ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីនៃប្រទេសម៉ាឡាវីបានអំពាវនាវកាលពីថ្ងៃពុធទី១៥មីនាសម្រាប់ការគាំទ្រជាសកលដើម្បីដោះស្រាយ “សោកនាដកម្មជាតិ”បន្ទាប់ពីព្យុះស៊ីក្លូនហ្វ្រេតឌី (Freddy) បានវាយប្រហារប្រទេសអាហ្វ្រិកភាគអាគ្នេយ៍មួយនេះ ដែលបណ្តាលឱ្យមានទឹកជំនន់និងការរអិលបាក់ដីសម្លាប់មនុស្សរាប់រយនាក់។
ព្យុះនេះបានត្រឡប់មកឆ្នេរសមុទ្រអាហ្វ្រិកវិញកាលពីចុងសប្តាហ៍ជាលើកទីពីរក្នុងរយៈពេលតិចជាងបីសប្តាហ៍ ដោយបន្សល់ទុកនូវការស្លាប់និងការបំផ្លិចបំផ្លាញប៉ុន្តែវាមិនបានបង្កការបំផ្លាញដល់ម៉ាឡាវីទេពេលវាយប្រហារលើកទីមួយ។
លោកប្រធានាធិបតី ឡាហ្សារ៉ាស់ ឆាក់វេរ៉ា (Lazarus Chakwera) បាននិយាយនៅក្នុងការប្រកាសកាន់ទុក្ខជាតិរយៈពេលពីរសប្តាហ៍ថា”កម្រិតនៃការបំផ្លិចបំផ្លាញដែលយើងកំពុងដោះស្រាយនៅទីនេះគឺធំជាងធនធានដែលយើងមាននៅក្នុងដៃរបស់យើងទៅទៀត”។
រដ្ឋាភិបាលបានសន្យាថានឹងផ្តល់ជំនួយចំនួន ១,៦ ពាន់លានក្វាឆា (kwacha)ឬ ១,៥ លានដុល្លារ ដើម្បីជួយដល់ប្រជាជនម៉ាឡាវីរាប់ម៉ឺននាក់ដែលរងផលប៉ះពាល់ដោយព្យុះនេះដែលអាជ្ញាធរនិយាយថាបានសម្លាប់មនុស្សយ៉ាងហោចណាស់ ២២៥ នាក់នៅក្នុងប្រទេស និងរាប់រយនាក់រងរបួស។
ក្រុមអ្នកជួយសង្គ្រោះបានព្យាយាមស្វែងរកអ្នកនៅរស់រានមានជីវិតនៅផ្នែកខាងត្បូងនៃប្រទេសម៉ាឡាវី ភាគច្រើនគឺនៅជុំវិញរដ្ឋធានីពាណិជ្ជកម្មប្លង់ធៀ (Blantyre)បន្ទាប់ពីព្យុះហ្វ្រេតឌីវាយលុកចូលប្រទេសនេះនិងប្រទេសជិតខាង ម៉ូសំប៊ិក ដែលបង្កឱ្យមានទឹកជំនន់និងការរអិលបាក់ដី សម្លាប់មនុស្សជិត ២៩០ នាក់នៅក្នុងប្រទេសទាំងពីរ។
ព្យុះស៊ីក្លូននេះបានចាប់ផ្តើមថមថយកាលពីថ្ងៃពុធ បន្ទាប់ពីធ្វើដំណើរចម្ងាយ ៨.០០០ គីឡូម៉ែត្រកាត់មហាសមុទ្រឥណ្ឌា មុនពេលវិលបកក្រោយវិញលើមហាសមុទ្រ ហើយបន្ទាប់មកប្តូរទិសវាយប្រហារទ្វីបអាហ្វ្រិកជាលើកទីពីរ ដោយបង្កើតបានកំណត់ត្រាក្រៅផ្លូវការជាព្យុះត្រូពិចយូរជាងគេលើពិភពលោក។
លោកឆាក់វេរ៉ានិយាយថា ព្យុះហ្វ្រេតឌីគឺជាព្យុះទី៣ ដែល “វាយលុក” ប្រទេសម៉ាឡាវីក្នុងរយៈពេល ១៣ ខែ ដោយហៅវាថា “ជាសក្ខីភាពនៃការពិតនៃការប្រែប្រួលអាកាសធាតុ”។
បន្ទាប់ពីចុះទៅមើលតំបន់រងគ្រោះមួយចំនួន លោកបាននិយាយថា ការខូចខាតនិងស្ថានភាពលំបាករបស់ជនរងគ្រោះគឺ “អាក្រក់ជាងរូបភាពនិងវីដេអូដែលយើងបានឃើញ”៕
ម៉ាឡាវីអំពាវនាវសុំជំនួយពីសកលលោកសម្រាប់ជនរងគ្រោះដោយព្យុះ