ប្រែសម្រួល : កញ្ញាដាលីស (ដេល្លីម៉េល) ៖ តុលាការព្រហ្មទណ្ឌអន្តរជាតិ (ICC) បានចេញដីកាចាប់ខ្លួនលោក វ្ល៉ាឌីមៀ ពូទីនចំពេលមានការចោទប្រកាន់ពីបទឧក្រិដ្ឋកម្មសង្គ្រាមក្នុងអំឡុងពេលការលុកលុយរបស់កងកម្លាំងរបស់លោកលើអ៊ុយក្រែន។
លោក ការីម ខាន់ (Karim Khan) ជាប្រធានរដ្ឋអាជ្ញារបស់ ICC បាននិយាយកាលពីថ្ងៃសុក្រទី១៧មីនាថាកុមាររាប់ពាន់នាក់ត្រូវបាននាំយកដោយខុសច្បាប់ពីមណ្ឌលកុមារកំព្រានិងផ្ទះកុមារនៅក្នុងតំបន់កាន់កាប់នៃប្រទេសអ៊ុយក្រែន ហើយត្រូវបានដឹកជញ្ជូនទៅកាន់ប្រទេសរុស្ស៊ីដើម្បីប្រគល់ជូនគ្រួសារថ្មី។
លោកពូទីនបានក្លាយជាប្រធានាធិបតីទី៣ ប៉ុណ្ណោះដែលត្រូវបានចេញដីកាចាប់ខ្លួនដោយ ICC បន្ទាប់ពីលោក អូម៉ា អាល់បាសៀ (Omar al-Bashir) របស់ស៊ូដង់ និងលោក ម៉ួអាម៉ា ហ្គាដាហ្វ៊ី (Muammar Gaddafi) របស់លីប៊ី និងជាមេដឹកនាំទីមួយនៃសមាជិកអចិន្ត្រៃយ៍មួយក្នុងចំណោមសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខអ.ស.ប។
ឥឡូវនេះ ដីការបស់ ICCតម្រូវឱ្យរដ្ឋសមាជិកទាំង ១២៣ របស់ខ្លួនចាប់ខ្លួនប្រធានាធិបតីរុស្ស៊ី ហើយផ្ទេរគាត់ទៅទីក្រុងឡាអេដើម្បីកាត់ទោស ប្រសិនបើគាត់ជាន់លើទឹកដីរបស់ពួកគេ។
ប៉ុន្តែវិមានក្រឹមឡាំងបានពន្លះការសម្រេចរបស់តុលាការថា “គួរឱ្យភ្ញាក់ផ្អើលនិងមិនអាចទទួលយកបាន” ដោយជំនួសមកវិញបានទទូចថា ការសម្រេចចិត្តណាមួយរបស់ ICC គឺ “ទុកជាមោឃៈ” ទាក់ទងនឹងរុស្ស៊ី ដោយសាររដ្ឋាភិបាលក្រុងមូស្គូមិនទទួលស្គាល់យុត្តាធិការរបស់តុលាការ។
ជំហររបស់រុស្ស៊ីបានចោទជាមន្ទិលដោយចៀសមិនរួចអំពីរបៀបដែលលោកពូទីនអាចត្រូវបានចាប់ខ្លួន ដោយលទ្ធភាពនៃការកាត់ទោសគឺស្ថិតលើផ្លូវវែងឆ្ងាយណាស់។
រដ្ឋាភិបាលក្រុងមូស្គូមិនទទួលស្គាល់យុត្តាធិការរបស់តុលាការ ICCទេ ហើយមិនធ្វើបត្យាប័នជនជាតិរបស់ខ្លួននោះឡើយជាជំហរមួយដែលបានបញ្ជាក់ជាថ្មីកាលពីថ្ងៃសុក្រដោយអ្នកនាំពាក្យក្រសួងការបរទេសរុស្ស៊ីលោកស្រី ម៉ារៀ ហ្សាខារ៉ូវ៉ា (Maria Zakharova) ក្នុងប្រតិកម្មដំបូងចំពោះដីកានេះ។
លោកស្រីបាននិយាយថា “ការសម្រេចចិត្តរបស់តុលាការព្រហ្មទណ្ឌអន្តរជាតិមិនមានអត្ថន័យសម្រាប់ប្រទេសរបស់យើងទេ រួមទាំងតាមទស្សនៈផ្លូវច្បាប់”។
សូម្បីតែប្រធាន ICCលោក ព័រ ហូហ្វមែនស្គី (Piotr Hofmanski) បានសារភាពថា ខណៈចៅក្រមរបស់តុលាការបានចេញដីកា វានឹងអាស្រ័យលើសហគមន៍អន្តរជាតិដើម្បីអនុវត្តដីកា។
នៅក្រោមប្រព័ន្ធបញ្ញត្តិទីក្រុងរ៉ូមនៃយុត្តិធម៌ព្រហ្មទណ្ឌអន្តរជាតិ តុលាការមិនមានកម្លាំងប៉ូលិសផ្ទាល់ខ្លួនដើម្បីអនុវត្តដីកាទេ។
លើសពីនេះ បញ្ញត្តិ ដែល ICCទាញសិទ្ធិអំណាចរបស់ខ្លួនចេញពីវានោះ រារាំងការកាត់ក្តីកំបាំងមុខ ដែលមានន័យថា លោកពូទីននឹងត្រូវនាំខ្លួនកាត់ទោសដោយផ្ទាល់។
ប៉ុន្តែខណៈលទ្ធភាពនៃការចាប់ខ្លួនលោកពូទីននៅតែមិនទំនងកើតឡើងនោះ វាមិនមែនថាមិនអាចទៅរួចទាំងស្រុងនោះទេ។
ការរំលឹកជាប្រព័ន្ធនៃដីកាចាប់ខ្លួនរបស់ ICC ត្រូវបានបញ្ជូនទៅប្រទេសសមាជិកទាំងអស់ នៅពេលណាដែលជនសង្ស័យធ្វើដំណើរទៅក្រៅប្រទេស។
ប្រសិនបើប្រទេសមួយមិនគោរពតាមសំណើសុំសហការ ប្រទេសនោះអាចនឹងត្រូវនាំខ្លួនឡើងតុលាការ។
លោកពូទីននឹងមិនត្រូវបានចាប់ខ្លួននៅក្នុងឬធ្វើបត្យាប័នពីទឹកដីរុស្ស៊ីនោះទេ ប៉ុន្តែបានធ្វើដំណើរទៅក្រៅប្រទេសចាប់តាំងពីការផ្ទុះសង្គ្រាមកាលពីខែកុម្ភៈឆ្នាំមុន។
ក្នុងខែមិថុនា លោកបានធ្វើដំណើរទៅប្រទេសតាជីគីស្ថាននិងតួកមេនីស្ថាន មុនពេលទៅទស្សនកិច្ចប្រទេសអ៊ីរ៉ង់នៅខែបន្ទាប់។
ពូទីនក៏បានធ្វើដំណើរទៅអ៊ូសបេគីស្ថានក្នុងខែកញ្ញា កាហ្សាក់ស្ថានក្នុងខែតុលា និង អាមេនីក្នុងខែវិច្ឆិកា ក៏ដូចជា គៀគីស្ថាន និង បេឡារូស ក្នុងខែធ្នូផងដែរ៕
ការចាប់ខ្លួនពូទីនគឺអាស្រ័យលើសហគមន៍អន្តរជាតិចង់ចាប់ឬមិនចង់