ប្រែសម្រួលៈបំណង(ដេល្លីម៉េល)៖ មន្ត្រីអភិរក្សម្នាក់បាននិយាយកាលពីថ្ងៃអាទិត្យទី៩មេសាថា ត្រីបាឡែនប្រវែង១៧ម៉ែត្រមួយបានងាប់ក្រោយហែលមកទើលើឆ្នេរកោះបាលី ដោយធ្វើអោយវាក្លាយជាត្រីបាឡែនខ្នាតយក្សនេះទីបី ដែលបានហែលមកជាប់លើឆ្នេរដោយខ្លួនឯងនិងងាប់នៅកោះរបស់ឥណ្ឌូនេស៊ីមួយនេះក្នុងរយៈពេលត្រឹមតែជាងមួយសប្តាហ៍។
បាឡែនញីនេះ ត្រូវបានប្រទះឃើញកឿងនៅលើឆ្នេរយេឡេស(Yeh Leh)នៅស្រុកមួយ របស់កោះបាលីកាលពីរសៀលថ្ងៃសៅរ៍។
ពែរម៉ាណា យូឌីអាសូ(Permana Yudiarso)មន្ត្រីជលផលនិងសមុទ្រនៅមូលដ្ឋាននោះបានប្រាប់ទីភ្នាក់ងារសារព័ត៌មានបារាំងនៅថ្ងៃអាទិត្យថា «ឥឡូវយើងកំពុងទាញខ្មោចត្រីទៅលើគោកដើម្បីធ្វើតេស្តិ៍ ហើយយើងនឹងកប់វាក្រោយការធ្វើតេស្តិ៍ចប់សព្វគ្រប់»។
វាជាបាឡែកយក្សទីបីដែលបានហែលមកកឿងលើឆ្នេរកោះបាលី ដែលជាទីតាំងទេសចរណ៍ពេញនិយមរបស់ឥណ្ឌូនេស៊ី នៅក្នុងខែមេសានេះតែមួយ។
កាលពីថ្ងៃពុធ បាឡែនប្រវែង១៨ម៉ែត្រមួយក៏បានហែលមកទើលើឆ្នេរក្នុងស្រុកមួយនៅឆ្នេរខាងកើតនៃកោះបាលី។មុននោះកាលពីថ្ងៃ១មេសា បាឡែនទម្ងន់ជាងពីរតោនមួយប្រវែង១១ម៉ែត្រត្រូវបានប្រទះឃើញងាប់ស្អុយនៅលើឆ្នេរមួយក្នុងស្រុកតាបាណាន(Tabanan)នៃកោះបាលី។
មន្ត្រីជលផលកោះបាលីបាននិយាយថា គេសង្ស័យថាត្រីដែលប្រទះឃើញកាលពីថ្ងៃសៅរ៍ទំនងជាងាប់ដោយជំងឺផងដែរ ដូចត្រីបាឡែនដែលងាប់កាលពីប៉ុន្មានថ្ងៃមុនដោយសារដងខ្លួនស្គមកំព្រឹង។ការធ្វើតេស្តិ៍រកមូលហេតុនៃការងាប់ត្រីនេះអាចចំណាយពេលបីសប្តាហ៍ តែអ្នកជំនាញបានរកឃើញការចេញឈាមនៅត្រង់សួតនិងពោះវៀនត្រីពោរពេញដោយទឹក៕
សមាជិកក្រុមបរិស្ថានឥណ្ឌូនេស៊ី ពិនិត្យមាត់ត្រីបាឡែនដែលងាប់នៅលើឆ្នេរកោះបាលី