ដោយៈសុក្ខារិន/ពោធិ៍សាត់៖ នៅថ្ងៃទី១៧ម៏នា២០២៣នេះ លោក កែវ រតនៈ ប្រធានក្រុមការងារគណបក្សប្រជាជនចុះជួយស្រុកក្រគរនិងស្រុកកណ្តៀង ខេត្តពោធិសាត់បានអញ្ជើញចូលរួម ពិធីបុណ្យកតញ្ញូជូនមនុស្សចាស់ដែលមានអាយុចាប់ពី៦៥ឆ្នាំនិងសម្ពោធសមិទ្ធផលនានាក្នុងវត្តសុវណ្ណមយូរ៉ា ហៅ វត្តក្ងាន ស្ថិតក្នុងឃុំស្វាយលួង ស្រុកកណ្តៀង ដោយមានការចូលរួមពីលោក ងួន ប៉ោសេង អភិបាលរងខេត្ត ព្រមទាំងក្រុមការងារនិងអាជ្ញាធរឃុំ ស្រុកនិងប្រជាពលរដ្ឋយ៉ាងច្រើនកុះករ។
លោក ឆាយ គឹមម៉ុង អភិបាលស្រុកកណ្តៀង បានលើកឡើងពីប្រវត្តិនោះថា វត្តសុវណ្ណមយូរ៉ា ហៅវត្តក្ងានត្រូវបានកសាងឡើងក្នុងឆ្នាំ១៩០២ដែលកាលនោះស្ថិតក្នុងភូមិក្ងាន ឃុំស្នូក ស្រុកបាកាន បច្ចុប្បន្នស្ថិតក្នុងភូមិស្វាយយាង ឃុំស្វាយលួង ស្រុកកណ្តៀង។ចាប់តាំងពីបានបង្កើតឡើងមកព្រះគ្រូចៅអធិការវត្ត គណៈកម្មការ អាចារ្យគ្រប់ជំនាន់ព្រមទាំងពុទ្ធបរិស័ទបានដឹកនាំនិងចូលរួមកសាងបាននូវសមិទ្ធផលជាច្រើនតែទោះជាយ៉ាងនេះក៏ដោយទីវត្តនេះក៏ដូចវត្តនានាត្រូវបានបំផ្លិចបំផ្លាញនៅក្នុងរបបកម្ពុជាប្រជាធិបតេយ្យ។
ព្រះចៅអធិការបច្ចុប្បន្នព្រះនាម ទៀវ ស៊ាង ត្រូវបានតែងតាំងនៅក្នុងឆ្នាំ២០១៧។ដោយសារការយកចិត្តទុកដាក់និងចូលរួមគាំទ្រពីលោក កែវ រតនៈរួមជាមួយក្រុមការងារគ្រប់លំដាប់ថ្នាក់នោះបានកសាងពុទ្ធបដិមាដ៏ធំមួយព្រះអង្គដោយចំណាយជាង៥ម៉ឺនដុល្លារទុកសម្រាប់ប្រយោជន៍ក្នុងព្រះពុទ្ធសាសនា។
ក្នុងឱកាសនេះលោក កែវ រតនៈ បានលើកឡើងថានេះមិនមែនជាលើកទី១នោះទេ កម្មវិធីបុណ្យកតញ្ញូជូនចំពោះលោកតា លោកយាយចាប់ពីអាយុ៦៥ឆ្នាំឡើងទៅបានអនុវត្តជាង១៥ឆ្នាំមកហើយតែដោយសារវិបត្តិកូវីដ១៩ត្រូវបានខកខានឥឡូវចាប់ផ្តើមឡើងវិញ ក្នុងគោលបំណងគោរពដឹងគុណនិងចម្រើនជន្មាយុលោកតាលោកយាយនៅក្នុងឱកាសបុណ្យចូលឆ្នាំខាងមុខនេះ។
លោកបានលើកឡើងទៀតថា ក្នុងរយៈពេលប៉ុន្មានឆ្នាំនេះសមិទ្ធផលទាំងវិស័យពុទ្ធចក្រនិងអាណាចក្រនៅក្នុងស្រុកកណ្តៀងនិងស្រុក ក្រគរក៏ដូចទូទាំងខេត្តពោធិ៍សាត់មានការអភិវឌ្ឍដែលអាចឆ្លុះបញ្ចាំងបានថាសមិទ្ធិផលទាំងអស់នេះគឺមានតែគណៈបក្សប្រជា ជនកម្ពុជាមួយប៉ុណ្ណោះដែលជួយយើងនិងមានអ្វីៗគ្រប់បែបយ៉ាង៕srn / N
