ប្រែសម្រួលៈបំណង(ដេល្លីម៉េល)៖ រដ្ឋាភិបាលទីក្រុងមូស្គូនៅថ្ងៃពុធទី១៥មីនានេះបានប្រាប់ទៅរដ្ឋាភិបាលទីក្រុងវ៉ាស៊ីនតោនអោយនៅឆ្ងាយពីដែនអាកាសរុស្ស៊ីបន្ទាប់ពីដ្រូនអាម៉េរិកមួយត្រូវយន្តហោះប្រយុទ្ធរុស្ស៊ីស្ទាក់ផ្លូវនិងធ្លាក់ចូលសមុទ្រខ្មៅកាលពីមួយថ្ងៃមុននេះ។
យោធាអាម៉េរិកបាននិយាយថា ឧបទ្ទវហេតុនេះបង្កឡើងដោយការប៉ះទង្គិចកណ្តាលអាកាសបន្ទាប់ពីយន្តហោះSu-27ពីរគ្រឿងរបស់រុស្ស៊ីបានបើកសំដៅដ្រូន MQ-9 Reaperដែលកំពុងធ្វើប្រតិបត្តិការឈ្លបយកការណ៍លើដែនទឹកអន្តរជាតិ។មន្ត្រីអាម៉េរិកបានចោទប្រកាន់ទៀតថា យន្តហោះរុស្ស៊ីបានទម្លាក់ប្រេងលើដ្រូនរបស់ខ្លួនមុនពេលបើកបុកផ្តាច់កង្ហារមួយរបស់ដ្រូន ជាហេតុនាំអោយវាធ្លាក់ចូលក្នុងសមុទ្រ។
ទោះជាយ៉ាងណារដ្ឋាភិបាលទីក្រុងមូស្គូបានបដិសេធថាយន្តហោះរបស់ខ្លួនមិនបានប្រព្រឹត្តដូចអាម៉េរិកចោទប្រកាន់ទេ និងថាដ្រូននេះធ្លាក់មកពី«វាហោះកាច់កេវលឿនពេក»និងថាដ្រូនអាម៉េរិកបានហោះកៀកនឹងដែនអាកាសរុស្ស៊ីថែមទាំងបិទឧបករណ៍ទាក់ទងថែមទៀត។
ក្នុងសេចក្តីថ្លែងការណ៍មួយរបស់ស្ថានទូតរុស្ស៊ីប្រចាំអាម៉េរិកកាលពីដើមថ្ងៃពុធ ឯកអគ្គរដ្ឋទូតរុស្ស៊ីលោកអាណាតូលី អាន់តូណូវ(Anatoly Antonov)បាននិយាយថា ដ្រូនអាម៉េរិកបានហោះសំដៅដែនអាកាសរុស្ស៊ី«ដោយចេតនានិងបែបបង្ករឿង»។
«សកម្មភាពយោធាអាម៉េរិកមិនអាចទទួលយកបាននៅក្បែរព្រំដែនរបស់យើង ជាមូលហេតុនៃការព្រួយបារម្ភ។ពួកគេប្រមូលព័ត៌មានចារកម្ម ដែលនៅទីបំផុតបញ្ជូនវាទៅអោយរដ្ឋាភិបាលទីក្រុងគៀវដើម្បីវាយប្រហារកងកម្លាំងនិងទឹកដីរបស់យើង។សុំសួរថា បើរុស្ស៊ីបញ្ជូនដ្រូនទៅជិតទីក្រុងញូវយ៉កឬ សាន់ ហ្វ្រានស៊ីស្កូ តើកងទ័ពអាកាសនិងកងទ័ពជើងទឹកអាម៉េរិកប្រតិកម្មយ៉ាងដូចម្តេចដែរ?»។
លោកឯកអគ្គរដ្ឋទូតបានអំពាវនាវអោយរដ្ឋាភិបាលទីក្រុងវ៉ាស៊ីនតោនឈប់បង្ហោះដ្រូនទៅក្បែរព្រំដែនរុស្ស៊ីទៀត។
សូមបញ្ជាក់ថា អាម៉េរិកបានធ្វើការហោះហើរយកការណ៍នៅក្នុងដែនអាកាសអន្តរជាតិនៅក្នុងតំបន់នេះជាប្រចាំ។អាម៉េរិកបានផ្តល់ជំនួយយោធារាប់ពាន់លានដុល្លារដល់អ៊ុយក្រែន និងថាខ្លួនផ្តល់ព័ត៌មានចារកម្មដល់កងកម្លាំងអ៊ុយក្រែនសំរាប់វាយប្រហារលើកងកម្លាំងរុស្ស៊ីផងដែរ តែមិនចូលពាក់ព័ន្ធដោយផ្ទាល់ទេ។
អេលីហ្សាបេត ប្រាវ(Elisabeth Braw)ធ្វើការនៅវិទ្យស្ថានសហគ្រាសអាម៉េរិកនៅវ៉ាស៊ីនតោន បាននិយាយថា វាជា«ដំណាក់កាលរសើបខ្លាំងមួយនៅក្នុងជម្លោះនេះ ដោយសារតែវាជាការប៉ះពាល់ផ្ទាល់លើកដំបូងរវាងលោកខាងលិចនិងរុស្ស៊ី»។
រដ្ឋាភិបាលទីក្រុងមូស្គូ រំពឹងថាអាម៉េរិកឈប់បញ្ជូនយន្តហោះមកក្បែរព្រំដែនរុស្ស៊ីទៀតក្រោយការធ្លាក់ដ្រូនមួយក្នុងសមុទ្រខ្មៅ
ក្នុងហេតុការណ៍ដាច់ដោយឡែក យន្តហោះប្រដេញអង់គ្លេសនិងអាល្លឺម៉ង់ បានស្ទាក់ផ្លូវយន្តហោះយោធោរុស្ស៊ីចំនួនពីរគ្រឿងដែលហោះកៀកនឹងប្រទេសអេស្តូនី ក្នុងបេសកម្មណាតូរួមគ្នាមួយកាលពីថ្ងៃអង្គារ នៅប៉ុន្មានម៉ោងបន្ទាប់ពីដ្រូនអាម៉េរិកធ្លាក់នៅសមុទ្រខ្មៅ ចំពេលមានការព្រួយបារម្ភអំពីការផ្ទុះសង្គ្រាមនៅក្នុងតំបន់។
យន្តហោះប្រដេញអង់គ្លេសនិងអាល្លឺម៉ង់ បានហោះស្ទាក់យន្តហោះចាក់ប្រេងរុស្ស៊ី ក្រោយវាមិនបានទាក់ទងទៅក្រុមត្រួតពិនិត្យចរាចរណ៍ផ្លូវអាកាសរបស់អេស្តូនីនៅសមុទ្របាល់ទិច( Baltic)ហើយហោះឆ្ពោះទៅកាន់ដែនអាកាសណាតូ។ក្រោយមក យន្តហោះណាតូក៏បានស្ទាក់ផ្លូវយន្តហោះដឹកជញ្ជូនយោធារុស្ស៊ី Antonov 148ដែលក៏បានហោះចូកកៀកនឹងដែនអាកាសអេស្តូនី៕
យន្តហោះប្រយុទ្ធអង់គ្លេសនិងអាល្លឺម៉ង់ហោះស្ទាក់យន្តហោះរុស្ស៊ីដែលហោះកៀកនឹងដែនអាកាសអេស្តូនីកាលពីថ្ងៃអង្គារ