ប្រែសម្រួល : កញ្ញាដាលីស (ដេល្លីម៉េល) ៖ បុគ្គលិករាប់សែននាក់ធ្វើកូដកម្មនៅទិវាថវិកាក្នុងអ្វីដែលគំរាមក្លាយជាការដើរចេញពីការងារធំបំផុត ចាប់តាំងពីពេលផ្ទុះរលកកូដកម្មការងារបច្ចុប្បន្នបានចាប់ផ្តើមកាលពីឆ្នាំមុន។
សមាជិកនៃសហជីពជាច្រើននឹងចាត់វិធានការកៀរគរកម្មករនិយោជិតពីកន្លែងការងារសំខាន់ៗរាប់រយនៅទូទាំងប្រទេស ចំពេលមានការខឹងសម្បាជាបន្តបន្ទាប់ជុំវិញបញ្ហានានា រួមទាំងប្រាក់ឈ្នួល ការងារ ប្រាក់សោធននិវត្តន៍ និងលក្ខខណ្ឌផ្សេងៗ។
អ្នកធ្វើកូដកម្មនៅថ្ងៃពុធនេះរួមមានគ្រូបង្រៀន សាស្ត្រាចារ្យនៅសាកលវិទ្យាល័យ មន្ត្រីរាជការ វេជ្ជបណ្ឌិតវ័យក្មេង អ្នកបើកបរក្រោមដីក្នុងទីក្រុងឡុងដ៍ និងអ្នកកាសែត BBC។
ទោះបីជាមានការពិភាក្សាគ្នារវាងសហជីពនិងរដ្ឋាភិបាលក៏ដោយ ក៏កូដកម្មក្នុងវិស័យសាធារណៈនៅតែបន្តជាប់គាំង។
កូដកម្មមួយចំនួន ដូចជាការតវ៉ាដោយគ្រូបង្រៀន នឹងត្រូវធ្វើឡើងតែក្នុងប្រទេសអង់គ្លេសប៉ុណ្ណោះ ដោយសារវឌ្ឍនភាពត្រូវបានធ្វើឡើងក្នុងប្រទេសវែលនិងស្កុតឡែន។
អគ្គលេខាធិការសហជីពសេវាសាធារណៈនិងពាណិជ្ជកម្ម លោក ម៉ាក សឺវ៉ូតកា (Mark Serwotka) បានព្រមានថា សកម្មភាពនេះគ្រាន់តែជាការចាប់ផ្តើមនៃកូដកម្មប៉ុណ្ណោះដែលអាចបន្លាយពេលរហូតដល់ចុងឆ្នាំ។
លោកបាននិយាយថា “នៅទិវាថវិកា យើងកំពុងស្នើសុំរដ្ឋមន្ត្រីហិញ្ញវត្ថុ ជេរ៉េមី ហាន់ (Jeremy Hunt) ផ្តល់ឱ្យសមាជិកដែលខិតខំប្រឹងប្រែងធ្វើការរបស់យើងនូវការដំឡើងប្រាក់ខែសមរម្យ”។
“យើងត្រូវបានដំឡើងប្រាក់ខែ២% នៅពេលអតិផរណាអាហារមាន១៦%កាលពីសប្តាហ៍មុន។ មន្ត្រីរាជការ ៤០.០០០ នាក់ប្រើប្រាស់ធនាគារអាហារ និង៤៥.០០០ ទាមទារអត្ថប្រយោជន៍ការងារ ដោយសារតែពួកគេក្រីក្រ។រដ្ឋាភិបាលអាចបញ្ឈប់កូដកម្មទាំងនេះនៅថ្ងៃនេះ ដោយដាក់លុយលើតុសម្រាប់សមាជិករបស់យើង”៕
អ្នកធ្វើកូដកម្មនៅថ្ងៃពុធនេះរួមមានគ្រូបង្រៀន សាស្ត្រាចារ្យនៅសាកលវិទ្យាល័យ មន្ត្រីរាជការ វេជ្ជបណ្ឌិតវ័យក្មេង អ្នកបើកបរក្រោមដីក្នុងទីក្រុងឡុងដ៍ និងអ្នកកាសែត BBC