ប្រែសម្រួល : កញ្ញាដាលីស (ស្ត្រេតថែមស៍) ៖ ត្បូងពេជ្រពណ៌ស្វាយដ៏កម្រ ដែលគេហៅថា Eternal Pink និងមានតម្លៃ ៣៥ លានដុល្លារអាម៉េរិក នឹងត្រូវដាក់លក់ដេញថ្លៃដោយក្រុមហ៊ុន Sotheby’s ជាផ្នែកនៃការលក់គ្រឿងអលង្ការដ៏អស្ចារ្យរបស់ខ្លួននៅទីក្រុងញូវយ៉កក្នុងខែមិថុនា។
ត្បូងពេជ្រ ១០,៥៧ ការ៉ាត់នេះកំពុងត្រូវបានឃោសនានៅលើទីផ្សារថាជាត្បូងពេជ្រពណ៌ផ្កាឈូកលាយស្វាយថ្លៃបំផុតមិនធ្លាប់ដាក់ដេញថ្លៃពីមុនមក នេះបើយោងតាមក្រុមហ៊ុន Sotheby’s ។
លោក ថម ម៉ូសសេស (Tom Moses) អនុប្រធាននិងជាប្រធានមន្ទីរពិសោធន៍ និងជាមន្ត្រីស្រាវជ្រាវនៅវិទ្យាស្ថានត្បូងវិទ្យាអាម៉េរិកាំង (Gemological Institute of America) បាននិយាយថា “ម៉ូតកែច្នៃដ៏ប្រណីតរបស់វារួមផ្សំជាមួយនឹងភាពដិតនៃពណ៌របស់វាបានធ្វើឱ្យវាក្លាយជាត្បូងដ៏អស្ចារ្យបំផុតមួយរបស់ពិភពលោក”។
យោងតាម Sotheby’s ត្បូងពេជ្រដែលជីកបានក្នុងប្រទេសបុតស្វាណានេះ គឺ “អាចប្រៀបផ្ទឹមបានទៅនឹងស្នាដៃគំនូរដ៏អស្ចារ្យបំផុត ដូចជាផ្ទាំងគំនូរ Magritte ឬ Warhol” ដោយសារតែភាពភ្លឺច្បាស់និងភាពល្អឥតខ្ចោះរបស់វា។
ពេជ្រពណ៌ផ្កាឈូកលាយស្វាយគឺជាពេជ្រដ៏កម្រនិងមានអ្នកចង់បានបំផុតនៅលើពិភពលោក ហើយត្រូវបានចាត់ទុកជាការទាក់ទាញដ៏សំខាន់សម្រាប់អ្នកវិនិយោគ៕
ត្បូងពេជ្រ Eternal Pink មានតម្លៃ ៣៥ លានដុល្លារអាម៉េរិកមុនការលក់ដេញថ្លៃ