ប្រែសម្រួល : កញ្ញាដាលីស (ដេល្លីម៉េល) ៖ កម្មករសំរាមក្រុងប៉ារីសដែលធ្វើកូដកម្មកំពុងប្រឈមមុខនឹងការជាប់ពន្ធនាគារ ប្រសិនបើពួកគេបដិសេធមិនសម្អាតរដ្ឋធានីបារាំង បន្ទាប់ពីសំរាម ៨.០០០ តោនគរចោលគ្មានអ្នកប្រមូល។
ប៉ូលិស “បានទាមទារ” កម្មករសំរាមវិលមកសម្អាតក្រុងកាលពីថ្ងៃព្រហស្បតិ៍ទី១៦មីនា ដោយនិយាយថា ប្រសិនបើពួកគេបន្តការតវ៉ាប្រឆាំងនឹងកំណែទម្រង់ប្រាក់សោធននិវត្តន៍របស់លោក អេមម៉ានុយអែល ម៉ាក្រុង ពួកគេនឹងត្រូវកាត់ទោសជាប់គុក។
រឿងនេះកើតឡើងបន្ទាប់ពីសកម្មភាពកូដកម្មរយៈពេល ១០ ថ្ងៃជាប់ៗគ្នាដោយក្រុមកម្មករសំរាម ក៏ដូចមនុស្សរាប់លាននាក់ផ្សេងទៀតដែរនៅទូទាំងប្រទេសបារាំងមានការខឹងសម្បាចំពោះផែនការបង្កើនអាយុចូលនិវត្តន៍ពី ៦២ ទៅ ៦៤ ឆ្នាំ។
អ្នកប្រមូលសំរាមបានរៀបចំកូដកម្មដាច់ជាប់ៗប្រឆាំងនឹងការផ្លាស់ប្តូរនេះ ខណៈវិស័យផ្សេងទៀតរៀបចំការដើរចេញពីការងារពេញៗមួយថ្ងៃជាប់ៗគ្នា អមជាមួយនឹងមហាបាតុកម្ម។
យោងតាមតួលេខរបស់សាលាក្រុង សំរាមប្រហែល ៧.៦០០ តោនបានគរចោលលើដងផ្លូវនានាក្នុងទីក្រុងប៉ារីស គិតត្រឹមថ្ងៃពុធ ដែលធ្វើឱ្យទីក្រុងមានក្លិនស្អុយដូចប្រហុក។
មេប៉ូលិសក្រុង លោក ឡូរ៉ង់ នូញេស (Laurent Nunez) កាលពីល្ងាចថ្ងៃពុធបានជូនដំណឹងដល់អភិបាលក្រុងប៉ារីសលោកស្រី អានីដាលហ្គោ (Anne Hidalgo) ដែលឈរខាងកម្មករថា រដ្ឋាភិបាលនឹងប្រើអំណាចរបស់ខ្លួនដើម្បី “ទាមទារ” អ្នកប្រមូលសំរាមដែលធ្វើកូដកម្មមកធ្វើការវិញក្រោមការគំរាមកាត់ទោស។
នៅក្នុងលិខិតប្រើពាក្យធ្ងន់ៗ លោកបាននិយាយថា លោកចង់បានបញ្ជីឈ្មោះកម្មករសំរាមដែលស្ថិតនៅក្រោមអំណាចរបស់លោកស្រី “បញ្ជូនមកខ្ញុំដោយមិនបង្អង់យូរ”ហើយបន្ទាប់មកពួកគេនឹងត្រូវត្រឡប់ទៅធ្វើការវិញ។
អ្នកដែលនៅតែធ្វើកូដកម្ម នឹងប្រឈមជាប់ពន្ធនាគាររយៈពេលប្រាំមួយខែនិងពិន័យជាប្រាក់ចំនួន ៩.០០០ ផោន ឬ ១០.០០០ ដុល្លារ៕
សំរាមជិត ៨.០០០ តោនគរចោលពេញក្រុងប៉ារីស