ប្រែសម្រួល : កញ្ញាដាលីស (ដេល្លីម៉េល) ៖ អតីតសិស្សប្រដាប់អាវុធម្នាក់បានសម្លាប់កុមារបីនាក់និងបុគ្គលិកសិក្សាបីនាក់នៅក្នុងអ្វីដែលមើលទៅដូចជាការវាយប្រហារដែលបានគ្រោងទុកដោយប្រុងប្រយ័ត្ននៅសាលាបឋមសិក្សាឯកជនមួយក្នុងទីក្រុងណាសវីល (Nashville)រដ្ឋថិនណេស៊ី កាលពីថ្ងៃចន្ទទី២៧មីនា មុនពេលត្រូវប៉ូលិសបាញ់ស្លាប់។
លោក ចន ដ្រេក (John Drake) មេប៉ូលិសក្រុង បានកំណត់ជនសង្ស័យឈ្មោះ អូដ្រេ ហ៊ែល (Audrey Hale) ភេទស្រីអាយុ ២៨ ឆ្នាំដែលក្រោយមកក្រុមមន្ត្រីនិយាយថាត្រូវបានកំណត់អត្តសញ្ញាណថាជាជនកែភេទ។
ជនសង្ស័យឈ្មោះ អូដ្រេ ហ៊ែល ភេទស្រីអាយុ ២៨ ឆ្នាំដែលក្រោយមកក្រុមមន្ត្រីនិយាយថាត្រូវបានកំណត់អត្តសញ្ញាណថាជាជនកែភេទ
មេប៉ូលិសបានប្រាប់អ្នកយកព័ត៌មានបន្ទាប់ពីការផ្ទុះអំពើហិង្សាដោយកាំភ្លើងចុងក្រោយដែលអង្រួនសហរដ្ឋអាម៉េរិកយ៉ាងដូច្នេះថា ហ៊ែលបានគូសវាសផែនទីសាលាបន្សល់នូវលិខិតបញ្ជាក់ចេតនាបាញ់ប្រហារ និង បានត្រៀមខ្លួនជាស្រេចដើម្បីតតាំងជាមួយសមត្ថកិច្ច។
យោងតាមប៉ូលិស ហ៊ែល ដែលប្រដាប់ដោយកាំភ្លើងវែងពីរដើមនិងកាំភ្លើងខ្លីមួយដើម បានចូលទៅក្នុងសាលា Christian Covenant ពីច្រកចូលចំហៀងបើកការបាញ់ប្រហារតាមច្រកទ្វារជាច្រើនគ្រាប់ ខណៈពេលកំពុងដើរឆ្លងកាត់អគារ។
ប៉ូលិសនិយាយថា ក្រុមមន្ត្រីបានស្ថិតនៅកន្លែងកើតហេតុក្នុងពេលប្រហែល ១៥ នាទីបន្ទាប់ពីទទួលការតេទូរស័ព្ទបន្ទាន់លើកដំបូងនៅម៉ោងប្រហែល ១០៖០០ ព្រឹកដោយបានបាញ់តដៃជាមួយខ្មាន់កាំភ្លើង មុនពេលរូបគេត្រូវបានបាញ់ស្លាប់។
ប៉ូលិសបានកំណត់អត្តសញ្ញាណជនរងគ្រោះទាំងប្រាំមួយនាក់ ដោយនិយាយថា ក្មេងម្នាក់ក្នុងចំណោមបីនាក់មានអាយុប្រាំបីឆ្នាំ និងពីរនាក់ទៀតអាយុប្រាំបួនឆ្នាំចំណែកមនុស្សពេញវ័យដែលស្លាប់មានអាយុពី ៦០ ទៅ ៦១ ឆ្នាំ។
រូបភាពទូរទស្សន៍បានបង្ហាញក្មេងៗកាន់ដៃគ្នាពេលពួកគេចាកចេញពីសាលា ហើយរូបថតខ្លោចចិត្តមួយបានបង្ហាញក្មេងម្នាក់យំតាមបង្អួចឡានក្រុងពណ៌លឿងរបស់នាងខណៈវាចាកចេញពីកន្លែងកើតហេតុ។
នាង អាវើរី មីរីក (Avery Myrick) បាននិយាយថា ម្តាយរបស់នាង ដែលជាគ្រូបង្រៀននៅសាលា Covenant បានលាក់ខ្លួន នៅពេលដែលមានការបាញ់ប្រហារពេញសាលារៀន។
មីរីកបានប្រាប់ទូរទស្សន៍ WSMV4 ជាសម្ពន្ធរបស់ទូរទស្សន៍ NBC ថា “ម៉ាក់ថាគាត់លាក់ខ្លួននៅក្នុងទូ ហើយមានការបាញ់ប្រហារគ្រប់កន្លែង”។
ពេលនាងបានឮថាម្ដាយរបស់នាងមានសុវត្ថិភាព វាបាននាំមកនូវ “ការធូរស្បើយយ៉ាងខ្លាំង”៕
មនុស្ស៦នាក់ត្រូវបានបាញ់ស្លាប់នៅសាលាបឋមសិក្សា Christian Covenant កាលពីថ្ងៃចន្ទរួមមានបុគ្គលិកសិក្សាបីនាក់