ប្រែសម្រួលៈបំណង(ដេល្លីម៉េល)៖ សហរដ្ឋអាម៉េរិកបានបន្តការបង្ហោះដ្រូនឈ្លបយកការណ៍លើតំបន់សមុទ្រខ្មៅឡើងវិញក្រោយការធ្លាក់ដ្រូនឈ្លបយកការណ៍របស់ខ្លួនមួយកាលពីថ្ងៃអង្គារចំពេលយន្តហោះប្រដេញរុស្ស៊ីស្ទាក់ផ្លូវ នេះបើតាមការអោយដឹងពីមន្ត្រីអាម៉េរិកពីរនាក់កាលពីថ្ងៃសុក្រ។
ពួកគេបាននិយាយថា ដ្រូនRQ-4 Global Hawkបានចេញបំពេញបេសកកម្មទៅកាន់តំបន់នោះកាលពីថ្ងៃសុក្រ និងមន្ត្រីម្នាក់បាននិយាយថាវាជាលើកដំបូងដែលមានការបង្ហោះដ្រូនទៅកាន់តំបន់សមុទ្រខ្មៅចាប់តាំងពីមានឧបទ្ទវហេតុកាលពីថ្ងៃអង្គារ។
ក្រុមមន្ត្រីក្រសួងការពារជាតិអាម៉េរិកបានអះអាងនៅសប្តាហ៍នេះថា ឧបទ្ទវហេតុធ្លាក់ដ្រូនMQ-9នោះនឹងមិននាំអោយរដ្ឋាភិបាលទីក្រុងវ៉ាស៊ីនតោនបញ្ឈប់បេសកកម្មដូច្នេះទេ។
ការស្ទាក់ផ្លូវនាំអោយធ្លាក់ដ្រូនរបស់កងទ័ពអាកាសអាម៉េរិកកាលពីថ្ងៃអង្គារជាហេតុការប្រឈមមុខផ្ទាល់រវាងរុស្ស៊ីនិងអាម៉េរិកជាលើកដំបូងចាប់តាំងពីសង្គ្រាមអ៊ុយក្រែនបានចាប់ផ្តើម ដោយវាកាន់តែធ្វើអោយទំនាក់ទំនងរវាងអាម៉េរិកនិងរុស្ស៊ីកាន់តែធ្លាក់ចុះដុនដាបទៅ។
រុស្ស៊ីបានបដិសេធការចោទប្រកាន់របស់អាម៉េរិកថាយន្តហោះSu-24 របស់ខ្លួនបានបុកដ្រូនMQ-9របស់អាម៉េរិកបណ្តាលអោយវាដាច់កង្ហារនិងធ្លាក់ចូលក្នុងសមុទ្រខ្មៅ ហើយផ្ទុយទៅវិញបន្ទោសលើដ្រូននោះដែលហោះ«បត់ឆែវខ្លាំងពេក»បណ្តាលអោយវាធ្លាក់។
ក្រសួងការពារជាតិអាម៉េរិកកាលពីថ្ងៃព្រហស្បតិ៍បានបញ្ចេញវីដេអូ បង្ហាញយន្តហោះSu-27មួយហោះកៀកនឹងដ្រូនរបស់ខ្លួននិងទម្លាក់ប្រេង ក្នុងអ្វីដែលមន្ត្រីអាម៉េរិកថាទំនងជាមានបំណងធ្វើអោយដ្រូនខូច៕
អាម៉េរិកបញ្ជូន ដ្រូនRQ-4 Global Hawkទៅកាន់តំបន់សមុទ្រខ្មៅវិញម្តងដោយសារវាហោះចម្ងាយឆ្ងាយនិងក្នុងរយៈកំពង់ខ្ពស់និងអាចឈ្លបយកការណ៍បានល្អផងដែរ