ប្រែសម្រួលៈបំណង(ស្ត្រេតថែមស៍)៖ នាយករដ្ឋមន្ត្រីវៀតណាមបានបញ្ជាទៅមន្ត្រីរបស់លោកអោយបន្ធូរបន្ថយលក្ខខណ្ឌទិដ្ឋាកាខ្លះដើម្បីជួយអោយប្រជាជាតិអាស៊ីអាគ្នេយ៍មួយនេះទាក់ទាញទេសចរបរទេរសអោយបានច្រើនឡើង។
យោងតាមប្រព័ន្ធផ្សព្វផ្សាយក្នុងស្រុក ការលំបាកក្នុងការទទួលបានទិដ្ឋាកាជាហេតុផលធំមួយសំរាប់វៀតណាមទាក់ទាញអ្នកដំណើរអន្តរជាតិនៅក្រោយសម័យកូវីដ។
នៅឆ្នាំ២០២២ ភ្ញៀវក្រោម៣,៧លាននាក់បានទៅទស្សនាប្រទេសវៀតណាមដែលល្បីខាងអាហារតាមផ្លូវ ឆ្នេរខ្សាច់ដ៏វែងនិងឆកសមុទ្រហាឡុង(Halong)ដែលជាទីតាំងបេតិកភណ្ឌរបស់អង្គការយូណេស្កូ។
ឆកសមុទ្រហាឡុង ក្នុងខេត្តក្វាងនិញ
នាយករដ្ឋមន្ត្រី ផាំ មិញជិញ បានណែនាំអោយគណៈរដ្ឋមន្ត្រីកែប្រែគោលនយោបាយស្តីពីនីតិវិធីអន្តោប្រវេសន៍ដូចជាផ្តល់ការអនុញ្ញាតអោយចូលដោយមិនចាំបាច់ទិដ្ឋាកា បង្កើនរយៈពេលស្នាក់នៅសំរាប់ទេសចរបរទេសនិងពង្រីកកម្មវិធីទិដ្ឋាកាអេឡិចត្រូនិច(e-visa)របស់ប្រទេសជាដើម។
សូមបញ្ជាក់ថា វៀតណាមលើកលែងទិដ្ឋាការសំរាប់អ្នកដំណើរទៅពី១៣ប្រទេស គឺ១១ប្រទេសនៅអឺរ៉ុបនិងពីរប្រទេសនៅអាស៊ី ដោយភ្ញៀវអាចស្នាក់នៅក្នុងប្រទេសនេះបានដល់ទៅ១៥ថ្ងៃ រីឯប្រទេសចំនួនប្រាំបួនក្នុងសមាគមអាស៊ានអាចស្នាក់នៅវៀតណាមដោយមិនចាំបាច់មានទិដ្ឋាការបានដល់ទៅ៣០ថ្ងៃ។
វៀតណាមបច្ចុប្បន្នផ្តល់e-visaដល់ភ្ញៀវនៅប្រទេសចំនួន៨០។
ក្រសួងវប្បធម៌ កីឡានិងទេសចរណ៍វៀតណាមនិយាយថាការបន្ធូរបន្ថយគោលនយោបាយទិដ្ឋាកាបន្ថែមទៀតជាគន្លឹះសំរាប់ទាក់ទាញទេសចរអន្តរជាតិ។
វៀតណាមកំណត់គោលដៅទាក់ទាញទេសចរអោយបាន៨លាននាក់នៅឆ្នាំ២០២៣។នៅឆ្នាំ២០១៩ វៀតណាមទទួលបានទេសចរជាង១៨លាននាក់៕