ប្រែសម្រួលៈបំណង(ដេល្លីម៉េល)៖ ក្រសួងយោធាតៃវ៉ាន់បាននិយាយកាលពីថ្ងៃព្រហស្បតិ៍ថា ឧទ្ធម្ភាគចក្រប្រឆាំងនាវាមុជទឹករបស់ចិនមួយ និងនាវាចម្បាំងបីគ្រឿងត្រូវបានសង្កេតឃើញនៅជុំវិញកោះតៃវ៉ាន់ បន្ទាប់ពីប្រធានាធិបតី សាយ អ៊ីងវិន ជួបប្រធានសភាអាម៉េរិក លោកខេវិន ម៉ាក់ខាធីនៅក្រុងឡូស អ៊ែនជើឡេសកាលពីមួយថ្ងៃមុន។
ក្រសួងបាននិយាយក្នុងសេចក្តីថ្លែងការណ៍មួយថា« យន្តហោះរបស់កងទ័ពរំដោះប្រជាជនមួយនិងនាវាបីគ្រឿងរបស់កងទ័ពជើងទឹកចិន ត្រូវបានប្រទះឃើញនៅជុំវិញកោះស្វ័យគ្រប់គ្រងនេះនៅម៉ោង៦ព្រឹកថ្ងៃនេះ។កងកម្លាំងប្រដាប់អាវុធតៃវ៉ាន់បានតាមដានស្ថានការណ៍និង ប្រាប់ទៅយន្តហោះ នាវានិកងប្រព័ន្ធកាំជ្រួចអោយត្រៀមខ្លួនឆ្លើយតប»។
ចិនបញ្ជូននាវាបើកកាត់ច្រកសមុទ្រតៃវ៉ាន់កាលពីថ្ងៃព្រហស្បតិ៍ ជាការឆ្លើយតបទៅនឹងជំនួបរវាងប្រធានាធិបតីតៃវ៉ាន់និងប្រធានសភាអាម៉េរិក
យោធាតៃវ៉ាន់បានសង្កេតឃើញនាវាដឹកយន្តហោះចិនឈ្មោះសាន់ទុង(Shandong)តាំងពីថ្ងៃពុធ និងឥឡូវនៅចម្ងាយប្រមាណ៤៨០គីឡូម៉ែត្រនៅឯនាយឆ្នេរកោះតៃវ៉ាន់។
មន្ត្រីយោធាតៃវ៉ាន់ បាននិយាយថា វាជាការហ្វឹកហាត់តែធ្វើឡើងចំពេលរសើបបំផុតហើយ«យើងកំពុងសិក្សាថាតើវាវិវត្តទៅរបៀបណា។នាវានេះនៅចុងខាងត្បូងតៃវ៉ាន់ ហើយនាវាចម្បាំងតៃវ៉ាន់ជាច្រើនកំពុងតាមដាន។នាវាដឹកយន្តហោះអាម៉េរិកក៏កំពុងនៅចម្ងាយ៦៤០គីឡូម៉ែត្រពីកោះតៃវ៉ាន់»។
វត្តមាននាវាចិននៅក្បែរកោះតៃវ៉ាន់កើតឡើងក្រោយមេដឹកនាំតៃវ៉ាន់នៅតែចចេសស្កាត់ជួបប្រធានសភាអាម៉េរិកនៅរដ្ឋកាលីហ្វ័រញ៉ា ដោយមិនស្តាប់ការព្រមានរបស់ចិន។
ចិនបានគំរាមឆ្លើយតបដាច់ខាតចំពោះជំនួបនេះ ដោយអាជ្ញាធរសមុទ្រចិនមុននេះបាននិយាយថា ខ្លួននឹងបង្កើនការល្បាតនៅក្នុងដែនទឹកដែលខណ្ឌចែកចិនដីគោកនិងតៃវ៉ាន់។ការល្បាតនិងត្រួតពិនិត្យបីថ្ងៃ ដោយរួមទាំងការឡើងត្រួតពិនិត្យនាវាដឹកទំនិញនិងសំណង់នៅតាមផ្លូវទឹកនេះផងដែរ។
សូមបញ្ជាក់ថា ទោះជាតៃវ៉ាន់បានគ្រប់គ្រងកោះនេះដោយឯករាជ្យអស់ជាង៧០ឆ្នាំ ក៏ចិននៅតែគិតថាវាជាខេត្តផ្តាច់ខ្លួនមួយរបស់ខ្លួនដែលត្រូវតែបង្រួបបង្រួមជាមួយចិនដីគោកវិញ។
កាលពីអតីតប្រធានសភាអាម៉េរិកជួបលោកស្រីសាយកាលពីខែសីហាឆ្នាំមុន ចិនបានធ្វើសមយុទ្ធទ័ពអាកាសនិងជើងទឹកដ៏ធំព័ទ្ធជុំវិញកោះនេះ៕