវាបានបាត់ពីរោងចក្រថាមពលមួយ ដោយសារវាបង្កហានិភ័យសុខភាពបើសិនជាប៉ះពាល់វាផ្ទាល់។
បុគ្គលិកនៅរោងចក្រអគ្គិសនីដើរដោយថាមពលធ្យូងថ្មនៅខេត្ត ប្រាជីនប៊ូរី នៅខាងកើតក្រុងបាងកក បានកត់សំគាល់ឃើញថា ធុងដែកប្រវែង៣០សង់ទីម៉ែត្រនិងទទឹង១៣សង់ទីម៉ែត្រ បាត់ក្នុងពេលត្រួតពិនិត្យកាលពីថ្ងៃសុក្រ។ការស្វែងរកយ៉ាងសស្រាក់សស្រាំកាលពីចុងសប្តាហ៍មិនបានរកឃើញធុងធ្ងន់២៥គីឡូមក្រាមផ្ទុកសារធាតុវិទ្យសកម្មសេស្យូម-១៣៧(Caesium-137)នេះទេ ។
ក្រុមហ៊ុនជឿថាធុងនេះធ្លាក់ចុះពីជញ្ជាំងកំពស់១៨ម៉ែត្រ កាលពីប៉ុន្មានថ្ងៃមុននិងមានអ្នករើសយក។
អភិបាលខេត្តប្រាជីនប៊ូរីបានស្នើសុំអោយប្រជាជននៅក្នុងតំបន់ជួយស្វែងរកវា និងថា«សារធាតុវិទ្យសកម្មស្ថិតក្នុងធុងបិទជិត តែបើមាននរណាម្នាក់បើកនិងប៉ះពាល់វា វាអាចបង្កការរលាកនិងរមាស់»។
ការិយាល័យAtoms for Peaceដែលជាទីភ្នាក់ងាររដ្ឋាភិបាលទទួលបន្ទុកការសិក្សាស្រាវជ្រាវនុយគ្លេអ៊ែរ បាននិយាយថា «បើនរណាបំបែកធុងនេះហើយប៉ះពាល់វា គេអាចប្រឈមការកើតមហារីកនិងជំងឺធ្ងន់ធ្ងរ។ដូច្នេះ សូមកុំបំបែកធុងនេះអោយសោះ»។
ពួកមន្ត្រីបានអោយដឹងថា ធុងវិទ្យុសកម្មដែលបាត់នេះជាឧបករណ៍ប្រើសំរាប់វាស់សម្ពាធចំហាយនៅរោងចក្រ៕
ការបាត់សារធាតុវិទ្យុសកម្មមួយធុងកំពុងបង្កការព្រួយបារម្ភ