ដោយៈ គង់ហេង/ កំពង់ចាម៖ អគ្គិភ័យមួយ ដែលផ្តើមពីការឆ្លងចរន្តអគ្គិសនី បានបណ្តាលឱ្យឆាបឆេះអស់លំឋានរបស់ប្រជាពលរដ្ឋចំនួន បីខ្នង នៅភូមិថ្មី «ខ» ឃុំរកាគយ ស្រុកកងមាស នៅព្រឹកថ្ងៃទី ២១ មីនា នេះ។ ប៉ុន្តែករណីអគ្គិភ័យនេះ មិនប៉ះពាល់ដល់អាយុជីវិតមនុស្សនោះទេ។
ប្រភពព័ត៌មានពីមន្រ្តីនគរបាលស្រុកកងមាស បានឱ្យដឹងថាៈ លំនៅឋានរងគ្រោះ ទាំងបី មានៈ ទី១. ផ្ទះឈើប្រក់ក្បឿងទំហំ ៦ ម៉ែត្រគុណនឹង ១២ ម៉ែត្រ ឆេះអស់ ទាំងស្រុង ជាកម្មសិទ្ធិរបស់បុរសឈ្មោះ ជា ឈាង អាយុ ៨៣ ឆ្នាំ, ទី២.ផ្ទះឈើប្រក់ ក្បឿង ទំហំ៨ម៉ែត្រ គុណនឹង ១៤ ម៉ែត្រ ឆេះអស់ ៨០ ភាគរយ ជាកម្មសិទ្ធិរបស់ស្រ្តី ឈ្មោះ ស្រ៊ុន វណ្ណី អាយុ ៧០ ឆ្នាំ និងទី៣.ផ្ទះថ្មីប្រក់ស័ង្កសីទំហំ ៨ ម៉ែត្រ គុណនឹង ១២ ម៉ែត្រ ឆេះអស់ ៥ ភាគរយ ជាកម្មសិទ្ធិរបស់បុរសឈ្មោះ ឈួន សំអ៊ី អាយុ ២៧ ឆ្នាំ ។
ប្រភពព័ត៌មាន បានបន្តថាៈ ភ្លើងឆេះដែលផ្តើមពីការឆ្លងចរន្តអគ្គិសនីនោះ បានចាប់ ពីម៉ោងជាង ៨ រហូតដល់ម៉ោងជាង ១០ ព្រឹក ទើបរលត់ទៅវិញនោះ ដោយការបាញ់ ទឹកពន្លត់ អស់ចំនួន ប្រាំបី រថយន្ត របស់ស្នងការដ្ឋាននគបាលខេត្តកំពង់ចាម៕/V-PC
