ប្រែសម្រួលៈបំណង(VNExpress)៖យោធាចិនបាននិយាយថាខ្លួនបានព្រមានអោយនាវាចម្បាំងអាម៉េរិកមួយចាកចេញពីដែនទឹកនៅក្នុងសមុទ្រចិនខាងត្បូងកាលពីថ្ងៃព្រហស្បតិ៍ទី២៣មីនា តែត្រូវយោធាអាម៉េរិកបដិសេធថាជាការអះអាងមិនពិត។
សូមបញ្ជាក់ថា ចិនអះអាងអធិបតេយ្យភាពលើសមុទ្រចិនធំល្វឹងល្វើយ ដោយជាន់ជាមួយការអះអាងរបស់ប្រទេសក្បែរខាងមួយចំនួននិងបានកសាងទីតាំងឈរជើងរឹងមាំជាច្រើននៅក្នុងផ្លូវទឹកដ៏សំខាន់នេះ។
បញ្ជាកាយោធភូមិភាគខាងត្បូងរបស់កងទ័ពប្រជាជនចិន(PLA)បាននិយាយថា នាវាពិឃាតបំពាក់កាំជ្រួចបញ្ជានាំផ្លូវ USS Miliusកាលពីថ្ងៃព្រហស្បតិ៍បានចូលក្នុងដែនទឹកម្តុំប្រជុំកោះប៉ារ៉ាសែល។
កងកម្លាំងសមុទ្រនិងទ័ពអាកាសរបស់PLAបានតាមដាននាវាស្របតាមច្បាប់និងបានព្រមានអោយវាចាកចេញ នេះបើតាមអ្នកនាំពាក្យបញ្ជាកាយោធភូមិភាគលោក ទៀន ជុនលី(Tian Junli)។
លោកបាននិយាយថា នាវានេះបានជ្រៀតចូលក្នុងដែនទឹកចិនដោយខុសច្បាប់…ដោយគ្មានសុំការអនុញ្ញាតពីរដ្ឋាភិបាលចិន ធ្វើអោយប៉ះពាល់សន្តិភាពនិងស្ថិរភាពក្នុងតំបន់។
ទោះជាយ៉ាងណា នៅថ្ងៃ២៣មីនាននេះ អ្នកនាំពាក្យបញ្ជាការតំបន់ឥណ្ឌូប៉ាស៊ីហ្វិកអាម៉េរិកបានចេញមកបដិសេធភ្លាមថា សេចក្តីរាយការណ៍របស់យោធាចិនជាការមិនពិត គឺ«នាវាUSS Miliusធ្វើប្រតិបត្តិការធម្មតានៅក្នុងសមុទ្រចិនខាងត្បូងនិងមិនត្រូវបានបណ្តេញចេញ»ទេ។
អ្នកនាំពាក្យបានបន្តថា«អាម៉េរិកនៅបន្តបើកយន្តហោះ បើកនាវានិងធ្វើប្រតិបត្តិការនៅទីណាដែលច្បាប់អន្តរជាតិអនុញ្ញាត»៕
នាវាពិឃាតបំពាក់កាំជ្រួចបញ្ជានាំផ្លូវ USS Milius