ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការបរទេសជប៉ុនលោក យ៉ូស៊ីម៉ាសា ហាយ៉ាស៊ី(Yoshimasa Hayashi)បាននិយាយកាលពីថ្ងៃសុក្រថា លោកនឹងទៅធ្វើទស្សនកិច្ចចិននៅចុងសប្តាហ៍នេះដើម្បីពិភាក្សាជាមួយសមភាគីចិន ឈីន ហ្កាង ។
លោកនឹងជាអ្នកការទូតកំពូលជប៉ុនលើកដំបូងដែលធ្វើទស្សនកិច្ចចិនក្នុងរយៈពេលជាងបីឆ្នាំមកនេះចំពេលប្រទេសទាំងពីរកាន់តែមានបញ្ហាប្រេះស្រាំនឹងគ្នា រួមមានការចាប់ខ្លួនជនជាតិជប៉ុនម្នាក់កាលពីពេលថ្មីៗនៅក្រុងប៉េកាំងផងដែរ។
លោក ហាយ៉ាស៊ី សង្ឃឹមថានឹងមានការផ្លាស់ប្តូរទស្សនៈដោយត្រង់ៗនិងស៊ីជំរៅឆ្ពោះទៅបង្កើតទំនាក់ទំនងបែបស្ថាបនានិងនឹងនរមួយក្នុងពេលលោកពិភាក្សាជាមួយលោកឈីន និងមន្ត្រីចិនដទៃទៀតក្នុងអំឡុងពេលទស្សនកិច្ចចាប់ពីថ្ងៃ១ដល់២មេសា។
គេក៏រំពឹងថាលោកនឹងទាមទារអោយដោះលែងជនជាតិជប៉ុនដែលកំពុងត្រូវឃុំខ្លួន ពិភាក្សាអំពីការព្រួយបារម្ភអំពីសន្តិសុខនៅក្នុងតំបន់និងស្នើសុំអោយចិនប្រព្រឹត្តដោយទទួលខុសត្រូវលើបញ្ហាសកលរួមមានសង្គ្រាមរុស្ស៊ីនៅអ៊ុយក្រែន។
លោក ហាយ៉ាស៊ី បានកត់សំគាល់ថា មានកិច្ចព្រមព្រៀងមួយរវាងមេដឹកនាំនៃប្រទេសទាំងពីរដើម្បីស្ថាបនាទំនាក់ទំនងបែបស្ថាបនានិងនឹងនរមួយ តែលោកថា«ទំនាក់ទំនងជប៉ុន-ចិនកំពុងជួបការប្រឈមនិងការបារម្ភជាច្រើន តែនៅតែមានឳកាសសំរាប់កិច្ចសហការគ្នា»។
ទោះជាមានទំនាក់ទំនងសេដ្ឋកិច្ចនិងធុរកិច្ចជិតដិតរវាងមហាអំណាចអាស៊ីទាំងពីរ ក៏រដ្ឋាភិបាលទីក្រុងតូក្យូនិងប៉េកាំងកាន់តែមើលមុខគ្នាមិនចំនៅប៉ុន្មានឆ្នាំចុងក្រោយនេះ នៅពេលជប៉ុនគិតថាចិនកាន់តែមានឥទ្ធិពលក្នុងតំបន់ដែលជាការគំរាមដល់សន្តិសុខជាតិនិងសេដ្ឋកិច្ចរបស់ខ្លួន។
រដ្ឋមន្ត្រីការបរទេសជប៉ុនលោក យ៉ូស៊ីម៉ាសា ហាយ៉ាស៊ី បាននិយាយថា វាសំខាន់ក្នុងការស្ថាបនាទំនាក់ទំនងបែបស្ថាបនានិងនឹងនរមួយជាមួយចិន
ក្រសួងការបរទេសចិនបាននិយាយថា ជនជាតិជប៉ុនត្រូវបានចាប់ខ្លួនចំពោះការពាក់ព័ន្ធនឹងសកម្មភាពចារកម្ម ដោយជនល្មើសរំលោភច្បាប់ព្រហ្មទណ្ឌនិងច្បាប់ប្រឆាំងចារកម្មរបស់ចិន។ក្រសួងក៏បានសុំអោយរដ្ឋាភិបាលជប៉ុនអប់រំពលរដ្ឋខ្លួនអោយយល់ដឹងអំពីច្បាប់ទាំងនេះ។
សូមបញ្ជាក់ថា ជនជាតិជប៉ុនជាងដប់នាក់ត្រូវបានចាប់ខ្លួននៅចិននៅមួយឆ្នាំជាងមកនេះដោយសារធ្វើការចរកម្ម។
សូមបញ្ជាក់ថា ដោយគិតថាចិនជាការគំរាមដល់សន្តិសុខជាតិរបស់ខ្លួន ជប៉ុនបាននិងកំពុងពង្រីកកិច្ចសហប្រតិបត្តិការសន្តិសុខជាមួយបណ្តាប្រទេសដែលមានចិត្តគំនិតដូចគ្នានៅក្នុងតំបន់និងនៅអឺរ៉ុបព្រមទាំងអង្គការណាតូ ហើយជំរុញទស្សនៈ«ឥណ្ឌូប៉ាស៊ីហ្វិកសេរីនិងបើកចំហ»មួយដើម្បីទប់ទល់នឹងចិន។
ក្រោយធ្វើទស្សនកិច្ចចិន លោក ហាយ៉ាស៊ី នឹងទៅកាន់ទីក្រុងព្រុចសែលដើម្បីចូលរួមកិច្ចប្រជុំរបស់រដ្ឋមន្ត្រីការបរទេសណាតូដើម្បីបញ្ជាក់ការតាំងចិត្តរបស់ជប៉ុនឡើងវិញចំពោះសណ្តាប់ធ្នាប់អន្តរជាតិផ្អែកលើច្បាប់និងពង្រឹងកិច្ចសហការរវាងជប៉ុននិងណាតូក្នុងការឆ្លើយតបនឹងការឈ្លានពានរបស់រុស្ស៊ីនៅអ៊ុយក្រែន ព្រមទាំងបញ្ហាសំខាន់ៗដទៃទៀត។
ជប៉ុនក៏បារម្ភអំពីសមយុទ្ធយោធារួមគ្នាកាន់តែកើនឡើងរវាងចិននិងរុស្ស៊ីនៅជុំវិញជប៉ុន៕