ប្រែសម្រួល : កញ្ញាដាលីស (ស្ត្រេតថែមស៍) ៖ ស្ត្រីវ័យ២០ឆ្នាំម្នាក់បានឡើងទម្ងន់ជិត២៣០គីឡូក្រាម ដោយសារតែកើតដុំគីសអូវែរទំហំប៉ុនផ្លែឪឡឹកយក្សពេញមួយឆ្នាំមកនេះ។
ដោយមិនចង់ដើរតាមគន្លងម្តាយរបស់នាង ដែលនាងមើលឃើញតស៊ូយ៉ាងវេទនាជាមួយនឹងជំងឺមហារីក ទីបំផុតនាង អាល់លីសុន ហ្វីស័រ (Allison Fisher) បានទទួលការវះកាត់យកដុំគីសនេះចេញពីពោះរបស់នាងនៅឯមន្ទីរពេទ្យ Ascension St Vincent’s Riverside ក្នុងទីក្រុងជែកសុនវីល (Jacksonville) រដ្ឋផ្លរីដា។
មុនពេលវះកាត់ នាងហ្វីស័របាននិយាយថា មាឌរបស់នាងធំពេករហូតនាងមានអារម្មណ៍ថានាងកំពុងមានផ្ទៃពោះកូន១០នាក់។ នាងមិនអាចចំកោងខ្លួន ឬមើលឃើញជើងរបស់នាងទេ។
ដុំគីសអូវែគឺជាសរីរាង្គមួយផ្ទុកពេញដោយសារធាតុរាវ ដែលអាចកើតឡើងនៅក្នុងឬនៅលើផ្ទៃនៃអូវែរ។ ដុំគីសនេះមានប្រវែងប្រហែល ៥០ សង់ទីម៉ែត្រ និងទម្ងន់ ៤៧ គីឡូក្រាម ដែលស្មើនឹងមួយភាគប្រាំនៃទម្ងន់ខ្លួនរបស់នាង។
នាងហ្វីស័រតែងតែប្រឈមមុខនឹងការឈឺពោះ ហើមពោះ ហើយថែមទាំងធ្លាប់មានរដូវដ៏ឈឺចាប់ពេញមួយឆ្នាំទៀតផង។ ប៉ុន្តែនាងបានឈប់ទៅជួបគ្រូពេទ្យដោយខ្លាចចំណាយលុយអស់ច្រើន ហើយសង្ឃឹមថាវានឹង “បាត់ទៅវិញ”។
ដោយដុំគីសត្រូវបានយកចេញតាមរយៈបច្ចេកទេសរ៉ូបូត នាងបាននិយាយថាវាបាន “ជួយសង្គ្រោះជីវិតនាង” និងផ្តល់ឱ្យនាងនូវជីវិតធម្មតាសាជាថ្មី។
នាងនិយាយថា “ខ្ញុំមានអារម្មណ៍ថាស្រាលជាងមុន។ ខ្ញុំមានអារម្មណ៍ថាជាមនុស្សម្នាក់ ខ្ញុំអាចស្លៀកសម្លៀកបំពាក់បាន ខ្ញុំអាចធ្វើអ្វីដែលមនុស្សធម្មតាអាចធ្វើបាន”។
វេជ្ជបណ្ឌិតបាននិយាយថា ពួកគេក៏បានជួយសង្គ្រោះលទ្ធភាពមានកូនរបស់នាងហ្វីស័រផងដែរ ដោយការស្រាយអូវែរខាងឆ្វេងរបស់នាង ដែលមានទំហំធម្មតា ប៉ុន្តែត្រូវបានកៀបចំនួនបីដង៕
នាង អាល់លីសុន ហ្វីស័រ អាចស្លៀកពាក់ឈុតដែលនាងស្រឡាញ់ ក្រោយវះកាត់ដុំគីសអូវែរទម្ងន់ ៤៧ គីឡូក្រាម