ប្រែសម្រួលៈបំណង(ស្ពុតនិច)៖ធនាគារជាច្រើនទៀតអាចនឹងដួលរលំជួបវាសនាដូចធនាគារSilicon Valley Bank (SVB) បើសិនជាធនាគារកណ្តាលអាម៉េរិកនៅតែបន្តដំឡើងអត្រាកាប្រាក់ដើម្បីទប់អតិផរណាដូចសេះដាច់បង្ហៀររបស់ខ្លួន នេះបើតាមពួកអ្នកជំនាញការបានប្រាប់សារព័ត៌មានស្ពុតនិច( Sputnik)។
SVBជាធនាគារផ្តល់កំចីធំបំផុតរបស់អាម៉េរិកដែលរលាយចាប់តាំងពីការដួលរលំធនាគារWashington Mutualនៅឆ្នាំ២០០៨ ចំពេលពិភពលោកជួបវិបត្តិហិរញ្ញវត្ថុ។ពួកអ្នកវិនិយោគនៅធនាគារនៅកាលីហ្វ័រញ៉ាមួយនេះ បានដកប្រាក់ចេញអស់៤២ពាន់លានដុល្លារ ពីគណនីតម្កល់របស់គេកាលពីសប្តាហ៍មុន ជាហេតុនាំអោយធនាគារធ្លាក់តំលៃ(ភាគហ៊ុន)ដល់ទៅ៦០ភាគរយភ្លាមៗ។
អតិថិជននិងវិនិយោគិនផ្អើលដកប្រាក់ពីSVBចំពេលមានពាក្យចចាមអារ៉ាមថាធនាគារខ្វះទុន
ធនាគារSilicon Valley Bankនៅកាលីហ្វ័រញ៉ា
ធនាគារនេះផ្តល់ហិរញ្ញវត្ថុជិតពាក់កណ្តាលដល់បណ្តាក្រុមហ៊ុនបច្ចេកវិទ្យានិងសុខាភិបាលអាម៉េរិក។នៅត្រឹមចុងឆ្នាំ២០២២ ធនាគារបាននិយាយថាខ្លួនមានប្រាក់តម្កល់១៥១,៥ពាន់លានដុល្លារ ក្នុងនេះ១៣៧,៦ពាន់លានជារបស់អ្នកតម្កល់ប្រាក់អាម៉េរិក ហើយទ្រព្យសរុបរបស់វាគិតត្រឹមចុងឆ្នាំមុនមានចំនួន២០៩ពាន់លានដុល្លារ។
ការដួលរលំធនាគារនេះត្រូវគេជឿថាជាប់ពាក់ព័ន្ធនឹងកំណើនអត្រាការប្រាក់ដំឡើងដោយធនាគារអាម៉េរិកជាបន្តបន្ទាប់ដែលធ្វើអោយចុះខ្សោយទ្រព្យធនាគារនៅលើតារាងតុល្យភាពរបស់ស្ថាប័នហិរញ្ញវត្ថុជាច្រើន។
ក្នុងពេលជាមួយគ្នា ធនាគារSignature Bankនៅក្រុងញូវយ៉ក ដែលល្បីខាងរកស៊ីក្នុងឧស្សាហកម្មប្រាក់អេឡិចត្រូនិចគ្រីបតូ (cryptocurrency)ត្រូវបានក្រុមនិយ័តករបិទកាលពីថ្ងៃ១២មីនាដោយសារហានិភ័យដួលរលំមួយប្រព័ន្ធទាំងមូល។Signature Bankនៅចំណាត់ថ្នាក់ទី២៩ក្នុងបញ្ជីរបស់ធនាគារកណ្តាលអាម៉េរិក ក្នុងនាមជាធនាគារពាណិជ្ជធំៗនៅអាម៉េរិក នៅពេល SVBឈរនៅលេខរៀងទី១៦។
សូមបញ្ជាក់ថាអាម៉េរិកបាននិងកំពុងតស៊ូនឹងអតិផរណាកើនឡើងខ្ពស់ ដោយសារតែបញ្ហាផ្គត់ផ្គង់ក្រោយជំងឺឆ្លងកូវីដ១៩។ស្ថានការណ៍បានបង្ខំអោយធនាគារកណ្តាលអាម៉េរិកបន្តដំឡើងអត្រាកាប្រាក់ដើម្បីទប់បញ្ហា តែមធ្យោបាននេះបង្កហានិភ័យខ្លួនឯង ដោយការដំឡើងកាប្រាក់ខ្ពស់វាពន្យឺតសកម្មភាពសេដ្ឋកិច្ចនិងអាចទាញសេដ្ឋកិច្ចអោយដើរថយក្រោយ។
