ប្រែសម្រួល : កញ្ញាដាលីស (ដេល្លីម៉េល) ៖ មន្ទីរបញ្ចកោណបាននិយាយថា អ្នកម៉ៅការអាម៉េរិកម្នាក់ត្រូវបានសម្លាប់ ហើយសមាជិកកងទ័ពអាម៉េរិក ៥ នាក់ និងអ្នកម៉ៅកាអាម៉េរិកម្នាក់ទៀតបានរងរបួសនៅពេលដែលដ្រូនសង្ស័យជារបស់អ៊ីរ៉ង់បានវាយប្រហារលើមូលដ្ឋានមួយរបស់សម្ពន្ធចម្រុះនៅភាគឦសានប្រទេសស៊ីរីកាលពីថ្ងៃព្រហស្បតិ៍ទី២៣មីនា។
នៅក្នុងសេចក្តីថ្លែងការណ៍មួយដែលចេញផ្សាយកាលពីល្ងាចថ្ងៃព្រហស្បតិ៍ រដ្ឋមន្ត្រីការពារជាតិលោក ឡយ អូស្ទីន បាននិយាយថា កងកម្លាំងបញ្ជាការកណ្តាលរបស់សហរដ្ឋអាម៉េរិកបានសងសឹកជាមួយនឹង “ការវាយប្រហារតាមអាកាសយ៉ាងជាក់លាក់” ប្រឆាំងនឹងទីតាំងនានានៅស៊ីរីភាគខាងកើតដែលប្រើប្រាស់ដោយក្រុមដែលមានទំនាក់ទំនងជាមួយកងឆ្មាំបដិវត្តន៍អ៊ីរ៉ង់។ ក្រសួងការពារជាតិបាននិយាយថា សហគមន៍ស៊ើបការណ៍សម្ងាត់បានកំណត់ថា ដ្រូនមានប្រភពពីអ៊ីរ៉ង់។
លោកអូស្ទីនបាននិយាយថា “ការវាយប្រហារតាមអាកាសត្រូវបានធ្វើឡើងក្នុងការឆ្លើយតបទៅនឹងការវាយប្រហារនាពេលបច្ចុប្បន្ននេះក៏ដូចជាការវាយប្រហារថ្មីៗជាបន្តបន្ទាប់ប្រឆាំងនឹងកងកម្លាំងចម្រុះនៅក្នុងប្រទេសស៊ីរី” ដោយក្រុមដែលមានទំនាក់ទំនងជាមួយកងឆ្មាំបដិវត្តន៍អ៊ីរ៉ង់។
អស់ពេញមួយយប់ វីដេអូនៅលើបណ្តាញសង្គមបានបង្ហាញពីការផ្ទុះនៅក្នុងខេត្តឌាអេសហ្ស័រ (Deir Ez-Zor) របស់ស៊ីរី ជាខេត្តយុទ្ធសាស្ត្រមួយជាប់ព្រំដែនអ៊ីរ៉ាក់ និងមានអណ្តូងប្រេងជាច្រើន។
ក្រុមជីវពលដែលគាំទ្រដោយអ៊ីរ៉ង់និងកងកម្លាំងស៊ីរីបានគ្រប់គ្រងតំបន់នេះ ដែលឃើញការវាយប្រហារតាមអាកាសដោយអ៊ីស្រាអែលក្នុងប៉ុន្មានខែថ្មីៗនេះ ដោយផ្តោតគោលដៅលើផ្លូវផ្គត់ផ្គង់របស់អ៊ីរ៉ង់។
កងឆ្មាំបដិវត្តន៍ប៉ារ៉ាអ៊ីរ៉ង់ ដែលឆ្លើយតបតែតាមបញ្ជារបស់មេដឹកនាំកំពូលលោក អាយ៉ាតូឡា អាលី ខាមេនី (Ayatollah Ali Khamenei)ត្រូវគេសង្ស័យថាបានធ្វើការវាយប្រហារដោយដ្រូនផ្ទុកគ្រាប់បែកនៅទូទាំងតំបន់មជ្ឈិមបូព៌ា។ ក្នុងរយៈពេលប៉ុន្មានខែថ្មីៗនេះរុស្ស៊ីបានចាប់ផ្តើមប្រើប្រាស់ដ្រូនរបស់អ៊ីរ៉ង់ក្នុងការវាយប្រហាររបស់ខ្លួនលើទីតាំងនានាទូទាំងប្រទេសអ៊ុយក្រែនដែលជាផ្នែកនៃសង្គ្រាមរបស់ខ្លួនលើរដ្ឋាភិបាលក្រុងគៀវ។ អ៊ីរ៉ង់បានបដិសេធមិនទទួលខុសត្រូវចំពោះការវាយប្រហារទាំងនោះទោះបីជាប្រទេសលោកខាងលិចនិងអ្នកជំនាញបានភ្ជាប់សមាសធាតុនៅក្នុងដ្រូនត្រឡប់ទៅរដ្ឋាភិបាលក្រុងតេអេរ៉ង់ក៏ដោយ៕
កងឆ្មាំបដិវត្តន៍ប៉ារ៉ាអ៊ីរ៉ង់ត្រូវគេសង្ស័យថាបានធ្វើការវាយប្រហារដោយដ្រូនផ្ទុកគ្រាប់បែកនៅទូទាំងតំបន់មជ្ឈិមបូព៌ា