ប្រែសម្រួល : កញ្ញាដាលីស (អេស៊ាវ័ន) ៖ ប្រព័ន្ធផ្សព្វផ្សាយចិនបានរាយការណ៍ថា ចិនចង់ចាប់ផ្តើមសាងសង់មូលដ្ឋានព្រះចន្ទដោយប្រើដីពីព្រះចន្ទក្នុងពេល ៥ឆ្នាំទៀតដោយផែនការដ៏មហិច្ឆិតានេះនឹងចាប់ផ្តើមឆាប់ៗក្នុងទសវត្សរ៍នេះ។
ប្រព័ន្ធផ្សព្វផ្សាយក្នុងស្រុកបានរាយការណ៍ទៀតថា អ្នកវិទ្យាសាស្ត្រ អ្នកស្រាវជ្រាវ និងអ្នកម៉ៅការអវកាសចិនជាង ១០០ នាក់ថ្មីៗនេះបានជួបប្រជុំគ្នានៅក្នុងសន្និសីទមួយក្នុងទីក្រុងអ៊ូហានភាគកណ្តាលរបស់ប្រទេសចិនដើម្បីពិភាក្សាអំពីវិធីសាងសង់ហេដ្ឋារចនាសម្ពន្ធនៅលើឋានព្រះចន្ទ។
លោក ទីង លីយុន (Ding Lieyun) អ្នកជំនាញមកពីបណ្ឌិត្យសភាវិស្វកម្មចិនបាននិយាយថា ក្រុមមួយកំពុងរចនារ៉ូបូត ដែលមានឈ្មោះថា “Chinese Super Masons” ដើម្បីផលិតឥដ្ឋចេញពីដីព្រះចន្ទ នេះបើយោងតាមសារព័ត៌មាន Changjiang Daily ។
លោកទីងបាននិយាយថា “ការកសាងទីជម្រកនៅលើព្រះចន្ទគឺចាំបាច់សម្រាប់ការរុករកព្រះចន្ទរយៈពេលវែង ហើយរឿងនេះនឹងអាចសម្រេចបានក្នុងពេលអនាគត” ខណៈទទួលស្គាល់ការលំបាកក្នុងការសម្រេចវាឱ្យបានក្នុងពេលខ្លី។
លោកទីងបាននិយាយថា រ៉ូបូត ដែលមានភារកិច្ចផលិត “ដុំឥដ្ឋព្រះចន្ទ” នឹងត្រូវបាញ់បង្ហោះក្នុងអំឡុងបេសកកម្មយាន Chang’e-8 របស់ចិនក្នុងឆ្នាំ ២០២៨ ដោយលោកបន្ថែមថា ប្រទេសនេះមានបំណងទាញយកសំណាកដីដំបូងបង្អស់ពីចុងឆ្ងាយនៃព្រះចន្ទក្នុងបេសកកម្មឆ្នាំ ២០២៥។
ប្រព័ន្ធផ្សព្វផ្សាយរដ្ឋបានរាយការណ៍ថា កាលពីមុនចិនបានទាញយកសំណាកដីពីផ្នែកជិតៗនៃព្រះចន្ទជាមួយនឹងបេសកកម្មយាន Chang’e-5 របស់ខ្លួនក្នុងឆ្នាំ ២០២០។
ប្រទេសនេះបាននិយាយថា ខ្លួនចង់ឱ្យអវកាសយានិករបស់ខ្លួនស្នាក់នៅលើឋានព្រះចន្ទរយៈពេលវែង នៅពេលដែលខ្លួនបង្កើតស្ថានីយស្រាវជ្រាវលើឋានព្រះចន្ទ។
លោកទីងនិងអ្នកជំនាញរាប់សិបនាក់បានចូលរួមសន្និសីទសំណង់ក្រៅភពដែលធ្វើឡើងនៅសាកលវិទ្យាល័យវិទ្យាសាស្ត្រនិងបច្ចេកវិជ្ជាហួចុង (Huazhong) ក្នុងទីក្រុងអ៊ូហានកាលពីចុងសប្តាហ៍មុន៕
ចិននឹងប្រើដីព្រះចន្ទផលិតជាដុំឥដ្ឋដើម្បីសង់មូលដ្ឋានលើនោះក្នុងអំឡុងទសវត្សរ៍២០២០