ប្រែសម្រួល : កញ្ញាដាលីស (ដេល្លីម៉េល) ៖ វិមានក្រឹមឡាំងបាននិយាយថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងជួបពិភាក្សាជាមួយមេដឹកនាំស៊ីរីលោក បាសា អាល់អាសាដ (Bashar al-Assad) ក្នុងទីក្រុងមូស្គូនៅថ្ងៃពុធទី១៥មីនានេះ ខណៈទំនាក់ទំនងរវាងរដ្ឋមជ្ឈិមបូព៌ានេះកំពុងដំណើរការឡើងវិញ។
រុស្ស៊ីគឺជាសម្ពន្ធមិត្តមួយក្នុងចំណោមសម្ពន្ធមិត្តតិចតួចរបស់ស៊ីរីក្នុងអំឡុងសង្គ្រាមជាច្រើនឆ្នាំរបស់ខ្លួននិងភាពឯកោផ្នែកនយោបាយ។
វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា “បញ្ហាប្រធានបទនៃការអភិវឌ្ឍបន្ថែមទៀតលើកិច្ចសហប្រតិបត្តិការរុស្ស៊ី-ស៊ីរីក្នុងវិស័យនយោបាយ ពាណិជ្ជកម្ម សេដ្ឋកិច្ច និងមនុស្សធម៌ ក៏ដូចជាការរំពឹងទុកសម្រាប់ការដោះស្រាយគ្រប់ជ្រុងជ្រោយនៃស្ថានភាពនៅក្នុងនិងជុំវិញប្រទេសស៊ីរី នឹងត្រូវយកមកពិភាក្សា”។
មន្ត្រីការិយាល័យរបស់លោកអាសាដបាននិយាយថា លោកបានមកដល់ទីក្រុងមូស្គូដើម្បីបំពេញទស្សនកិច្ចផ្លូវការ ដែលក្នុងអំឡុងពេលនោះលោកនឹងជួបជាមួយលោកពូទីន។
នៅក្នុងសេចក្តីថ្លែងការណ៍មួយ មន្ត្រីការិយាល័យនិយាយថា ប្រធានាធិបតីស៊ីរីត្រូវបានស្វាគមន៍នៅពេលមកដល់ដោយអ្នកតំណាងពិសេសរបស់លោកពូទីន លោក មីខាអ៊ីល បុកដានូវ (Mikhail Bogdanov) និងឯកអគ្គរដ្ឋទូតរុស្ស៊ីប្រចាំនៅទីក្រុងដាម៉ាស លោក អាឡិចសាន់ឌឺ យេហ្វីម៉ូវ (Alexander Yefimov)។
សេចក្តីថ្លែងការណ៍របស់ប្រធានាធិបតីស៊ីរីបាននិយាយថា លោកអាសាដត្រូវបានអមដំណើរដោយ “គណៈប្រតិភូរដ្ឋមន្ត្រីដ៏ធំមួយ”។
រដ្ឋាភិបាលក្រុងដាម៉ាសគឺជាសម្ពន្ធមិត្តដ៏រឹងមាំរបស់រដ្ឋាភិបាលក្រុងមូស្គូ ដែលបានធ្វើអន្តរាគមន៍ក្នុងជម្លោះស៊ីរីក្នុងឆ្នាំ ២០១៥ ដោយបើកការវាយប្រហារតាមអាកាស ដើម្បីគាំទ្រដល់កងកម្លាំងតស៊ូរបស់រដ្ឋាភិបាល។
ជាមួយនឹងការគាំទ្រនេះក៏ដូចជាពីប្រទេសអ៊ីរ៉ង់ រដ្ឋាភិបាលក្រុងដាម៉ាសបានដណ្តើមបានវិញនូវទឹកដីជាច្រើន ដែលខ្លួនបានបាត់បង់ក្នុងដំណាក់កាលដំបូងនៃសង្គ្រាម៕
លោកអាសាដ (ស្តាំ) មកដល់ទីក្រុងមូស្គូ