ប្រែសម្រួល : កញ្ញាដាលីស (ប៊ីប៊ីស៊ី) ៖ សារព័ត៌មានប៊ីប៊ីស៊ីបានផ្សាយកាលពីថ្ងៃពុធទី១៥មីនាថា ធនាគារជាតិអង់គ្លេសបានរក្សាការទាក់ទងជាមួយអាជ្ញាធរស្វីសនិងធនាគារ Credit Suisse ជុំវិញវិបត្តិនៅធនាគារផ្តល់ប្រាក់កម្ចីមួយនេះ។
និយតករស្វីសបាននិយាយថា ពួកគេត្រៀមខ្លួនរួចជាស្រេចដើម្បីជួយដល់ធនាគារយក្សដែលកំពុងមានបញ្ហានេះ ប្រសិនបើចាំបាច់។
វិនិយោគិន ដែលកំពុងភ័យរួចទៅហើយដោយបរាជ័យរបស់ធនាគារអាម៉េរិក មានការព្រួយបារម្ភអំពីស្ថានភាពរបស់ធនាគារ Credit Suisse។
ភាគហ៊ុននៅក្នុងធនាគារបានធ្លាក់ចុះ ២៤% ដល់កម្រិតទាបបំផុត បន្ទាប់ពីធនាគារនិយាយថាខ្លួនបានរកឃើញ “ភាពទន់ខ្សោយ” នៅក្នុងរបាយការណ៍ហិរញ្ញវត្ថុរបស់ខ្លួន។
ការព្រួយបារម្ភនេះបានរីករាលដាលពាសពេញទីផ្សារភាគហ៊ុន ដោយសន្ទស្សន៍សំខាន់ៗទាំងអស់បានធ្លាក់ចុះយ៉ាងខ្លាំងកាលពីថ្ងៃពុធ។
ធនាគារជាតិស្វីស (SNB) និងអាជ្ញាធរត្រួតពិនិត្យទីផ្សារហិរញ្ញវត្ថុស្វីសបានស្វែងរកការរំងាប់ការភ័យខ្លាចទាំងនោះ ដោយនិយាយថា ពួកគេបានត្រៀមខ្លួនរួចជាស្រេចដើម្បីជួយធនាគារ Credit Suisse ប្រសិនបើចាំបាច់។
ពួកគេបាននិយាយនៅក្នុងសេចក្តីថ្លែងការណ៍រួមថា”មិនមានការចង្អុលបង្ហាញអំពីហានិភ័យផ្ទាល់រាលដាលដល់ស្ថាប័នស្វីសដោយសារតែភាពចលាចលនាពេលបច្ចុប្បន្ននៅក្នុងទីផ្សារធនាគាររបស់សហរដ្ឋអាម៉េរិកនោះទេ”។
និយតករបាននិយាយថា ច្បាប់តឹងរ៉ឹងនឹងអនុវត្តចំពោះស្ថាប័នហិរញ្ញវត្ថុស្វីសដើម្បី “ធានាស្ថិរភាពរបស់ពួកគេ” ហើយធនាគារ Credit Suisse ត្រូវបំពេញតាមលក្ខខណ្ឌតម្រូវសម្រាប់ធនាគារនានា ដែលគេចាត់ទុកថាមានសារៈសំខាន់ជាប្រព័ន្ធ”។
ពួកគេបានបន្ថែមថា “ប្រសិនបើចាំបាច់ SNB នឹងផ្តល់សាច់ប្រាក់ងាយស្រួលដល់ធនាគារ Credit Suisse”។
ប៊ីប៊ីស៊ីនិយាយថា ធនាគារជាតិអង់គ្លេសបានទាក់ទងជាមួយធនាគារ Credit Suisse និងអាជ្ញាធរស្វីស ដើម្បីតាមដានស្ថានការណ៍។
មុននេះ ការភ័យខ្លាចអំពីភាពទន់ខ្សោយរបស់តួអង្គធនាគារអន្តរជាតិដ៏ធំបែបនេះបានដាក់សម្ពាធលើភាគហ៊ុនធនាគារនៅជុំវិញពិភពលោក ដោយសន្ទស្សន៍ភាគហ៊ុនធនាគារ Stoxx Europe ធ្លាក់ចុះ ៧% ។
នៅចក្រភពអង់គ្លេស សន្ទស្សន៍ FTSE 100 បានធ្លាក់ចុះ ៣,៨% ឬ ២៩៣ ពិន្ទុ ដែលជាការធ្លាក់ចុះធំបំផុតក្នុងពេលតែមួយថ្ងៃ ចាប់តាំងពីថ្ងៃដំបូងនៃជំងឺរាតត្បាតក្នុងឆ្នាំ ២០២០។
សន្ទស្សន៍ Dax របស់អាល្លឺម៉ង់បានធ្លាក់ចុះជាង ៣% ហើយសន្ទស្សន៍ Cac 40 របស់បារាំងបានធ្លាក់ចុះប្រហែល ៣,៥% ។ នៅប្រទេសអេស្ប៉ាញ Ibex 35 បានធ្លាក់ចុះជាង ៤% ។
នៅសហរដ្ឋអាម៉េរិក ភាគហ៊ុនទាំងនៅក្នុងធនាគារតូចនិងធំត្រូវបានវាយសំពង ដោយទាញទម្លាក់សន្ទស្សន៍ Dow ធ្លាក់ចុះ ០,៩% ខណៈ S&P 500 បានធ្លាក់ចុះ ០,៧% ។ Nasdaq បានរក្សាកម្រិតថេរពេញមួយថ្ងៃ។
លោក អាន់ឌ្រូ កេននីងហាម (Andrew Kenningham) មកពី Capital Economics បានសរសេរថា “បញ្ហានៅក្នុងធនាគារ Credit Suisse ជាថ្មីម្តងទៀតបានចោទជាសំណួរថាតើនេះជាការចាប់ផ្តើមនៃវិបត្តិសកលឬគ្រាន់តែជាករណីដួលរលំទ្រព្យសម្បត្តិបុគ្គលមួយផ្សេងទៀត”៕
ធនាគារ Credit Suisse កំពុងស្វែងរកការសង្គ្រោះពីស្ថាប័នហិរញ្ញវត្ថុស្វីស