ប្រែសម្រួល : កញ្ញាដាលីស (ដេល្លីម៉េល) ៖ ក្រសួងការពារជាតិរុស្ស៊ីបាននិយាយថា យន្តហោះចម្បាំងរុស្ស៊ី Su-35 មួយគ្រឿងបានហោះពីលើសមុទ្របាល់ទិកកាលពីថ្ងៃចន្ទទី២០មីនាបន្ទាប់ពីយន្តហោះទម្លាក់គ្រាប់បែកយុទ្ធសាស្ត្ររបស់អាម៉េរិកពីរគ្រឿងបានហោះក្នុងទិសដៅនៃព្រំដែនរុស្ស៊ី ប៉ុន្តែវាបានត្រឡប់ទៅមូលដ្ឋានវិញ បន្ទាប់ពីពួកវាកាច់ចង្កូតចេញឆ្ងាយ។
ហេតុការណ៍នេះបានកើតឡើងបន្ទាប់ពីមានការធ្លាក់ដ្រូនអាម៉េរិកកាលពីថ្ងៃទី ១៤ ខែមីនាចូលទៅក្នុងសមុទ្រខ្មៅក្រោយពីវាត្រូវបានស្ទាក់ចាប់ដោយយន្តហោះរុស្ស៊ីនៅក្នុងអ្វីដែលជាការពើបប្រទះគ្នាដោយផ្ទាល់រវាងរុស្ស៊ីនិងសហរដ្ឋអាម៉េរិកជាលើកដំបូងចាប់តាំងពីរុស្ស៊ីបានឈ្លានពានអ៊ុយក្រែនកាលពីខែកុម្ភៈឆ្នាំមុន។
ក្រសួងបាននិយាយនៅលើកម្មវិធីផ្ញើសារ Telegramថា “កាលពីថ្ងៃទី ២០ ខែមីនា គ្រឿងបរិក្ខាររ៉ាដានៃកងកម្លាំងការពារដែនអាកាសនៃយោធភូមិភាគយោធាខាងលិចដែលបំពេញបេសកកម្មនៅលើសមុទ្របាល់ទិក បានរកឃើញគោលដៅអាកាសចំនួនពីរកំពុងហោះក្នុងទិសដៅនៃព្រំដែនរដ្ឋសហព័ន្ធរុស្ស៊ី”។
ក្រសួងបាននិយាយថា គោលដៅនោះគឺជាយន្តហោះទម្លាក់គ្រាប់បែកយុទ្ធសាស្ត្រ B52Hរបស់កងទ័ពអាកាសអាម៉េរិក។
ក្រសួងបាននិយាយថា យន្តហោះចម្បាំង Su-35 បានហោះឡើងលើអាកាសដើម្បីការពារការរំលោភព្រំដែន ហើយបានបន្ថែមថា”បន្ទាប់ពីយន្តហោះយោធាបរទេសបានផ្លាស់ប្តូរទិសឆ្ងាយពីព្រំដែនរដ្ឋសហព័ន្ធរុស្ស៊ី យន្តហោះចម្បាំងរុស្ស៊ីបានត្រឡប់ទៅអាកាសយានដ្ឋានមូលដ្ឋានរបស់ខ្លួនវិញ”។
ក្រសួងបាននិយាយថា ការហោះហើររបស់យន្តហោះ Su-35 គឺស្របនឹងច្បាប់អន្តរជាតិស្តីពីការប្រើប្រាស់ដែនអាកាស និងថា”គ្មានការរំលោភលើព្រំដែនរដ្ឋនៃសហព័ន្ធរុស្ស៊ីត្រូវបានអនុញ្ញាតនោះឡើយ”៕
Su-35ស្ទាក់ផ្លូវយន្តហោះទម្លាក់គ្រាប់បែក B-52នៅលើសមុទ្របាល់ទិច