ចន ប៊ូកណាឃី(John Bugnacki)មន្ត្រីនិងជាប្រធានក្រុមមេធាវីនៅក្រុមហ៊ុនTacenបានកត់សំគាល់ថា ធនាគារSVB ពឹងលើលំហូរសាច់ប្រាក់ថ្មីមកពីបណ្តាឧស្សាហកម្មបច្ចកវិទ្យានិងក្រុមហ៊ុនបង្កើតថ្មីដែលត្រូវការទុនពីធនាគារដើម្បីដំណើរការអាជីវកម្ម។នៅពេលការប្រាក់កើនឡើង នាំអោយធ្លាក់ចុះសកម្មភាពអាជីវកម្មរួមទាំងការវិនិយោគក្នុងក្រុមហ៊ុនបច្ចេកវិទ្យាថ្មី ដូចជាសហគ្រាស ដែលចង់ដកលុយពីធនាគារជាជាងដាក់ប្រាក់តម្កល់ថ្មី នេះបើតាមអ្នកជំនាញការ។
លោក ចន ប៊ូកណាឃី បាននិយាយថា«នៅពេលជាមួយគ្នា ធនាគារតំបន់តូចៗជាច្រើននៅអាម៉េរិក ប្រឈមសម្ពាធកាន់តែខ្លាំងឡើងដោយសារតែពួកគេបានវិនិយោគក្រាស់ក្រែលទៅក្នុងមូលបត្រដែលយកការប្រាក់ទាបជាងអត្រាកាប្រាក់នៅធនាគារសហព័ន្ធ។ធនាគារជាច្រើន ដែលមានជំនឿថាធនាគារកណ្តាលរបស់គេនឹងមិនដំឡើងអត្រាកាប្រាក់ខ្ពស់អាក្រក់អាក្រីនិងជាញឹកញាប់កាលពីឆ្នាំកន្លងទៅ បានវិនិយោគក្រាស់ក្រែលទៅលើមូលបត្ររយៈពេលវែងក្នុងអត្រាកាប្រាក់ទាប។
នៅពេលធនាគារកណ្តាលដំឡើងការប្រាក់លឿន នាំអោយការវិនិយោគរបស់បណ្តាធនាគារតំបន់លែងអាចបានផលចំណេញ ។SVBនិងធនាគារដទៃទៀតមិនស្ថិតក្នុងក្រុមធនាគារG-SIBsបានព្យាយាមរាយការណ៍អំពីឳនភាពដើម្បីទទួលបានការវិនិយោគបន្ថែម តែនៅពេលពាក្យចចាមអារ៉ាមអំពីធនាគារSVBខ្វះទុនបានចាប់ផ្តើមផ្សព្វផ្សាយ អ្នកវិនិយោគជាច្រើនបានសំរុកនាំគ្នាទៅដកទុននិងផ្ទេទៅកាន់បណ្តាធនាគារGSIBsដែលធំជាង។
អ្នកជំនាញម៉ាសល ល័រអឺប៊ែក(Marshall Auerback)នៅវិទ្យាស្ថានសេដ្ឋកិច្ចឡេវី(Levy)ក៏បានភ្ជាប់ចំណាត់ការរបស់ធនាគារកណ្តាលទៅនឹងការដួលរលំរបស់SVB។
លោកថា ការរលាយធនាគារSVBជាផលវិបាកផ្ទាល់នៃចំណាត់វិធានការរបស់ធនាគារកណ្តាលអាម៉េរិកទៅលើអតិផរណា ដែលបង្កឡើងភាគច្រើនមកពីការរាំងស្ទះការផ្គត់ផ្គង់ មិនមែនមកពីតំរូវការខ្ពស់ទេ។មេរៀននេះអាចនាំអោយធនាគារកណ្តាលបញ្ឈប់ផែនការរបស់ខ្លួនក្នុងការដំឡើងអត្រាកាប្រាក់លឿន៕
ពួកអ្នកជំនាញការបន្ទោសការដំឡើងអត្រាកាប្រាក់ខ្ពស់និងលឿនពេកនាំអោយធនាគារSVBដួលរលំ