ប្រែសម្រួល : កញ្ញាដាលីស (ដេល្លីម៉េល) ៖ ផែនការរបស់រុស្ស៊ីក្នុងការបំផ្លិចបំផ្លាញខ្សែរថភ្លើងរបស់ប៉ូឡូញក្នុងគោលបំណងបញ្ឈប់ប្រទេសនេះកុំឱ្យបញ្ជូនអាវុធឱ្យទៅអ៊ុយក្រែន ត្រូវបានរកឃើញ ខណៈជនសង្ស័យជាភ្នាក់ងារបរទេសចំនួនប្រាំមួយនាក់ត្រូវបានចាប់ខ្លួន។
យោងតាមវិទ្យុRMF FM “ជនបរទេសដែលមកពីព្រំដែនភាគខាងកើតរបស់យើងត្រូវបានឃាត់ខ្លួនដោយទីភ្នាក់ងារសន្តិសុខផ្ទៃក្នុងរបស់ប៉ូឡូញ ក្រោមការសង្ស័យថាបានធ្វើការជំនួសសេវាកម្មពិសេសរបស់រុស្ស៊ី”។
ភ្នាក់ងារទាំងប្រាំមួយនាក់ ដែលគេគិតថាមកពីប្រទេសបេឡារូស ត្រូវបានចាប់ខ្លួន បន្ទាប់ពីមន្ត្រីស៊ើបការណ៍សម្ងាត់មកពីទីភ្នាក់ងារ ABW របស់ប៉ូឡូញ បានរកឃើញកាមេរ៉ាលាក់ទុកដើម្បីថតផ្លូវរថភ្លើងសំខាន់ៗ សម្រាប់ផ្ទេរអាវុធនិងគ្រាប់ទៅកាន់អ៊ុយក្រែន។
ពួកគេត្រូវបានសង្ស័យថាបានព្យាយាមបំផ្លិចបំផ្លាញខ្សែរថភ្លើងដើម្បីបង្អាក់កិច្ចប្រឹងប្រែងធ្វើសង្គ្រាមរបស់រដ្ឋាភិបាលក្រុងគៀវ។ រដ្ឋមន្ត្រីកងកម្លាំងពិសេសរបស់ប៉ូឡូញបាននិយាយថា សេចក្តីថ្លែងការណ៍ផ្លូវការនឹងត្រូវផ្តល់ជូននៅថ្ងៃសុក្រទី១៧មីនា។
ការចាប់ខ្លួននេះកើតឡើងតែប៉ុន្មានសប្តាហ៍ប៉ុណ្ណោះបន្ទាប់ពីរដ្ឋមន្ត្រីដែលទទួលខុសត្រូវលើសេវាកម្មពិសេសរបស់ប្រទេសនេះបានលាតត្រដាងថា មនុស្សប្រាំបួននាក់ផ្សេងទៀតដែលសង្ស័យសហការជាមួយសេវាកម្មរុស្ស៊ីនិងបេឡារូស ក៏ត្រូវបានឃុំខ្លួនក្នុងប៉ុន្មានខែថ្មីៗនេះផងដែរ។
លោក ស្តានីស្លាវ ហ្សារីន (Stanislaw Zaryn) ក៏បានព្រមានផងដែរអំពីសកម្មភាពស៊ើបការណ៍សម្ងាត់កាន់តែខ្លាំងឡើងរបស់រុស្ស៊ី បន្ទាប់ពីប៉ូឡូញកាលពីឆ្នាំមុនបានបណ្តេញអ្នកការទូតរុស្ស៊ីចំនួន ៤៥ នាក់ដែលត្រូវបានចោទប្រកាន់ថាធ្វើចារកម្ម។ លោកបាននិយាយថា “រុស្ស៊ីកំពុងស្វែងរកឱកាសថ្មីដើម្បីធ្វើសកម្មភាពប្រឆាំងនឹងប៉ូឡូញ”។
“យើងកំពុងដោះស្រាយជាមួយនឹងការប៉ុនប៉ងដើម្បីទទួលបានព័ត៌មានរសើប រួមទាំងការថតរូបកាតឥណទាន ឬការរកមើលទូរស័ព្ទឯកជនរបស់ជនជាតិប៉ូឡូញ។
លោកបានបន្ថែមថា “ទាំងអស់នេះត្រូវបានប្រើដើម្បីប្រមូលទិន្នន័យអំពីអ្វីដែលកំពុងកើតឡើងនៅក្នុងប្រទេសប៉ូឡូញនិងថាតើកងទ័ពរបស់យើងកំពុងធ្វើបំលាស់ទីទៅណាខ្លះ។ រុស្ស៊ីប្រើនូវអ្វីដែលហៅថាការសម្លុតកំហែងទន់ ដោយព្យាយាមបំភិតបំភ័យអ្នកដែលត្រូវបានសួរចម្លើយ”។
ការចាប់ខ្លួនចុងក្រោយនេះគឺពាក់ព័ន្ធនឹងការឃ្លាំមើលជាសម្ងាត់នៃផ្លូវរថភ្លើងនៅជិតអាកាសយានដ្ឋានរ៉េសហ្សូវ (Rzeszów) នៅភាគអាគ្នេយ៍ប៉ូឡូញ ដែលមានចម្ងាយជិត៨០ គីឡូម៉ែត្រពីព្រំដែនអ៊ុយក្រែន។
ចាប់តាំងពីការផ្ទុះសង្គ្រាមនៅអ៊ុយក្រែន អាកាសយានដ្ឋាននេះបានក្លាយជាកន្លែងដ៏សំខាន់បំផុតមួយសម្រាប់ការផ្ទេរអាវុធនិងគ្រាប់របស់លោកខាងលិច៕
ប៉ូលិសប៉ូឡូញឃាត់ខ្លួនជនបរទេសសង្ស័យ៦នាក់កាលពីថ្ងៃពុធ
អាកាសយានដ្ឋានរ៉េសហ្សូវកន្លែងដ៏សំខាន់បំផុតមួយសម្រាប់ការផ្ទេរអាវុធនិងគ្រាប់របស់លោកខាងលិច