ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការបរទេសអាម៉េរិកលោក អ៊ែនថូនី ប្លីងកិន បានទទូចសុំអោយរុស្ស៊ីដោះលែងអ្នកយកព័ត៌មានរបស់កាសែតWall Street Journalម្នាក់ដែលត្រូវបានចាប់ខ្លួនកាលពីសប្តាហ៍មុនជាបន្ទាន់ និងជនជាតិអាម៉េរិកម្នាក់ទៀត។
លោកប្លីនកិន ទូរស័ព្ទទៅសមភាគីរុស្ស៊ី លោកឡាវរ៉ូវ អោយដោះលែងជនជាតិអាម៉េរិក
ក្នុងការហៅទូរស័ព្ទទៅកាន់សមភាគីរុស្ស៊ីលោកសឺហ្គេ ឡាវរ៉ូវ លោកប្លីងកិន បានសម្តែងការព្រួយបារម្ភជាខ្លាំងចំពោះការចាប់ខ្លួនអ្នកកាសែត អ៊ីវ៉ាន់ហ្គឺសកូវីច(Evan Gershkovich )ពីបទធ្វើចារកម្មលបលួចយកការសម្ងាត់នៅទីតាំងផលិតអាវុធរុស្ស៊ីមួយ។លោកប្លីងកិន បានអំពាវនាវអោយដោះលែងជននេះជាបន្ទាន់។
លោកក៏សុំអោយដោះលែងលោកផល វ៉េលឹន(Paul Whelan)ដែលអាម៉េរិកចាត់ទុកថាត្រូវបានឃុំខ្លួនដោយខុសច្បាប់។
លោកវ៉េលឹន ជានាយកក្រុមហ៊ុនមួយនៅរដ្ឋមីស៊ីហ្គឹន និងត្រូវបានចាប់ឃុំខ្លួនចាប់តាំងពីខែធ្នូឆ្នាំ២០១៨ពីបទចោទប្រកាន់ចារកម្មផងដែរ។គ្រួសាររបស់លោកនិងរដ្ឋាភិបាលអាម៉េរិកអះអាងថា ការចោទប្រកាន់របស់រុស្ស៊ីមិនមានមូលដ្ឋានច្បាស់លាស់។លោកកំពុងជាប់គុកក្នុងប្រទេសរុស្ស៊ីក្រោយការកាត់ទោសអោយជាប់គុក១៦ឆ្នាំ។
លោកប្លីនកិន និងលោកឡាវរ៉ូវ ក៏បានពិភាក្សាគ្នាអំពីសារសំខាន់នៃការបង្កើតបរិយាកាសមួយដែលអនុញ្ញាតអោយបេសកកម្មការទូតអនុវត្តការងាររបស់គេ។
សេវាស៊ើបការណ៍FSBរបស់រុស្ស៊ីបាននិយាយថាលោក ហ្គឺសកូវីច បានកំពុងប្រមូលព័ត៌មានអំពីសហគ្រាសមួយក្នុងរោងចក្រឧស្សាហកម្មយោធាពេលត្រូវបានចាប់ខ្លួន។អាជ្ញាធរបានឃាត់ខ្លួនលោកកាលពីសប្តាហ៍មុន និងលោកជាអ្នកឆ្លើយឆ្លងព័ត៌មានអាម៉េរិកទីមួយដែលត្រូវចាប់ខ្លួននៅរុស្ស៊ីពីបទធ្វើការលបលួចយកការសម្ងាត់ចាប់តាំងពីសម័យសង្គ្រាមត្រជាក់។
អង្គភាពកាសែតខាងលើបានបដិសេធការចោទប្រកាន់ និងទាមទារអោយដោះលែងអ្នកកាសែតរបស់ខ្លួនផងដែរ៕
ក្រសួងការបរទេសអាម៉េរិកចាត់ទុកការចាប់ខ្លួនលោកហ្គឺសកូវីចថា មិនអាចទទួលយកបាន