ប្រែសម្រួល : កញ្ញាដាលីស, បំណង(ដេល្លីម៉េល) ៖កម្រិតនៃការបំពុលខ្ពស់នៅក្នុងទីក្រុងឈៀងម៉ៃភាគខាងជើងរបស់ប្រទេសថៃនិងខេត្តជុំវិញកំពុងធ្វើឱ្យអ្នកទេសចររត់ចេញឆ្ងាយនិងជាការព្រមានមួយដល់អ្នកក្នុងស្រុក ខណៈរដ្ឋាភិបាលកាលពីថ្ងៃចន្ទ ទី១០ មេសា បានជំរុញឱ្យប្រជាជនចៀសវាងសកម្មភាពនៅខាងក្រៅ។
ប្រឈមខ្យល់អាកាសកាន់តែគ្រោះថ្នាក់ដល់សុខភាពដូច្នេះ មនុស្សប្រមាណ១.៧០០នាក់នៅឈៀងម៉ៃកាលពីថ្ងៃចន្ទបានដាក់បណ្តឹងរួមគ្នាមួយទៅកាន់តុលាការរដ្ឋបាល ដោយប្តឹងនាយករដ្ឋមន្ត្រីប្រាយុទ្ធ ចាន់ អូចា និងទីភ្នាក់ងាររដ្ឋចំនួនពីរចំពោះបរាជ័យក្នុងការទប់ស្កាត់ផ្សែងអ័ព្ទគ្រប់លើតំបន់។ពួកគេអះអាងថា ផ្សែងបំពុលបរិយាកាសនេះកាត់បន្ថយអាយុកាលរស់នៅរបស់គេអស់ប្រាំឆ្នាំ។
អស់ជាច្រើនសប្តាហ៍កាលពីខែមុន ទីក្រុងនេះបានឈរនៅលំដាប់កំពូលនៃបញ្ជីគុណភាពខ្យល់អាក្រក់ជាសកលរបស់វេបសាយ IQAirដោយនាំមុខទាំងទីក្រុងឡាហ័រ (Lahore)នៅប៉ាគីស្ថាននិងទីក្រុងញូវដេល្លីរបស់ឥណ្ឌា។
ដើមបណ្តឹងម្នាក់ដែលជានាយកមជ្ឈមណ្ឌលការពារការរស់រាននិងសិទ្ធិសហគមន៍ បាននិយាយថា នាយករដ្ឋមន្ត្រីថៃខកខានក្នុងការអនុវត្តសិទ្ធិអំណាចពេញលេញរបស់លោកដើម្បីដោះស្រាយបញ្ហានេះ។
វេជ្ជបណ្ឌិតម្នាក់នៅមហាវិទ្យាល័យពេទ្យនៃសកលវិទ្យាល័យឈៀងម៉ៃ បាននិយាយថាសុខភាពរបស់ប្រជាជនតាមទីក្រុងទីប្រជុំជនកំពុងរងគ្រោះពីកំរិតធូលីMP2.5ក្នុងខ្យល់ខ្ពស់ហួសហេតុ។កំរិតបំពុលខ្ពស់ក្នុងខ្យល់នាំអោយមនុស្សកើតមហារីកសួត ជំងឺបេះដូង ស្ត្រូកនិងកាត់បន្ថយអាយុកាលអាចរស់បានបួនទៅប្រាំឆ្នាំ។
ក្នុងពេលជាមួយគ្នា ប្រធានសមាគមសណ្ឋាគារថៃនៅភូមិភាគខាងជើង លោក ភូនុត ថាណាឡាវផានិច (Phunut Thanalaopanich) បានប្រាប់ទីភ្នាក់ងារសារព័ត៌មានរ៉យទ័រកាលពីថ្ងៃចន្ទថា ឈៀងម៉ៃដែលល្បីខាងទេសភាពភ្នំដ៏ស្រស់ស្អាត ប្រាសាទ និងហាងកាហ្វេឡូយៗ បានស្វាគមន៍ភ្ញៀវទេសចរ ១០,៨ លាននាក់ក្នុងឆ្នាំ ២០១៩ មុនពេលជំងឺរាតត្បាតប៉ុន្តែការកក់សណ្ឋាគារនៅក្នុងទីក្រុងបានធ្លាក់ចុះមកត្រឹម ៤៥ ភាគរយ។
នោះគឺតិចជាងការរំពឹងទុកពី ៨០ ទៅ ៩០ ភាគរយនៅមុនថ្ងៃឈប់សម្រាកចូលឆ្នាំថ្មីនៅសប្តាហ៍នេះ ដែលគេស្គាល់ថាសង្ក្រាន។
លោក ស៊ូណាត អ៊ីនសៅ (Sunat Insao) អាយុ ៥៣ ឆ្នាំ ដែលលក់ទឹកក្រូចស្រស់ បាននិយាយថា “វាបានប៉ះពាល់ដល់មុខរបររបស់ខ្ញុំ…មនុស្សមិនមកទេ (ពួកគេ) មិនអាចមើលឃើញទេសភាព”។
ជាមួយនឹងគុណភាពខ្យល់កាន់តែយ៉ាប់យ៉ឺននៅភាគខាងជើង ក្រសួងសុខាភិបាលរបស់ថៃកាលពីថ្ងៃចន្ទបានជំរុញឱ្យសាធារណជនចៀសវាងសកម្មភាពនៅខាងក្រៅ និងពាក់ម៉ាស់ដែលអាចចម្រោះភាគល្អិតតូចៗ។
ទីក្រុងឈៀងម៉ៃ ដែលជាទីក្រុងធំទី ៣ របស់ថៃ ទទួលបានពិន្ទុ ២៨៩ លើសន្ទស្សន៍គុណភាពខ្យល់របស់ IQAir (AQI) នៅក្នុងខែមីនាដែលវាស់កម្រិតនៃភាគល្អិតដែលអាចដកដង្ហើមបាននៅក្នុងខ្យល់។
កាលពីថ្ងៃចន្ទ វាបានធ្លាក់ចុះត្រឹម ១៧១ ប៉ុន្តែនៅតែខ្ពស់ជាងកម្រិតដែលបានណែនាំរបស់អង្គការសុខភាពពិភពលោកដល់ទៅ ១៩ ដង៕
ទេសភាពទីក្រុងឈៀងម៉ៃត្រូវបានបាំងជិតដោយផ្សែងពុល