ប្រែសម្រួល : កញ្ញាដាលីស (ដេល្លីម៉េល) ៖ អូស្ត្រាលីគ្រោងនឹងទិញកាំជ្រួចបណ្តែត Tomahawk រាប់រយគ្រាប់ពីសហរដ្ឋអាម៉េរិក ជាផ្នែកនៃកិច្ចព្រមព្រៀងសន្តិសុខ AUKUS ។
មន្ទីរបញ្ចកោណបានយល់ព្រមលក់កាំជ្រួចមីស៊ីលនេះរហូតដល់ ២២០ គ្រាប់ក្នុងតម្លៃ ១,៣ ពាន់លានដុល្លារនៅក្នុងកិច្ចព្រមព្រៀង ដែលនឹងរួមបញ្ចូលការគាំទ្រផ្នែកបច្ចេកទេសផងដែរ។
ការលក់កាំជ្រួចដែលបានគ្រោងទុកនេះធ្វើឡើងបន្ទាប់ពីការប្រកាសរបស់អូស្ត្រាលីក្នុងការទិញនាវាមុជទឹកនុយក្លេអ៊ែរជាច្រើនគ្រឿង ក្រោមសម្ពន្ធភាពសហរដ្ឋអាម៉េរិកនិងចក្រភពអង់គ្លេសក្នុងតម្លៃរហូតដល់៣៦៨ពាន់លានដុល្លារ។
ឧបនាយករដ្ឋមន្ត្រី រីឆាត ម៉ាឡេស (Richard Marles) បាននិយាយថា អូស្ត្រាលីនឹងធ្វើការយ៉ាងជិតស្និទ្ធជាមួយសហរដ្ឋអាម៉េរិកដើម្បីទទួលបានសមត្ថភាពកាំជ្រួចបន្ថែមទៀត។
លោកបានប្រាប់កម្មវិធី Todayរបស់ទូរទស្សន៍ Nine នៅព្រឹកថ្ងៃសុក្រទី១៧មីនានេះថា “វាជាផ្នែកមួយដ៏សំខាន់នៃអ្វីដែលយើងត្រូវធ្វើជាមួយនឹងគោលជំហររបស់យើង ពោលគឺមានលទ្ធភាពកាន់តែច្រើនក្នុងការបាញ់”។
“ការធ្វើឱ្យប្រាកដថាយើងមានមីស៊ីលវាយប្រហាររយៈចម្ងាយឆ្ងាយគឺជាសមត្ថភាពដ៏សំខាន់សម្រាប់ប្រទេស។ វាអនុញ្ញាតឱ្យយើងអាចទៅដល់ហួសពីច្រាំងសមុទ្ររបស់យើងបន្ថែមទៀត ហើយនោះជារបៀបដែលយើងអាចរក្សាសុវត្ថិភាពអូស្ត្រាលី”។
រដ្ឋមន្ត្រីក្រសួងឧស្សាហកម្មការពារជាតិលោក ផាត់ ខុនរ៉យ (Pat Conroy) បាននិយាយថា កាំជ្រួចទាំងនោះអាចបាញ់ចេញពីនាវាមុជទឹកថ្នាក់ Virginia របស់សហរដ្ឋអាម៉េរិក ដែលអូស្ត្រាលីនឹងទិញក្រោមកិច្ចព្រមព្រៀង AUKUS ។
លោកបានប្រាប់ទូរទស្សន៍ ABC TV ថា “យើងពិតជាចង់បានសមត្ថភាពល្អបំផុតដែលអាចធ្វើទៅបានសម្រាប់កងកម្លាំងការពារអូស្ត្រាលី ដូច្នេះរួមបញ្ចូលទាំងសមត្ថភាពក្នុងការវាយប្រហារគូប្រជែងឱ្យឆ្ងាយតាមដែលអាចធ្វើទៅបានពីដីគោកអូស្ត្រាលី”។
“កាំជ្រួចនាំផ្លូវគឺជាផ្នែកមួយដ៏សំខាន់នៃរឿងនោះក៏ដូចជានាវាមុជទឹកដែលបាញ់វាផងដែរ”៕
អូស្ត្រាលីនឹងទិញកាំជ្រួច Tomahawk ២២០ គ្រាប់