ប្រែសម្រួល : កញ្ញាដាលីស (ដេល្លីម៉េល) ៖ អ្នកការទូតកំពូលរបស់សហរដ្ឋអាម៉េរិកលោក អានថូនី ប្លីងកិន និងប្រមុខក្រសួងការពារជាតិលោក ឡយ អូស្ទីនបាននិយាយជាមួយសមភាគីអ៊ុយក្រែនរបស់ខ្លួនកាលពីថ្ងៃអង្គារទី១១មេសា ខណៈរដ្ឋាភិបាលក្រុងវ៉ាស៊ីនតោនព្យាយាមធានាដល់សម្ពន្ធមិត្តរបស់ខ្លួនឡើងវិញ បន្ទាប់ពីឯកសាររសើបខ្លាំងបានបែកធ្លាយពេញអនឡាញ។
ការបែកធ្លាយនេះ ដែលបានជំរុញឱ្យមានការស៊ើបអង្កេតឧក្រិដ្ឋកម្មដោយក្រសួងយុត្តិធម៌រួមមានព័ត៌មានសម្ងាត់បំផុតអំពីការប្រយុទ្ធរបស់អ៊ុយក្រែនប្រឆាំងនឹងការឈ្លានពានរបស់កងកម្លាំងរុស្ស៊ីក៏ដូចជាការវាយតម្លៃសម្ងាត់នៃសម្ពន្ធមិត្តរបស់អាម៉េរិក។
ឯកសារ ដែលត្រូវបានពិនិត្យដោយទីភ្នាក់ងារសារព័ត៌មាន AFPបានគូសបញ្ជាក់ពីការព្រួយបារម្ភរបស់សហរដ្ឋអាម៉េរិកអំពីសមត្ថភាពរបស់អ៊ុយក្រែនក្នុងការបន្តការពារប្រឆាំងនឹងការវាយប្រហាររបស់រុស្ស៊ី ខណៈកាសែត Washington Post បានរាយការណ៍ថាឯកសារមួយផ្សេងទៀតបានសម្តែងការសង្ស័យអំពីភាពជោគជ័យនៃការវាយលុកនាពេលខាងមុខដោយកងកម្លាំងរបស់រដ្ឋាភិបាលក្រុងគៀវ។
លោកប្លីងកិនបានប្រាប់សន្និសីទសារព័ត៌មានកាលពីថ្ងៃអង្គារថា “យើងបានចូលរួមជាមួយសម្ពន្ធមិត្តនិងដៃគូក្នុងកម្រិតខ្ពស់ក្នុងរយៈពេលប៉ុន្មានថ្ងៃកន្លងមកនេះរួមទាំងការធានាពួកគេឡើងវិញអំពីការប្តេជ្ញាចិត្តរបស់យើងក្នុងការការពារព័ត៌មានចារកម្មសម្ងាត់”។
លោកប្លីងកិនបាននិយាយថា លោកបាននិយាយជាមួយសមភាគីអ៊ុយក្រែនលោក ឌីមីត្រូ គូឡេបា (Dmytro Kuleba) ហើយ “បញ្ជាក់ជាថ្មីនូវការគាំទ្រយូរអង្វែងរបស់យើងសម្រាប់អ៊ុយក្រែននិងសម្រាប់កិច្ចខិតខំប្រឹងប្រែងរបស់ខ្លួនដើម្បីការពារបូរណភាពទឹកដី អធិបតេយ្យភាព និងឯករាជ្យភាពរបស់ខ្លួន”។
លោកអូស្ទីន ដែលឈរក្បែរលោកប្លីងកិន បាននិយាយថា គាត់ក៏បាននិយាយជាមួយសមភាគីអ៊ុយក្រែនលោក អូឡេកសី រីស្នីកូវ (Oleksiy Reznikov) ផងដែរ។
លោកអូស្ទីនបាននិយាយថា “លោកនិងថ្នាក់ដឹកនាំនៅតែផ្តោតលើកិច្ចការនៅនឹងដៃ” ដោយកត់សម្គាល់ថា “ពួកគេនៅមានសមត្ថភាពជាច្រើនដែលពួកគេត្រូវការដើម្បីបន្តទទួលបានជោគជ័យ”។
អ៊ុយក្រែនត្រូវគេរំពឹងថានឹងបើកការវាយប្រហារលើការឈ្លានពានរបស់កងទ័ពរុស្ស៊ីនៅនិទាឃរដូវ ដែលជាការជំរុញខាងយោធាដ៏សំខាន់លើកដំបូងរបស់ខ្លួនក្នុងឆ្នាំនេះ។
ប៉ុន្តែកាសែត Washington Post បានរាយការណ៍ថា ឯកសារសម្ងាត់កំពូលមួយបាននិយាយថា ការការពារដ៏តឹងរ៉ឹងរបស់រុស្ស៊ី និង “ការខ្វះខាតជាបន្តរបស់អ៊ុយក្រែនក្នុងការហ្វឹកហាត់និងការផ្គត់ផ្គង់អាវុធប្រហែលជានឹងធ្វើឱ្យការវាយលុកជួបការលំបាកនិងបណ្តាលឱ្យមានអ្នកស្លាប់បាត់បង់ជីវិតធ្ងន់ធ្ងរក្នុងអំឡុងពេលវាយលុក”៕
លោកប្លីងកិននិងលោកអូស្ទីនស្ថិតនៅក្រសួងការពារជាតិអាម៉េរិកក្នុងក្រុងវ៉ាស៊ីនតោនកាលពីថ្ងៃទី១១ មេសា ឆ្នាំ២០២៣ និងបានទាក់ទងទៅកាន់សមភាគីអ៊ុយក្រែន