ដោយៈពៅ និមល /ភ្នំពេញ៖ អគ្គលេខាធិការនៃមជ្ឈមណ្ឌលអាស៊ាន-ជប៉ុន លោក គូនីហ៊ីកូ ហ៊ីរ៉ាបាយ៉ាស៊ី (Kunihiko HIRABAYASHI) បានបង្ហាញការចាប់អារម្មណ៍ចំពោះការដាំដុះនៅកម្ពុជា ព្រោះមានភាពសម្បូរបែបប្រកបដោយសក្តានុពលខ្ពស់និងធម្មជាតិ ដោយរក្សាទុករសជាតិដើម និងក្លិន ពិសេស។
លោក Kunihiko HIRABAYASHIចាប់អារម្មណ៍បែបនវក្នុងពេលលោកថ្លែងក្នុងសិក្ខាសាលា ស្តីពី «ផលិតផលផ្លែឈើក្រៀម និងផលិតផលកសិកម្មកម្ពុជាសម្រាប់ទីផ្សារប្រទេសជប៉ុន» ដែលរៀបចំឡើងដោយផ្ទាល់និងតាមប្រព័ន្ធវីដេអូ កាលពីថ្ងៃទី ៣១ ខែមីនា ឆ្នាំ ២០២៣ តាមរយៈកិច្ចសហការរៀបចំរបស់អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម ជាមួយនឹងមជ្ឈមណ្ឌលអាស៊ាន-ជប៉ុន ។
ប្រភពក្រសួងពាណិជ្ជកម្មក្នុងពិធីនោះលោក Kunihiko បានបញ្ជាក់ថា ប្រទេសកម្ពុជាមានការអភិវឌ្ឍខ្ពស់ផ្តោតសំខាន់លើវិស័យវាយនភណ្ឌ សំណង់ និងទេសចរណ៍ ជាពិសេស វិស័យកសិកម្មមានការដាំដុះគិតគូរដល់និរន្តរភាព វិបុលភាព និងសុខភាព ប្រកបដោយសុវត្ថិភាព និងគុណភាព។
លោកបន្តថា មជ្ឈមណ្ឌលអាស៊ាន-ជប៉ុន នឹងបន្តកិច្ចសហប្រតិបត្តិការជាបន្តបន្ទាប់ជាមួយនឹងរាជរដ្ឋាភិបាលកម្ពុជា ក្នុងការជំរុញការធ្វើពាណិជ្ជកម្ម និងវិនិយោគឱ្យកាន់តែច្រើនឡើង ដើម្បីពង្រឹងកិច្ចសហប្រតិបត្តិការរវាងកម្ពុជា និងប្រទេសជប៉ុន ព្រមទាំងលើកកម្ពស់សន្តិភាពក្នុងតំបន់នៃសមាជិកអាស៊ានទាំង១០ និងប្រទេសជប៉ុនផងដែរ។
លោក កៅ កោសល ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានជំរុញពាណិជ្ជកម្ម បានបញ្ជាក់ថា ប្រទេសជប៉ុនដែលជាទីផ្សារធំមួយក្នុងតំបន់ ហើយការរៀបចំសិក្ខាសាលានៅពេលនេះ ក្នុងគោលបំណងធ្វើការផ្សព្វផ្សាយ និងផ្ដល់ចំណេះដឹង បទពិសោធន៍ អំពីការជំរុញនាំចេញផលិតផលផ្លែឈើក្រៀម និងផលិតផលកសិកម្មកម្ពុជាសម្រាប់ទីផ្សារប្រទេសជប៉ុន ក្រោយវិបត្តិជំងឺកូវីដ១៩។
គួររំលឹកថា ទំហំពាណិជ្ជកម្មទ្វេភាគីរវាងកម្ពុជា-ជប៉ុន ក្នុងឆ្នាំ២០២២ មានទឹកប្រាក់ប្រមាណជាង ១,៩៤៨ លានដុល្លារអាមេរិក។ ក្នុងនោះ កម្ពុជាបាននាំចេញទៅជប៉ុន មានទឹកប្រាក់ជាង ១,១៧៣លានដុល្លារនិងជប៉ុនបាននាំចូលមកកម្ពុជាមានទឹកប្រាក់ជាង ៧៧៥ លានដុល្លារ។
គម្រោងវិនិយោគសំខាន់ៗរបស់ជប៉ុននៅកម្ពុជារួមមានវិស័យបង្គុំរថយន្ដ និងបរិក្ខារបច្ចេកទេសកសិ-ឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។
លោក កៅ កោសល បានឱ្យដឹងថា ក្រៅពីគម្រោងវិនិយោគដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជាក៏មាននូវវត្តមាននៃធុរកិច្ចជប៉ុនតូចធំប្រមាណ១៧០០ក្រុមហ៊ុនដោយផ្តោតលើវិស័យធនាគារ អាកាសចរណ៍ និងភោជនីយដ្ឋានជាដើម៕សរន / N