ដោយៈបូព៌ព្រឹក្ស/ភ្នំពេញ៖កីឡាករប្រដាល់ គុនខ្មែរជនជាតិប្រេស៊ីលលោក Thiago Teixeira ត្រូវបានមហាក្សត្រប្រោសប្រទានសញ្ជាតិខ្មែរ ដល់កីឡាករប្រដាល់គុនខ្មែរ ដល់លោក។នេះបើយោងតាមព្រះរាជក្រឹត្យនៅថ្ងៃទី ១១ខែមេសា ឆ្នាំ២០២៣។
គួរបញ្ជាក់ថា កាលពីថ្ងៃទី ៨ខែមេសាឆ្នាំ២០២៣សម្តេចតេជោ នាយករដ្ឋមន្ត្រី បានបង្ហោះសារឱ្យដឹងតាមបណ្តាញសង្គម តេលេក្រាម នៅមុននេះបន្តិចថាៈ ” ដើម្បីជាការលើកទឹកចិត្តខ្ញុំសូមចូលរួមជួយ ឧបត្ថម្ភ ដល់កីឡាករប្រដាល់ Thiago Teixeira សញ្ជាតិប្រេស៊ីល នូវថវិកា ចំនួន ២០.០០០ ដុល្លារ។ មួយវិញទៀត ប្រសិនបើមិនខុសទាស់ ផ្នែកផ្លូវច្បាប់ណាមួយរបស់ប្រេស៊ីល ខ្ញុំនឹងស្នើទៅព្រះ មហាក្សត្រ ដើម្បីផ្តល់ សញ្ជាតិខ្មែរ ជូនកីឡាករ Thiago ។
គួររំលឹកជូនថា កីឡាករមានដើមកំណើតនៅប្រទេសប្រេស៊ីល Thiago Teixeira បានធ្វើឱ្យគ្រប់គ្នា មានការភ្ញាក់ផ្អើល និងកោតសរសើរខ្លាំង បន្ទាប់ពីរូបគេ បានផ្តួលកីឡាកររបស់អង់គ្លេស Joe Craven ឱ្យសន្លប់ក្នុងទឹកទី២ ដើម្បីក្លាយជាម្ចាស់ខ្សែក្រវាត់ កម្រិតពិភពលោក WMO (World Muaythai Organization) សម្រាប់ការប្រកួតតំណាងឱ្យកម្ពុជាជាលើកដំបូងកាលពីថ្ងៃទី២ ខែមេសា ឆ្នាំ២០២៣។
នៅពេលការប្រកួតបញ្ចប់ភ្លាម Thiago បានយកទង់ជាតិរបស់កម្ពុជាមកបង្ហាញ និងចងជាប់នៅក្រោយខ្លួនរបស់គេ។ សកម្មភាពបែបនេះ ក៏ព្រោះតែ Thiago កំពុងជាប់ចិត្តខ្លាំងជាមួយប្រដាល់គុនខ្មែរ បន្ទាប់ពីអ្នកប្រដាល់សញ្ជាតិប្រេស៊ីលម្នាក់នេះ បានទៅសិក្សា និងឃើញផ្ទាល់នឹងភ្នែកពីចម្លាក់គុនខ្មែរ នៅប្រាង្គប្រាសាទអង្គរកាលពីពេលថ្មីៗនេះ ដោយបញ្ជាក់ថា «គុនខ្មែរ» ជាក្បាច់គុនមានដើមកំណើតនៅកម្ពុជា។
ជាមួយភស្តុតាងបញ្ជាក់យ៉ាងច្បាស់ពីមរតកក្បាច់គុនរបស់ដូនតាខ្មែរនេះ បានធ្វើឱ្យ Thiago យល់កាន់តែច្បាស់ និងសម្រេចងាកចិត្ត ចេញពីប្រដាល់ Muay Thai ដែលរូបគេបានហ្វឹកហាត់ តាំងពីអាយុ១៦ឆ្នាំ ហើយនេះជាមូលហេតុចម្បងដែលចងចិត្តអ្នកប្រយុទ្ធ របស់ប្រេស៊ីលរូបនេះ ឱ្យយល់ព្រមប្រកួតតំណាងឱ្យកម្ពុជា ដើម្បីជួយផ្សព្វផ្សាយ «គុនខ្មែរ» ទៅកាន់ពិភពលោក។
នៅពេលពិធីករ បានសួរពីចំណាប់អារម្មណ៍ ចំពោះការប្រកួតតំណាងឱ្យកម្ពុជា លើកទី១នេះ Thiago Teixeira បានឆ្លើយតបថា៖ «ជាដំបូង ខ្ញុំចង់ថ្លែងអំណរគុណដល់ព្រះយេស៊ូវគ្រីស្ត ហើយទី២ ខ្ញុំសូមអរគុណដល់អ្នកគាំទ្រទាំងអស់, ស្រី ចាន់ថន, ម្តាយរបស់ខ្ញុំ និងប្រជាជនកម្ពុជា ចំនួន ១៦ លាននាក់ ដែលបានចូលរួមជាមួយខ្ញុំ ក្នុងការប្រកួត នេះ។ ជើងឯកពិភពលោក WMO គុនខ្មែរ ជាក្បាច់គុនមានដើមកំណើតពីកម្ពុជា» ។
បន្ថែមលើនេះ Thiago Teixeira បានបង្ហោះវីដេអូខ្លី មួយទៀត បន្ទាប់ពីការប្រកួតបានបញ្ចប់ដោយរូបគេ បាននិយាយជាភាសាខ្មែរថា៖ «គុនខ្មែរ! គុនខ្មែរ! គុនខ្មែរ ជាក្បាច់គុនមានដើមកំណើតពីកម្ពុជា»៕សរន
