ដោយៈ ប.ខុន / ភ្នំពេញៈ រដ្ឋបាលស្រុកក្រូចឆ្មារ ខេត្តត្បូងឃ្មុំ ជូនដំណឹងស្តីការលើក ទឹកចិត្ត ដល់សាធារណជនទាំងអស់ ដែលចូលរួមផ្តល់ពត័ត៌មាន ពីសកម្មភាពរបស់ ជនល្មើសកំពុងឈូសឆាយ ទន្ទ្រានដីព្រៃលិចទឹក ជនល្មើសកំពុងឆក់ត្រី នៅតាមបឹងបួរ ព្រែកប្រឡាយ ទន្លេ ស្ទឹងនានា ជនល្មើសដាក់លបស្បៃមុង ចាប់កូនត្រី ជនល្មើស កំពុងឆក់ត្រី នៅក្នុងភូមិសាស្ត្រស្រុកក្រូចឆ្មារ មានផ្ទៃដីព្រៃលិចទឹក ចំនួន ១២.០០០ ហិកតា ដែលក្នុងនេះ មានស្ទឹង បឹង ព្រែក អូរ និងត្រពាំង សរុបចំនួន ១១២ កន្លែង។
រដ្ឋបាលស្រុកក្រូចឆ្មារ ខេត្តត្បូងឃ្មុំ បានជូនដំណឹងជាសាធារណៈ កាលពីថ្ងៃទី១៨ ខែមីនា ឆ្នាំ២០២៣ថាៈ ស្រុកក្រូចឆ្មារ មានសក្តានុពលក្នុងវិស័យជលផល រួមមានដីព្រៃលិចទឹក ចំនួន ១២.០០០ ហិកតា ដែលក្នុងនេះ មានស្ទឹង បឹង ព្រែក អូរ និង ត្រពាំងជាច្រើនសរុបចំនួន ១១២ កន្លែង ដែលជាប្រភពទឹក សម្រាប់វិស័យកសិកម្ម និងជាជម្រុកត្រី សម្រាប់ការនេសាទរបស់ប្រជាជនទូទៅ។ធនធានធម្មជាតិទាំងអស់ នេះ បានជួយលើកកម្ពស់ជីវភាពប្រជាពលរដ្ឋទូទៅ បានមួយកម្រិតធំ ពិសេសត្រីសាច់ បានផ្តល់ជាតិប្រូតិអុីនខ្ពស់ ក្នុងការថែបំប៉នសុខភាព ប៉ុន្តែការបំផ្លិចបំផ្លាញដោយមនុស្ស មានការឈូសឆាយទន្ទ្រានដីព្រៃលិចទឹក យកដីធ្វើកម្មសិទ្ធិការនេសាទខុសច្បាប់ គ្រប់ប្រភេទ ដូចជាដាក់លប ស្បៃមុង ចាប់កូនត្រី ការឆក់ត្រីការនេសាទមងអួន មានក្រឡាតូចជាង ១,៥សង់ទីម៉ែត្រ ការចាប់ត្រីមេពូជ និងការបំពុលត្រី ដែលអំពើ ទាំងនេះ បានបំផ្លាញធនធានធម្មជាតិ ដល់ឫសគល់។
នៅក្នុងសេចក្តីជូនដំណឹង បានសរសេរទៀតថាៈ ទីតាំងដែលត្រូវបានកំណត់ ថែរក្សា ការពារ បានឯកភាពគ្នា រវាងប្រជាពលរដ្ឋ នៅតាមមូលដ្ឋាន និងអាជ្ញាធរមូលដ្ឋាន នៅ ក្នុងឆ្នាំ២០២០ ទោះអាជ្ញាធរ បានដាក់កម្លាំងយាមការពារយ៉ាងណា ក៏ការបំផ្លិចបំផ្លាញព្រៃលិចទឹក ការនេសាទខុសច្បាប់ នៅតែកើតមានជាបន្តបន្ទាប់ ហើយអាជ្ញាធរ ក៏បានមានវិធានការស្រាវជ្រាវ ជាបន្តបន្ទាប់ រកមុខជនពាក់ព័ន្ធបទល្មើស ដើម្បីមាន វិធានការរដ្ឋបាល ហើយចុងក្រោយនេះ រដ្ឋបាលស្រុកក្រូចឆ្មារ បានប្រើវិធានការ ឱ្យមានមហាជនចូលរួមតាម រយៈការលើកទឹកចិត្ត មានប្រាក់រង្វាន់ ចាប់ពី ៤ម៉ឺនរៀល រហូតដល់ ២០ ម៉ឺនរៀល សម្រាប់មួយករណី ថតបានរូបភាពជាវិដេអូរច្បាស់ៗ ជនល្មើសកំពុងធ្វើសកម្មភាព ឈូសឆាយព្រៃ ឬឆក់ត្រី ក្នុងរយៈពេលពី ៣ ដល់ ៥ នាទី៕/V-PC
