ប្រែសម្រួល : កញ្ញាដាលីស (ដេល្លីម៉េល) ៖ នាយកដ្ឋានពន្លត់អគ្គិភ័យបានប្រកាសនៅព្រឹកថ្ងៃចន្ទទី១០មេសាថាសាកសពពីរនាក់ត្រូវបានរកឃើញនៅក្នុងគំនរបាក់បែកនៃអគារដែលបានដួលរលំនៅក្នុងទីក្រុងម៉ាសី (Marseille) របស់បារាំង បន្ទាប់ពីការផ្ទុះដ៏ធំមួយ។
រដ្ឋអាជ្ញារបស់ក្រុងម៉ាសី លោកស្រី ដូមីនិក ឡូរ៉ង់ (Dominique Laurens) បានប្រាប់អ្នកយកព័ត៌មានថា អ្នកពន្លត់អគ្គិភ័យជាង ១០០នាក់បានព្យាយាមពន្លត់អណ្តាតភ្លើងយ៉ាងសន្ធោសន្ធៅនៅក្នុងគំនរបាក់បែកនៃអគារកម្ពស់ ៥ ជាន់ ប៉ុន្តែជាង ១៧ ម៉ោងក្រោយមក “ស្ថានភាពមិនទាន់មានភាពនឹងននៅឡើយ”។
ការរកឃើញសាកសពទាំងពីរបានកើតឡើងនៅប្រហែល ២៤ ម៉ោងបន្ទាប់ពីការផ្ទុះបានបណ្តាលឱ្យដួលរលំនៃអគារនៅក្នុងទីក្រុងកំពង់ផែមេឌីទែរ៉ាណេនេះ។ មន្ត្រីម្នាក់បាននិយាយកាលពីល្ងាចថ្ងៃអាទិត្យថា ក្រុមអ្នកជួយសង្គ្រោះកំពុងស្វែងរកអ្នកបាត់ខ្លួនចំនួន៨នាក់ ដែលគេសន្មត់ថាស្ថិតនៅក្រោមគំនរបាក់បែក។
នៅព្រឹកថ្ងៃចន្ទនេះ ក្រុមមន្ត្រីគិតថា មនុស្សចន្លោះពី ៤ ទៅ ១០ នាក់ប្រហែលជានៅជាប់ក្រោមគំនរបាក់បែក។ ប៉ូលិសមិនទាន់អាចបញ្ជាក់ពីការបាត់ខ្លួនជាក់ស្តែងនៃមនុស្សទី ៩ ដែលរស់នៅក្នុងអគារក្បែរនោះនៅឡើយទេ។មនុស្ស៥នាក់បានរងរបួសស្រាលពីការបាក់រលំ ដែលបានកើតឡើងមុនម៉ោង១ព្រឹកថ្ងៃអាទិត្យ។
លោកស្រី ដូមីនិក ឡូរ៉ង់ និយាយថា ការផ្ទុះឧស្ម័នគឺស្ថិតក្នុងចំណោមមូលហេតុជាច្រើន ដែលគេកំពុងស្រាវជ្រាវ៕
អគារនៅក្រុងម៉ាសីរលំក្រោយការផ្ទុះដ៏ធំ