ប្រែសម្រួល : កញ្ញាដាលីស (ដេល្លីម៉េល) ៖ ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទទី២៧មីនាបានបដិសេធសំណើរបស់រុស្ស៊ីដើម្បីស៊ើបអង្កេតការផ្ទុះនៅលើបំពង់បង្ហូរឧស្ម័នធម្មជាតិ ដែលផ្ទេរឧស្ម័នធម្មជាតិពីរុស្ស៊ីទៅកាន់អឺរ៉ុបនៅក្រោមសមុទ្របាល់ទិក។
រុស្ស៊ី ចិន និងប្រេស៊ីលបានបោះឆ្នោតគាំទ្រសំណើរបស់រុស្ស៊ី ប៉ុន្តែសមាជិកក្រុមប្រឹក្សាសន្តិសុខផ្សេងទៀតបានបដិសេធ ឬនិយាយថា ការស៊ើបអង្កេតមួយផ្សេងទៀតគឺមិនចាំបាច់។
ដើម្បីឱ្យសេចក្តីសម្រេចចិត្តមួយត្រូវអនុម័តដោយក្រុមប្រឹក្សាសន្តិសុខអ.ស.ប វាត្រូវការសំឡេងគាំទ្រយ៉ាងតិច ៩ នៅក្នុងក្រុមប្រឹក្សាដែលមានសមាជិកចំនួន ១៥ហើយគ្មានវេតូណាមួយពីសមាជិកអចិន្ត្រៃយ៍ គឺ សហរដ្ឋអាម៉េរិក រុស្ស៊ី ចិន អង់គ្លេស និងបារាំង។
ឯកអគ្គរដ្ឋទូតរងរបស់សហរដ្ឋអាម៉េរិក លោក រ៉ូបឺត វូដ (Robert Wood) បាននិយាយថា មិនចាំបាច់មានការស៊ើបអង្កេតរបស់អ.ស.បទេ នៅពេលដែលការស៊ើបអង្កេតរបស់ស៊ុយអែត ដាណឺម៉ាក និងអាល្លឺម៉ង់ “កំពុងដំណើរការក្នុងលក្ខណៈទូលំទូលាយ តម្លាភាព និងមិនលម្អៀង”។
លោកបាននិយាយថា “វាជាការប៉ុនប៉ងដើម្បីបង្ខូចកេរ្តិ៍ឈ្មោះការងារនៃការស៊ើបអង្កេតជាតិដែលកំពុងបន្ត និងធ្វើឱ្យមានការរើសអើងលើការសន្និដ្ឋានណាមួយដែលពួកគេធ្វើឡើងដែលមិនសមប្រកបតាមសាច់រឿងនិងនយោបាយដែលបានកំណត់ទុកជាមុនរបស់រុស្ស៊ី។ វាមិនមែនជាការប៉ុនប៉ងដើម្បីស្វែងរកការពិតនោះទេ”។
បំពង់បង្ហូរឧស្ម័ន ដែលគេស្គាល់ថា Nord Stream 1 និង Nord Stream 2 ភាគច្រើនគឺគ្រប់គ្រងដោយក្រុមហ៊ុនថាមពលរដ្ឋរុស្ស៊ី Gazpromរបស់រុស្ស៊ី។ដំបូងរបាយការណ៍ក្នុងសារព័ត៌មានអាម៉េរិកថា CIAអាម៉េរិកជាប់ពាក់ព័ន្ធនឹងបំផ្ទុះផ្តាច់បំពង់បង្ហូរនេះនិងក្រោយមានការចោទប្រកាន់ថាវាជាអំពើរបស់ក្រុមសកម្មជនអ៊ុយក្រែន តែរុស្ស៊ីនៅតែអះអាងថាអាម៉េរិកនៅពីក្រោយវិច្ឆេទកម្មបំផ្លាញនេះនិងទាមទារអោយមានការស៊ើបអង្កេតពីអង្គការសហប្រជាជាតិ៕
បំពង់បង្ហូរឧស្ម័ន Nord Stream 2 ត្រូវបានបំផ្ទុះកាលពីថ្ងៃទី២៨កញ្ញា ឆ្នាំ២០២២