ប្រែសម្រួល : កញ្ញាដាលីស (ស្ត្រេតថែមស៍) ៖ ប្រភពមួយបានបញ្ជាក់កាលពីថ្ងៃអង្គារទី៤មេសាថា មហាសេដ្ឋីប្រព័ន្ធផ្សព្វផ្សាយលោក រ៉ូភឺត ម៉ួដុក (Rupert Murdoch)និងអតីតមេប៉ូលិសក្រុងសាន់ហ្វ្រាន់ស៊ីស្កូ លោកស្រី អាន ឡេស្លី ស្មីត (Ann Lesley Smith) បានលុបចោលការភ្ជាប់ពាក្យរបស់ពួកគេហើយ។
ប្រធានក្រុមហ៊ុន Fox Corpអាយុ ៩២ ឆ្នាំរូបនេះ និងលោកស្រីស្មីតមានគម្រោងរៀបការនៅរដូវក្តៅនេះ។ វានឹងក្លាយជាអាពាហ៍ពិពាហ៍ទីប្រាំរបស់គាត់។
វេបសាយ Vanity Fair បានរាយការណ៍អំពីការបែកបាក់នេះ ដោយស្រង់ប្រភពមួយជិតស្និទ្ធនឹងលោកម៉ួដុកដោយនិយាយថាគាត់មានការមិនសប្បាយចិត្តជាមួយនឹងទស្សនៈផ្សព្វផ្សាយដំណឹងប៉ប៉ាច់ប៉ប៉ោចរបស់លោកស្រីស្មីត។
លោកម៉ួដុកបានប្រាប់កាសែត News Corp ដែលជាកម្មសិទ្ធិរបស់ New York Post ដែលបានទម្លាយព័ត៌មាននៃការភ្ជាប់ពាក្យនេះ យ៉ាងដូច្នេះថា រូបលោកនិងលោកស្រីស្មីតអាយុ ៦៦ ឆ្នាំបានជួបគ្នាកាលពីខែកញ្ញានៅឯចម្ការទំពាំងបាយជូរម៉ូរ៉ាហ្គា (Moraga) របស់គាត់ក្នុងទីក្រុងប៊ែលអ៊ែរ (Bel Air) រដ្ឋកាលីហ្វ័រញ៉ា ហើយគាត់បានទូរស័ព្ទទៅលោកស្រីនៅពីរសប្តាហ៍ក្រោយ។
លោកស្រីស្មីតគឺជាស្ត្រីមេម៉ាយ ប្តីស្លាប់។
នៅថ្ងៃទី ១៧ ខែមីនាក្នុងទីក្រុងញូវយ៉ក លោកម៉ួដុកបានបង្ហាញចិញ្ចៀនពេជ្រដល់លោកស្រីស្មីត។
លោកម៉ួដុកបានប្រាប់កាសែត Post ថា “ខ្ញុំភ័យណាស់។ ខ្ញុំខ្លាចធ្លាក់ក្នុងអន្លង់ស្នេហ៍ ប៉ុន្តែខ្ញុំដឹងថានេះជាការធ្លាក់អន្លង់ស្នេហ៍ចុងក្រោយរបស់ខ្ញុំ។ វាគួរតែធ្លាក់ទៅចុះ។ ខ្ញុំសប្បាយចិត្ត”៕
លោកម៉ួដុកនិងលោកស្រីស្មីតចែកផ្លូវគ្នាហើយ ទាំងមិនបានរៀបការ