ប្រែសម្រួលៈបំណង(ដេល្លីម៉េល)៖ រដ្ឋាភិបាលទីក្រុងវ៉ាស៊ីនតោន សេអ៊ូលនិងតូក្យូ កាលពីថ្ងៃសុក្រទី៧មេសាបានអំពាវនាវអោយរដ្ឋជាសមាជិកអង្គការសហប្រជាជាតិទាំងអស់បញ្ជូនជនជាតិកូរ៉េខាងជើងដែលកំពុងសម្ងំធ្វើការនៅក្រៅប្រទេសត្រឡប់ទៅស្រុកវិញ ដោយសារតែពួកគេបន្តគេចវេសពីទណ្ឌកម្មអន្តរជាតិដោយលួចបញ្ជូនលុយទៅចិញ្ចឹមកម្មវិធីសព្វាវុធខុសច្បាប់របស់រដ្ឋាភិបាលទីក្រុងព្យុងយ៉ាង។
តំណាងប្រទេសជាសម្ពន្ធមិត្តទាំងបីក៏បាននិយាយនៅក្នុងសេចក្តីថ្លែងការណ៍រួមមួយថា កូរ៉េខាងជើងក៏ពាក់ព័ន្ធនឹង«សកម្មភាពអេឡិចត្រូនិចខុសច្បាប់»ដើម្បីគាំទ្រការពង្រីកយោធារបស់ខ្លួន ។
ប្រទេសមានសព្វាវុធនុយគ្លេអ៊ែរមួយនេះ ជាយូរមកហើយទទួលបានហិរញ្ញវត្ថុច្រើនពីកងទ័ពពលរដ្ឋរបស់ខ្លួនដែលត្រូវបានបញ្ជូនទៅធ្វើការនៅបរទេស ភាគច្រើននៅប្រទេសក្បែរខាងចិសនិងរុស្ស៊ី តែក៏មាននៅអឺរ៉ុប មជ្ឈិមបូព៌ានិងអាហ្វ្រិក។
សូមបញ្ជាក់ថា ក្រោមសេចក្តីសំរេចចិត្តរបស់អង្គការសហប្រជាជាតិមួយនៅឆ្នាំ២០១៧ រដ្ឋជាសមាជិកទាំងអស់មានពេលដល់ខែធ្នូឆ្នាំ២០១៩ដើម្បីបញ្ជូនត្រឡប់ជនជាតិកូរ៉េខាងជើងទាំងអស់ដែលកំពុងធ្វើការនៅក្នុងប្រទេសរបស់គេ។តែកាលពីថ្ងៃសុក្រទី៧មេសា ឆ្នាំ២០២៣ តំណាងពិសេសរបស់កូរ៉េខាងត្បូង អាម៉េរិកនិងជប៉ុនសំរាប់កូរ៉េខាងជើង បាននិយាយថា កម្មករកូរ៉េខាងជើងនៅបរទេសនៅបន្តធ្វើការរកលុយអោយរដ្ឋាភិបាលទីក្រុងព្យុងយ៉ាងដើម្បីបង្កើនការបង្ករឿងដដែល។
តំណាងប្រទេសទាំងបីបាននិយាយនៅក្នុងសេចក្តីថ្លែងការណ៍មួយថា «កម្មករកូរ៉េខាងជើងនៅក្រៅប្រទេសបន្តប្រើអត្តសញ្ណាណនិងសញ្ជាតិក្លែងបន្លំដើម្បីគេចវេសពីទណ្ឌកម្មអន្តរជាតិ ហើយរកប្រាក់នៅក្រៅប្រទេសដើម្បីជួយទ្រទ្រង់កម្មវិធីកាំជ្រួចផ្លោងនិងសព្វាវុធមហាប្រល័យរបស់សាធារណរដ្ឋប្រជាមានិតប្រជាធិបតេយ្យកូរ៉េ។យើងក៏មានការព្រួយបារម្ភជាខ្លាំងអំពីវិធីដែលកូរ៉េខាងជើងគាំទ្រកម្មវិធីទាំងនេះតាមរយៈលួចលុយនិងលាងលុយ ព្រមទាំងការប្រមូលព័ត៌មានតាមរយៈសកម្មភាពអេឡិចត្រូនិចខុសច្បាប់»។
តំណាងទាំងបីបានអះអាងថា កូរ៉េខាងជើងបានលួចលុយអេឡិចត្រូនិច(លុយគ្រីបតូ)ដល់ទៅ១,៧ពាន់លានដុល្លារគ្រាន់តែឆ្នាំមុនតែមួយ៕
ក្រោយកិច្ចប្រជុំត្រីភាគីនៅក្រុងសេអ៊ូល តំណាងប្រទេសសម្ពន្ធមិត្តទាំងបីបានថ្កោលទោសការបាញ់បង្ហោះកាំជ្រួចផ្លោងរបស់កូរ៉េខាងជើងផ្ទួនៗ ព្រមទាំងពាក្យសម្តីគំរាមប្រើសព្វាវុធនុយគ្លេអ៊ែរ