ប្រែសម្រួល : កញ្ញាដាលីស (ស្ត្រេតថែមស៍) ៖ បុរសម្នាក់ក្នុងប្រទេសចិនត្រូវបានកាត់ទោសឱ្យជាប់ពន្ធនាគាររយៈពេលប្រាំមួយខែពីបទបំភ័យមាន់ឱ្យងាប់ដល់ទៅ ១.១០០ ក្បាលក្នុងជម្លោះជាមួយអ្នកជិតខាងរបស់គាត់។
ករណីគួរឱ្យចាប់អារម្មណ៍នេះបានកើតឡើងក្នុងខែមេសាឆ្នាំមុននៅពេលដែលបុរសមាននាមត្រកូល គូ (Gu) មានការខកចិត្តដែលអ្នកជិតខាងឈ្មោះ ចុង (Zhong) បានកាប់ដើមឈើរបស់គាត់ដោយមិនបានប្រាប់គាត់ជាមុន។
ជាការសងសឹក លោកគូមកពីស្រុកហេងយ៉ាង(Hengyang)ក្នុងខេត្តហ៊ូណាន (Hunan) ភាគខាងត្បូងប្រទេសចិន បានលួចចូលក្នុងកសិដ្ឋានចិញ្ចឹមមាន់របស់លោកចុងនៅពេលយប់ជាច្រើនដង។
គេមិនច្បាស់ថាតើលោកគូមានបំណងអ្វីនោះទេ ប៉ុន្តែតុលាការនៅស្រុកហេងយ៉ាងបាននិយាយថា នៅយប់មួយបុរសនោះបានប្រើពិល “ដើម្បីបន្លាចមាន់” នេះបើយោងតាមកាសែតរដ្ឋ China Daily ។ទង្វើនេះបានធ្វើឱ្យហ្វូងមាន់សម្រុកចូលទៅជ្រុងមួយ ដែលបណ្តាលឱ្យពួកវាចំនួន ៤៦០ ក្បាលរត់ជាន់គ្នាងាប់។
លោកគូត្រូវបានគេចាប់បានហើយបង់លុយសំណងជំងឺចិត្តដល់លោកចុងចំនួន ៣.០០០ យ័ន។
ប្រការនេះបានធ្វើឱ្យគាត់កាន់តែខឹងសម្បា ហើយគាត់បានត្រឡប់ទៅកសិដ្ឋានរបស់លោកចុងម្តងទៀត ដើម្បីធ្វើសកម្មភាពរបស់គាត់ម្តងទៀត ដែលលើកនេះបានបណ្តាលឱ្យមាន់ងាប់ចំនួន ៦៤០ ក្បាល។
អាជ្ញាធរចិនបាននិយាយថា សត្វមាន់ងាប់ចំនួន ១.១០០ ក្បាលនេះមានតម្លៃ ១៣.៨៤០ យ័ន។
តុលាការកាលពីថ្ងៃអង្គារទី៤មេសាបាននិយាយថា សកម្មភាពរបស់លោកគូគឺមានចេតនា ហើយបានកាត់ទោសគាត់ឱ្យជាប់ពន្ធនាគាររយៈពេលប្រាំមួយខែជាមួយនឹងការព្យួរមួយឆ្នាំ ដោយគិតពីបុរសនោះបង្ហាញវិប្បដិសារីចំពោះទង្វើរបស់គាត់៕