ប្រែសម្រួល : កញ្ញាដាលីស (ដេល្លីម៉េល) ៖ ម្ចាស់ Facebook គឺក្រុមហ៊ុន Meta បានប្រកាសកាត់បន្ថយការងារកាលពីថ្ងៃអង្គារទី១៤មីនា ជាផ្នែកនៃអ្វីដែលនាយកប្រតិបត្តិ ម៉ាក ហ្សាក់ឃើបឺក ហៅថា “ឆ្នាំនៃប្រសិទ្ធភាព” របស់ក្រុមហ៊ុន ខណៈវិស័យបច្ចេកវិជ្ជារបស់សហរដ្ឋអាម៉េរិកបន្តដាំក្បាលចុះ។
នៅក្នុងអ៊ីមែលទៅកាន់បុគ្គលិក លោកហ្សាក់ឃើបឺកបាននិយាយថា ក្រុមហ៊ុន Metaនឹងកាត់បន្ថយការងារចំនួន ១០.០០០ ក្នុងប៉ុន្មានខែខាងមុខ ដោយផ្តោតលើផ្នែកគ្រប់គ្រងកម្រិតមធ្យមហើយមុខនាទី ៥.០០០ ផ្សេងទៀតអាចនឹងទុកឱ្យទំនេរចោល។
ការកាត់បន្ថយនេះធ្វើឡើងបន្ទាប់ពីការកាត់បន្ថយតំណែងចំនួន ១១.០០០ ដែលក្រុមហ៊ុនបានប្រកាសក្នុងខែវិច្ឆិកា ដែលនាំឱ្យមានការចាប់ផ្តើមកាត់បន្ថយការងារស្រដៀងគ្នានៅទូទាំងបណ្តាក្រុមហ៊ុនបច្ចេកវិជ្ជាធំៗរួមមាន Amazon, Google និង Microsoft ប៉ុន្តែមិនមែន Apple ទេ។
ជាមួយនឹងការប្រកាសលើកទីពីរនេះ ក្រុមហ៊ុនដែលមានមូលដ្ឋាននៅរដ្ឋកាលីហ្វ័រញ៉ានេះនឹងដកកម្លាំងពលកម្មប្រហែល ២៥ ភាគរយក្នុងរយៈពេលត្រឹមតែ ៤ ខែប៉ុណ្ណោះ។
លោកហ្សាក់ឃើបឺកបាននិយាយថា “វានឹងមានការលំបាក ហើយគ្មានវិធីដោះស្រាយរឿងនេះទេ។ វានឹងមានន័យថាត្រូវនិយាយលាគ្នាទៅកាន់មិត្តរួមការងារដែលមានទេពកោសល្យនិងចំណង់ដែលជាផ្នែកមួយនៃភាពជោគជ័យរបស់យើង”។
ជនរងគ្រោះដំបូងនឹងធ្លាក់ទៅលើផ្នែកជ្រើសរើសបុគ្គលិករបស់ក្រុមហ៊ុន Meta ខណៈក្រុមហ៊ុនបានបញ្ឈប់ជាផ្លូវការនូវការជួលបុគ្គលប៉ាតណាប៉ាតណី ដែលបានកើតឡើងនៅពេលក្រុមហ៊ុនបច្ចេកវិជ្ជាយក្សនេះបង្កើនប្រតិបត្តិការដើម្បីបំពេញតម្រូវការខ្ពស់ក្នុងអំឡុងជំងឺរាតត្បាត។
លោកហ្សាក់ឃើបឺកបាននិយាយថា ក្នុងប៉ុន្មានខែទៀត នាយកដ្ឋានបច្ចេកវិជ្ជានិងអាជីវកម្មក៏នឹងរងផលប៉ះពាល់ផងដែរ ហើយ “ក្នុងករណីមួយចំនួនតូច វាអាចចំណាយពេលរហូតដល់ចុងឆ្នាំដើម្បីបញ្ចប់ការផ្លាស់ប្តូរទាំងនេះ”៕
ក្រុមហ៊ុន Meta នឹងជម្រុះបុគ្គលិកថែម១០.០០០នាក់ទៀតក្នុងប៉ុន្មានខែខាងមុខ