ប្រែសម្រួល : កញ្ញាដាលីស (អេស៊ាវ័ន) ៖ បុរសជនជាតិថៃម្នាក់បានធ្វើដំណើរចម្ងាយប្រហែល ៣០០ គីឡូម៉ែត្រពីទីក្រុងបាងកកទៅកាន់ទីក្រុងកូរ៉ាត់ (Korat) ជាមួយនឹងសត្វឆ្មាចំនួន ១១ ក្បាលនៅលើរឺម៉កកង់បី ដោយទាក់ទាញការសរសើរ និង “ការចូលចិត្ត” ពីអ្នកស្រឡាញ់ឆ្មាតាមអ៊ីនធឺណិត។
លោក ឈូវង់ ថេបកោះ (Choowong Thepkoh)អាយុ ៦៥ឆ្នាំដែលលក់គ្រឿងលម្អនិងសិប្បកម្មផ្សេងៗទៀតនៅផ្សារលក់វត្ថុកែច្នៃក្នុងទីក្រុងបាងកកបានធ្វើដំណើរទៅកាន់ទីក្រុងកូរ៉ាត់ដើម្បីលក់ទំនិញរបស់គាត់នៅផ្សារលក់វត្ថុកែច្នៃប្រចាំឆ្នាំដ៏ពេញនិយមមួយ។
លោកឈូវង់ក៏មកពីទីក្រុងកូរ៉ាត់ដែរ ហើយចង់នាំ “កូនៗ” ឬឆ្មារបស់គាត់ទៅលេងស្រុកកំណើតរបស់គាត់ដែរ។
ទំព័រហ្វេសប៊ុកឈ្មោះ Kingdom of Tigers ដែលឧទ្ទិសដល់អ្នកស្រឡាញ់សត្វឆ្មានិងអ្នកតាមដានដែលស្គាល់លោកឈូវង់ថាជាអ្នកគាំទ្រឆ្មាដ៏ឧត្តុង្គឧត្តមម្នាក់នោះបានរៃអង្គាសថវិកាដើម្បីទិញម៉ូតូច្នៃកង់បីសម្រាប់បុរសនេះដើម្បីឱ្យគាត់អាចធ្វើដំណើរជាមួយមិត្តភក្តិឆ្មារបស់គាត់បាន។
កាលពីថ្ងៃសុក្រទី ១៧ ខែមីនា ទំព័រនេះក៏បានជំរុញអ្នកតាមដានរបស់ខ្លួនឱ្យបរិច្ចាគអាហារឆ្មាដល់លោកឈូវង់ផងដែរ ខណៈគាត់ហៀបនឹងធ្វើដំណើរទៅទីក្រុងកូរ៉ាត់។
នៅក្នុងបទសម្ភាសន៍មួយ លោកឈូវង់បានលាតត្រដាងថាគាត់បានចាកចេញពីស្រុកកំណើតរបស់គាត់កាលពី ២៦ ឆ្នាំមុន ហើយបានធ្វើការនៅផ្សារលក់វត្ថុកែច្នៃក្នុង និងជុំវិញទីក្រុងបាងកក ដើម្បីចិញ្ចឹមខ្លួនគាត់ និងឆ្មាដែលគាត់រើសយកមកចិញ្ចឹមជាច្រើនឆ្នាំមកនេះ។
លោកបាននិយាយថា ឆ្មាទាំងអស់របស់គាត់គឺគ្មានម្ចាស់ ហើយគាត់តែងតែនាំពួកវាតាមគាត់គ្រប់ទីកន្លែងដែលគាត់បានទៅ៕
លោកឈូវង់និងឆ្មា១១ក្បាលធ្វើដំណើរ៣០០គីឡូម៉ែត្រពីបាងកកទៅកូរ៉ាត់