ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីប្រេស៊ីលលោក ល្វីស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva)បានមកដល់ប្រទេសចិនកាលពីយប់ថ្ងៃពុធទី១២មេសាសម្រាប់ដំណើរទស្សនកិច្ចផ្លូវការក្នុងគោលបំណងជំរុញទំនាក់ទំនងរវាងមហាយក្សអាស៊ីនិងសេដ្ឋកិច្ចធំបំផុតរបស់អាម៉េរិកឡាទីន។
ជនឆ្វេងនិយមជើងចាស់ ដែលគ្រោងនឹងជួបសមភាគី ស៊ី ជីនពីង នៅថ្ងៃសុក្រក្នុងទីក្រុងប៉េកាំង បានមកដល់ទីក្រុងសៀងហៃជាលើកដំបូង ជាមួយភរិយារបស់គាត់ លោកស្រី រ៉ូសានជេឡា “ចានចា” ដា ស៊ីលវ៉ា (Rosangela “Janja” da Silva)។
ពួកគាត់បានទទួលភួងផ្កា ខណៈពួកគាត់ត្រូវបានស្វាគមន៍ដោយអនុរដ្ឋមន្ត្រីការបរទេសចិនលោក ស៊ី ហ្វឹង (Xie Feng)។
មុនពេលចាកចេញពីប្រទេសប្រេស៊ីល លោកលូឡាបាននិយាយថា លោកមានគម្រោងអញ្ជើញលោកប្រធានាធិបតីស៊ីមកបំពេញទស្សនកិច្ចនៅកាលបរិច្ឆេទអនាគតមិនបញ្ជាក់មួយ។
លោកលូឡាបាននិយាយកាលពីល្ងាចថ្ងៃចន្ទថា “យើងនឹងពង្រឹងទំនាក់ទំនងរបស់យើងជាមួយចិន។ ខ្ញុំនឹងអញ្ជើញលោក ស៊ី ជីនពីង មកប្រទេសប្រេស៊ីលសម្រាប់កិច្ចប្រជុំទ្វេភាគីដើម្បីស្គាល់ប្រទេសនេះ និងបង្ហាញគាត់អំពីគម្រោងគួរឱ្យចាប់អារម្មណ៍សម្រាប់ការវិនិយោគរបស់ចិន”។
លោកលូឡាអាយុ៧៧ឆ្នាំដំបូងឡើយគ្រោងធ្វើដំណើរនៅចុងខែមីនាទៅកាន់ប្រទេសចិន ដែលជាដៃគូពាណិជ្ជកម្មដ៏ធំបំផុតរបស់ប្រេស៊ីល ប៉ុន្តែត្រូវពន្យារពេលធ្វើដំណើរដោយសារជំងឺរលាកសួត។
កាលវិភាគរបស់លោកលូឡានៅទីក្រុងសៀងហៃនៅថ្ងៃព្រហស្បតិ៍នេះរួមមានការចូលរួមក្នុងការឡើងកាន់តំណែងរបស់សម្ពន្ធមិត្តគាត់ គឺអតីតប្រធានាធិបតីប្រេស៊ីល លោក ឌីលម៉ា រូសសេហ្វ (Dilma Rousseff) ជាប្រធានធនាគារអភិវឌ្ឍន៍ BRICS ។ វាជាក្រុមដែលបង្កើតឡើងដោយប្រទេសកំពុងមានសេដ្ឋកិច្ចរីកចម្រើនកំពូលៗ ដូចជា ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។
ត្រឡប់មកកាន់តំណែងវិញក្នុងខែមករាបន្ទាប់ពីបានដឹកនាំប្រេស៊ីលពីឆ្នាំ ២០០៣ ដល់ឆ្នាំ ២០១០ លោកលូឡាកំពុងព្យាយាមធ្វើឱ្យទំនាក់ទំនងរលូនឡើងវិញជាមួយចិន បន្ទាប់ពីទំនាក់ទំនងកាន់តែយ៉ាប់យ៉ឺនក្រោមការដឹកនាំរបស់លោក ជែរ បូលសូណារ៉ូ (Jair Bolsonaro)។
ក្នុងការថ្លឹងថ្លែងយ៉ាងប្រុងប្រយ័ត្ន លោកក៏កំពុងស្វែងរកទំនាក់ទំនងកាន់តែជិតស្និទ្ធជាមួយសហរដ្ឋអាម៉េរិកផងដែរ ដែលជាដៃគូពាណិជ្ជកម្មធំបំផុតទីពីររបស់ប្រេស៊ីល និងជាគូប្រជែងដ៏សំខាន់របស់ចិន។
ដំណើរទស្សនកិច្ចរបស់លោកជាមួយលោកស៊ីកើតឡើងបន្ទាប់ពីជំនួបនៅសេតវិមានដ៏ល្បីល្បាញជាមួយលោកប្រធានាធិបតី ចូ បៃដិន កាលពីខែកុម្ភៈ។
លោកលូឡាចង់ដាក់ប្រេស៊ីលជាតួអង្គសំខាន់ឡើងវិញ និងជាអ្នកសម្របសម្រួលលើឆាកអន្តរជាតិ បន្ទាប់ពីរងភាពឯកោបួនឆ្នាំក្រោមការដឹកនាំរបស់លោកបូលសូណារ៉ូ។
លោកនិងលោកស៊ីរំពឹងពិភាក្សាគ្នាអំពីជម្លោះអ៊ុយក្រែន ដែលក្នុងនោះអ្នកទាំងពីរសង្ឃឹមថានឹងដើរតួជាអ្នកសម្រុះសម្រួល ទោះបីជាមានការព្រួយបារម្ភពីលោកខាងលិចថាពួកគេនឹងមានភាពកក់ក្ដៅខ្លាំងពេកជាមួយប្រធានាធិបតីរុស្ស៊ីលោក វ៉ា្លឌីមៀ ពូទីន ក៏ដោយ៕
លោកលូឡាមកដល់សៀងហៃកាលពីយប់ថ្ងៃពុធ