ប្រែសម្រួលៈបំណង(ស៊ីអិនអិន,ដេល្លីម៉េល)៖ ដំណើរទស្សនកិច្ចរបស់ប្រធានាធិបតីស៊ី ជីនពីង ទៅកាន់រុស្ស៊ីនៅសប្តាហ៍ក្រោយគឺដើម្បី«សន្តិភាព»ហើយចិននឹង«រក្សាជំហរមិនលម្អៀង»លើបញ្ហាអន្តរជាតិនិងតំបន់ រួមទាំងវិបត្តិអ៊ុយក្រែន នេះបើតាមអ្នកនាំពាក្យក្រសួងការបរទេសចិនបានបញ្ជាក់កាលពីថ្ងៃសុក្រ។
លោកវ៉ាង វិនពីន បាននិយាយក្នុងសន្និសីទកាសែតមួយកាលពីថ្ងៃ១៧មីនាថា «ជំហររបស់ចិនសង្ខេបមកនៅត្រឹមមួយប្រយោគគឺ៖ ទទូចសុំសន្តិភាពនិងជំរុញការពិភាក្សា»។
ដំណើរទស្សនកិច្ចរបស់ស៊ីធ្វើឡើងនៅពេលរដ្ឋាភិបាលទីក្រុងប៉េកាំងព្យាយាមដាក់ខ្លួនឯងជាអ្នកដឹកនាំសម្របសម្រួលសន្តិភាពបែបអព្យាក្រិតមួយនៅក្នុងសង្គ្រាមអ៊ុយក្រែន និងកំពុងតស៊ូនឹងការធ្វើអោយមានតុល្យភាពជាមួយនឹងទំនាក់ទំនង«គ្មានព្រំដែន»ជាមួយរដ្ឋាភិបាលទីក្រុងមូស្គូ ហើយនឹងទំនាក់ទំនងមិនល្អជាមួយលោកខាងលិច។
លោកវ៉ាង បាននិយាយថា ចិនតែងតែប្រកាន់«ឥរិយាបទបែបប្រយ័ត្នប្រយែងនិងទទួលខុសត្រូវ»និងគ្រប់គ្រងការនាំចេញទំនិញយោធាព្រមទាំងទំនិញប្រើបានពីរផ្លូវ ដោយស្របតាមច្បាប់។កិច្ចសហការសេដ្ឋកិច្ចនិងពាណិជ្ជកម្មរវាងចិននិងរុស្ស៊ីធ្វើឡើងដោយ«ចំហនិងតម្លាភាព»។
ដោយគ្មាននិយាយចំឈ្មោះប្រទេសណាមួយ លោកវ៉ាង ក៏ទំនងជារិះគន់អាម៉េរិក ដោយលោកថាចិនប្រឆាំង«ទណ្ឌកម្មឯតោភាគីនិងយុត្តាធិការដៃវែង ដោយគ្មានផ្អែកលើច្បាប់អន្តរជាតិឬបានទទួលការអនុញ្ញាតពីក្រុមប្រឹក្សាសន្តិសុខអង្គការសហប្រជាជាតិ»។លោកក៏បានចោទប្រកាន់ប្រទេសមួយចំនួនចំពោះការអនុវត្តស្តង់ដាទ្វេលើការផ្គត់ផ្គង់សព្វាវុធនិងថាពួកគេ«កំពុងចាក់ប្រេងលើភ្លើង»លើបញ្ហាអ៊ុយក្រែន។
អ្នកនាំពាក្យក្រសួងការបរទេសចិន វ៉ាង វិនពីន និយាយក្នុងសន្និសីទកាសែតមួយនៅក្រុងប៉េកាំង
ជុំវិញបំណងរបស់ចិននេះដែរ កាលពីថ្ងៃសុក្ររដ្ឋាភិបាលរបស់លោកចូ បៃដិន បានច្រានចោលការអំពាវនាវរបស់ចិនអោយមានការផ្អាកការប្រយុទ្ធគ្នាមួយនៅអ៊ុយក្រែន ដោយថាវានឹងនាំដលការកាន់កាប់ស្របច្បាប់របស់រុស្ស៊ីនៅក្នុងតំបន់ដែលខ្លួនបានវាយយកនៅក្នុងប្រជាជាតិអធិបតេយ្យមួយ។
អ្នកនាំពាក្យក្រុមប្រឹក្សាសន្តិសុខជាតិប្រចាំសេតវិមានលោក ចន ឃឺប៊ី បាននិយាយថា សំណើរបស់រដ្ឋាភិបាលទីក្រុងប៉េកាំងជាការអនុម័តយល់ព្រមលើការច្បាំងដណ្តើមទឹកដីរបស់កងកម្លាំងរុស្ស៊ីហើយនឹង«ទទួលស្គាល់ទឹកដីដែលរុស្ស៊ីវាយកាន់កាប់»។
«រុស្ស៊ីនឹងប្រើការផ្អាកសង្គ្រាមនេះដើម្បីពង្រឹងទីតាំងរបស់គេបន្ថែមនៅអ៊ុយក្រែន ហើយកសាង បំពាក់និងប្រមូលផ្តុំកងកម្លាំងរបស់គេជាថ្មី ដើម្បីចាប់ផ្តើមការវាយប្រហារជាថ្មីលើអ៊ុយក្រែននៅពេលណាមួយដែលពួកគេចង់។យើងមិនជឿថានេះជាជំហានទៅមុខឆ្ពោះទៅកាន់សន្តិភាពសកលពិតប្រាកដមួយ»ទេ។
សេតវិមានព្រមានថា ដំណើរទស្សនកិច្ចរបស់ប្រធានាធិបតីចិននៅរុស្ស៊ីនៅសប្តាហ៍ក្រោយនឹងជួយលើកទឹកចិត្តដល់ប្រធានាធិបតីរុស្ស៊ី ដែលកំពុងបាក់មុខដោយសារតុលាការឧក្រិដ្ឋអន្តរជាតិកំពុងចេញដីកាចាប់ខ្លួន៕
អ្នកនាំពាក្យក្រុមប្រឹក្សាសន្តិសុខជាតិប្រចាំសេតវិមានលោក ចន ឃឺប៊ី