ប្រែសម្រួលៈបំណង(ស្ត្រេតថែមស៍)៖ អាជ្ញាធរកាលពីថ្ងៃសុក្របានសុំអោយប្រជាជននៅក្នុងក្រុងឈៀងម៉ៃភាគខាងជើងថៃនៅក្នុងផ្ទះនិងធ្វើការចេញពីផ្ទះខណៈខ្យល់អាកាសពោរពេញដោយផ្សែងអ័ព្ទក្នុងកំរិតគ្រោះថ្នាក់ដល់សុខភាព។
ផ្សែងបណ្តាលមកពីការដុតរានព្រៃដុតស្មៅយកដីធ្វើកសិកម្មកំពុងគ្របទីតាំងទេសចរណ៍ពេញនិយមថៃមួយនេះនៅប៉ុន្មានសប្តាហ៍ចុងក្រោយនេះ។នៅព្រឹកថ្ងៃសុក្រ គេហទំព័រតាមដានគុណភាពខ្យល់IQAirបានចាត់ថ្នាក់ឈៀងម៉ៃជាទីក្រុងធំដែលមានការបំពុលខ្យល់ខ្ពស់បំផុតនៅក្នុងលោក គឺលើទីក្រុងញូវដេល្លី របស់ឥណ្ឌានិងក្រុងឡាហ័រ នៅប៉ាគីស្ថានដែលធ្លាប់ជាកន្លែងជួបការបំពុលខ្យល់ជាប្រចាំ។
យោងតាមIQAir កំរិតធូលីតូចល្អិតបំផុតដែលគេហៅថាPM2.5 ឡើងខ្ពស់ជាង៦៦ដងខ្ពស់លើសកំរិតដែលអង្គការសុខភាពពិភពលោកចាត់ទុកថាមិនប៉ះពាល់សុខភាព។
អភិបាលក្រុងឈៀងម៉ៃ លោកនីរ៉ាត ពង់ស៊ីតទីតាវ៉ន(Nirat Pongsittitavorn)បានចេញការជូនដំណឹងមួយដោយអំពាវនាវអោយប្រជាជននៅក្នុងផ្ទះនិងធ្វើការចេញពីផ្ទះដើម្បី«ការពារខ្លួនឯងនិងកាត់បន្ថយផលប៉ះពាល់សុខភាព»បណ្តាលមកពីធូលីPM2.5។
សូមបញ្ជាក់ថា ថៃបាននិងកំពុងរងការបំពុលខ្យល់អាកាសខ្លាំងចាប់តាំងពីដើមឆ្នាំ បង្កឡើងដោយទម្លាប់ដុតរានព្រៃនិងដុតជញ្ជ្រាំងត្រៀមដីធ្វើការកសិកម្មនៅរដូវវស្សាបន្ទាប់។មនុស្សជិត២លាននាក់បានចូលព្យាបាលនៅមន្ទីរពេទ្យដោយសារបញ្ហាផ្លូវដង្ហើមបង្កឡើងដោយខ្យល់កខ្វក់នៅក្នុងឆ្នាំ២០២៣នេះ ៕
ក្រុងឈៀងម៉ៃក៏ដូចជាបណ្តាខេត្តនៅតាមព្រំដែនខាងជើងរងការបំពុលខ្យល់អាកាសរាល់ឆ្នាំដោយសារការដុតព្រៃដុតជញ្ជ្រាំងយកដីធ្វើកសិកម្មទាំងនៅថៃនិងប្រទេសក្បែរខាង
