ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការពារជាតិរុស្ស៊ីនិងអាម៉េរិកបានជួបសន្ទនាគា្នតាមទូរស័ព្ទកាលពីថ្ងៃពុធជុំវិញការធ្លាក់ដ្រូនអាម៉េរិកក្នុងសមុទ្រខ្មៅកាលពីថ្ងៃអង្គារ។រដ្ឋមន្ត្រីការពារជាតិរុស្ស៊ីលោក សឺហ្គេ សយហ្គូ បានប្រាប់សមភាគីអាម៉េរិក ឡយ អូស្ទីន ថាការបង្ហោះដ្រូននៅក្បែរឧបទ្វីបគ្រីម៉េជាការបង្ករឿងនិងអាចនាំដល់ការធ្វើអោយសភាពការណ៍កាន់តែអាក្រក់ឡើង។
រដ្ឋមន្ត្រីការពារជាតិរុស្ស៊ីលោក សឺហ្គេ សយហ្គូ
លោកសយហ្គូ បានប្រាប់លោកអូស្ទីនថា «គួរអោយកត់សំគាល់ថា ការបង្ហោះដ្រូនយុទ្ធសាស្ត្រអាម៉េរិកមកក្បែរឆ្នេរគ្រីម៉េមានចរិតបង្ករឿងនិងនាំអោយសភាពការណ៍កាន់តែអាក្រក់ឡើងនៅតំបន់សមុទ្រខ្មៅ» នេះបើតាមសេចក្តីថ្លែងការណ៍របស់ក្រសួងការពារជាតិរុស្ស៊ី។
សេចក្តីថ្លែងការណ៍បន្តថា« រុស្ស៊ីមិនចាប់អារម្មណ៍នឹងដំណើរវិវត្តន៍ដូច្នេះទេ តែនៅពេលខាងមុខនឹងប្រតិកម្មក្នុងលក្ខណៈសមស្រប»។
រដ្ឋាភិបាលវិមានក្រឹមឡាំងបាននិយាយថា ការបង្ហោះដ្រូនមកកៀកទឹកដីរុស្ស៊ីបែបនេះបង្ហាញថារដ្ឋាភិបាលទីក្រុងវ៉ាស៊ីនតោនបានចូលរួមពាក់ព័ន្ធដោយផ្ទាល់ក្នុងការប្រយុទ្ធនិងបានបន្ថែមថា រដ្ឋាភិបាលទីក្រុងមូស្គូ នឹងព្យាយាមស្រង់ខ្មោចដ្រូនអាម៉េរិកចេញពីសមុទ្រខ្មៅ។
ក្នុងពេលជាមួយគ្នា មន្ត្រីអាម៉េរិកបាននិយាយថា ឧបទ្ទវហេតុនេះបានបង្ហាញភាពគឃ្លើនរបស់រុស្ស៊ីនិងឥរិយាបទដ៏គ្រោះថ្នាក់ ហើយប្តេជ្ញាបន្តធ្វើការឈ្លបយកការណ៍បន្តទៀត។
សូមបញ្ជាក់ថា រុស្ស៊ីបានតវ៉ាជាយូរមកហើយអំពីការហោះយកការណ៍នៅក្បែរព្រំដែនរបស់ខ្លួន តែឧបទ្ទវហេតុកាលពីថ្ងៃអង្គារបង្ហាញថា រដ្ឋាភិបាលទីក្រុងមូស្គូកាន់តែបង្កើនការត្រៀមខ្លួនប្រឈមមុខនៅពេលភាពតានតឹងកើនឡើងរវាងមហាអំណាចនុយគ្លេអ៊ែរទាំងពីរ៕
លោកឡយ អូស្ទីន ដែលបាននិយាយថា ឧបទ្ទវហេតុនេះជាផ្នែកនៃ«អំពើគឃ្លើន បង្កគ្រោះថ្នាក់និងមិនមានសុវត្ថិភាព»ដោយអាកាសយានិករុស្ស៊ី នៅក្នុងដែនអាកាសអន្តរជាតិ បាននិយាយទៅកាន់សមភាគីរុស្ស៊ី សយហ្គូ កាលពីថ្ងៃពុធជាលើកដំបូងក្នុងរយៈពេលប្រាំខែមកនេះ