ប្រែសម្រួល : កញ្ញាដាលីស (ដេល្លីម៉េល) ៖ លោក លីអូណាដូ ឌីកាព្រីយ៉ូ (Leonardo DiCaprio) បានស្ថិតក្នុងទីក្រុងវ៉ាស៊ីនតោនកាលពីថ្ងៃចន្ទទី៣មេសាមិនមែនដើម្បីដាក់សម្ពាធសមាជិកសភាអំពីបុព្វហេតុបរិស្ថានរបស់គាត់ឬដើម្បីថតរឿងកុននោះទេ ប៉ុន្តែដើម្បីផ្តល់សក្ខីកម្ម(កស្សិណ)ក្នុងការកាត់ក្តីពុករលួយផ្នែកនយោបាយ ដែលពាក់ព័ន្ធតារាហ៊ីបហប់ទសវត្សរ៍ទី៩០និងអ្នកហិរញ្ញវត្ថុម៉ាឡេស៊ីដ៏អាប់យសមួយរូប។
លោក ប្រាស មីសែល (Pras Michel) ជាសមាជិកនៃក្រុមតន្ត្រីអាម៉េរិក The Fugees កំពុងប្រឈមមុខនឹងការចោទប្រកាន់ពីបទជួយប្រើប្រាស់លុយដោយសម្ងាត់ពីលោក ឡូវ ថេក ចូ (Low Taek Jho) ជាពាណិជ្ជករម៉ាឡេស៊ី ដែលនៅចំកណ្តាលនៃរឿងអាស្រូវនេះ ដើម្បីជះឥទ្ធិពលលើនយោបាយអាម៉េរិក។
ឌីកាព្រីយ៉ូ និងលោក ឡូវ ថេក ចូ
លោកឌីកាព្រីយ៉ូបានបង្កការចាប់អារម្មណ៍ក្នុងបន្ទប់សវនាការកាលពីថ្ងៃចន្ទ ដោយប្រាប់អង្គប្រឹក្សាយោបល់អំពីភាគីណាខ្លះដែលទទួលបានលុយពីលោកឡូវដែលប្រើលុយលួចបានពីមូលនិធិទ្រព្យសម្បត្តិអធិបតេយ្យរបស់ម៉ាឡេស៊ី ដែលគេស្គាល់ថា 1Malaysia Development Berhad ឬ 1MDB ។
តារារឿងTitanic ដែលត្រូវបានកោះហៅឱ្យធ្វើសក្ខីកម្មដោយអយ្យការ រូបនេះមិនត្រូវបានចោទប្រកាន់ពីបទប្រព្រឹត្តខុសនៅក្នុងអ្វីដែលបានក្លាយជាករណីគៃបន្លំដ៏ធំបំផុតមួយនៅក្នុងពិភពលោកនោះទេ។
តារាសម្តែងវ័យ ៤៨ ឆ្នាំរូបនេះបានផ្តល់សក្ខីកម្មថា លោកឡូវបានរៀបចំ “ពិធីជប់លៀងហ៊ឹកហ៊ាក់ជាមួយមនុស្សផ្សេងៗគ្នាជាច្រើនមកពីជុំវិញពិភពលោក” នៅលើនាវាកម្សាន្ត និងនៅក្លិបរាត្រីដែលជារឿយៗមានតារាល្បីៗចូលរួម ជួនកាលមានទាំងតារាចម្រៀងមីសែលផងដែរ។
ឌីកាព្រីយ៉ូបាននិយាយថា គាត់និងលោកឡូវបានជួបគ្នាលើកដំបូងនៅប្រហែលឆ្នាំ ២០១០ នៅឯពិធីជប់លៀងមួយនៅឡាសវេហ្គាស ប៉ុន្តែតារាសម្តែងរូបនេះញញឹមរួចនិយាយថាគាត់មិនចាំអ្វីទាំងអស់ពីពិធីជប់លៀងនាយប់មួយនោះ។
បន្ទាប់មកគាត់ត្រូវបានលោកឡូវអញ្ជើញឱ្យចូលរួមពិធីជប់លៀងជាទៀងទាត់ រួមទាំងការប្រារព្ធពិធីចូលឆ្នាំសកលដែលក្នុងនោះអ្នកដើរលេងជាច្រើននាក់បានជិះយន្តហោះពីប្រទេសអូស្ត្រាលីទៅកាន់សហរដ្ឋអាម៉េរិកតាមយន្តហោះឯកជន ដើម្បីមើលនាឡិកាបន្លឺពាក់កណ្តាលអធ្រាត្រពីរដង។
លោកឌីកាព្រីយ៉ូបាននិយាយថា “ខ្ញុំយល់ថាគាត់ជាអ្នកជំនួញដ៏ធំមួយរូប ដែលមានទំនាក់ទំនងផ្សេងៗជាច្រើននៅក្នុងទីក្រុងអាប៊ូដាប៊ី (Abu Dhabi) នៅប្រទេសម៉ាឡេស៊ី…ជាប្រភេទអ្នកជំនួញវ័យក្មេងនៅក្នុងពិភពជំនួញ ដែលទទួលបានជោគជ័យមិនគួរឱ្យជឿ”៕
ឌីកាព្រីយ៉ូឡើងផ្តល់សក្ខីកម្មក្នុងក្នុងការកាត់ក្តីពុករលួយផ្នែកនយោបាយក្នុងក្រុងវ៉ាស៊ីនតោនកាលពីថ្ងៃចន្ទ